ആദ്യ ഫിറ്റ്നസ് ബാൻഡുമായി വൺപ്ലസ്; വില 2,499 രൂപ  

പ്രീമിയം സ്മാർട്ട്ഫോൺ നിർമ്മാണത്തിൽ മാത്രം ഒതുങ്ങിക്കൂടി ചൈനീസ് ബ്രാൻഡായിരുന്നു വൺപ്ലസ് 2020 വരെ. കഴിഞ്ഞ വർഷം സ്മാർട്ട് ടിവികളും മിഡ്റേഞ്ച് സ്മാർട്ട്ഫോണുകളും അവതരിപ്പിച്ച് പുത്തൻ സെഗ്മെന്റുകളിലേക്ക് കാലെടുത്തുവച്ച വൺപ്ലസ്സ്‌ വെയറബിൾ ഡിവൈസ് സെഗ്മെന്റിലേക്കാണ് പുതുതായി കടന്നിരിക്കുന്നത്. വൺപ്ലസ്സിന്റെ ആദ്യ ഫിറ്റ്നസ് ബാൻഡ് വില്പനക്കെത്തി.

ലളിതമായി വൺപ്ലസ് ബാൻഡ് എന്ന് മാത്രം പേരുള്ള പുത്തൻ ഫിറ്റ്നസ് ബാൻഡ് ഷവോമിയുടെ എംഐ സ്മാർട്ട് ബാൻഡ് 5-വുമായാണ് കൊമ്പുകോർക്കുക. മത്സരം കൊഴുപ്പിക്കും വിധം എംഐ സ്മാർട്ട് ബാൻഡ് 5-ന് സമാനമായി 2,499 രൂപയാണ് വൺപ്ലസ് ബാൻഡിനും. കറുപ്പ് നിറത്തിൽ ലഭ്യമായ വൺപ്ലസ് ബാൻഡ്, ബുധനാഴ്ച (ജനുവരി 13) മുതൽ വൺപ്ലസ്.ഇൻ, വൺപ്ലസ് സ്റ്റോർ ആപ്പ്, ആമസോൺ, ഫ്ലിപ്കാർട്ട് വെബ്‌സൈറ്റുകൾ വഴിയും വൺപ്ലസ് എക്സ്ക്ലൂസീവ് ഓഫ്‌ലൈൻ സ്റ്റോറുകൾ വഴിയും വില്പനക്കെത്തും. 399 രൂപയ്ക്ക് നേവി, ടാൻജെറിൻ ഗ്രേ നിറങ്ങളിൽ വൺപ്ലസ് ബാൻഡിനായി പ്രത്യേകം ബാൻഡുകളും വില്പനക്കെത്തും.

126×294 പിക്‌സൽ റെസല്യൂഷനുള്ള 1.1 ഇഞ്ച് അമോലെഡ് ഡിസ്‌പ്ലേയാണ് വൺപ്ലസ് ബാൻഡിന്. ബ്ലഡ് ഓക്സിജൻ സെൻസർ, ത്രീ-ആക്സിസ് ആക്സിലറോമീറ്റർ, ഗൈറോസ്കോപ്പ്, ഒപ്റ്റിക്കൽ ഹാർട്ട് റേറ്റ് സെൻസർ എന്നിങ്ങനെ ഒരു കൂട്ടം സെൻസറുകൾ ബാൻഡിൽ ഉൾക്കൊള്ളിച്ചിട്ടുണ്ട്. ഇതുകൂടാതെ ഔട്ട്‌ഡോർ റൺ, ഇൻഡോർ റൺ, ഫാറ്റ് ബേൺ റൺ, ഔട്ട്‌ഡോർ വാക്ക്, ഔട്ട്‌ഡോർ സൈക്ലിംഗ്, ഇൻഡോർ സൈക്ലിംഗ്, എലിപ്‌റ്റിക്കൽ ട്രെയിനർ, റോവിംഗ് മെഷീൻ, ക്രിക്കറ്റ്, ബാഡ്മിന്റൺ, പൂൾ സ്വിമ്മിങ്, യോഗ, ഫ്രീ ട്രെയ്നിങ് എന്നിങ്ങനെ 13-ഓളം എക്‌സർസൈസ് മോഡുകൾ വൺപ്ലസ് ബാൻഡിൽ പ്രീലോഡ് ചെയ്തിട്ടുണ്ട്..

എംഐ സ്മാർട്ട് ബാൻഡ് 5-ന് സമാനമായി ഐപി 68 സർട്ടിഫിക്കേഷനും 5ATM വാട്ടർ റെസിസ്റ്റന്റ് റേറ്റിംഗും സഹിതമാണ് വൺപ്ലസ് ബാൻഡ് വില്പനക്കെത്തിയിരിക്കുന്നത്. ബിൽറ്റ്-ഇൻ സെൻസറുകൾ ഉപയോഗിച്ച് ബാൻഡ് ധരിക്കുന്ന വ്യക്തിയുടെ ഉറക്കം വിശകലനം ചെയ്ത് വൺപ്ലസ് ഹെൽത്ത് ആപ്ലിക്കേഷനിലൂടെ സമഗ്രമായ റിപ്പോർട്ട് നൽകും വിധമാണ് വൺപ്ലസ് ബാൻഡ് ക്രമീകരിച്ചിരിക്കുന്നത്. അതെ സമയം ഈ റിപ്പോർട്ടുകൾക്ക് മെഡിക്കൽ അംഗീകൃതമല്ല. ഹൃദയമിടിപ്പ് വ്യക്തമായി അളക്കാനുള്ള സെൻസറും വൺപ്ലസ് ബാൻഡിൽ ബാൻഡിലുണ്ട്. ഹൃദയമിടിപ്പ് ക്രമരഹിതമായാൽ നോട്ടിഫിക്കേഷനിൽ അക്കാര്യം തെളിയും.

ഊരിമാറ്റാവുന്ന ട്രാക്കർ ആണ് വൺപ്ലസ് ബാൻഡ്. ബോക്‌സിൽ കറുപ്പ് നിറത്തിലുള്ള സ്ട്രാപ്പ് ആണ് ലഭിക്കുക. ആൻഡ്രോയിഡ് 6.0 മുതലുള്ള ഓഎസ്സിൽൽ പ്രവർത്തിക്കുന്ന ദേവാസുകളുമായി വൺപ്ലസ് ബാൻഡ് ബന്ധിപ്പിക്കാം. ബ്ലൂടൂത്ത് v5.0 ആണ് കണക്ടിവിറ്റിക്ക്. സ്മാർട്ട്ഫോണുമായി ബന്ധിപ്പിച്ചാൽ മെസ്സേജ് നോട്ടിഫിക്കേഷൻ, ഇൻകമിംഗ് കോൾ അലേർട്ടുകൾ, കോൾ കട്ട് ചെയ്യുക, സോങ് പ്ലേബാക്ക് നിയന്ത്രണങ്ങൾ, ക്യാമറ ക്യാമറ ഷട്ടർ ബട്ടൺ എന്നിവ പ്രവർത്തിപ്പിക്കാനുള്ള സൗകര്യം വൺപ്ലസ് ബാൻഡ് നൽകുന്നു.

100 എംഎഎച്ച് ബാറ്ററിയാണ് വൺപ്ലസ് ബാൻഡിൽ. ഒരുതവണ പൂർണമായും ചാർജ് ചെയ്താൽ 14 ദിവസം വരെ ബാൻഡ് പ്രവർത്തിക്കും എന്നാണ് വൺപ്ലസ്സിന്റെ അവകാശവാദം. ചാർജ് ചെയ്യാനുള്ള ഡോങ്കിൾ ബാൻഡിനൊപ്പം ബോക്‌സിൽ ലഭിക്കും.