ഇനി ഷോപ്പിങും വീഡിയോകോളിലൂടെ
ബെംഗളൂരൂ: കൊവിഡ് കാലത്ത് ഷോപ്പിങ് അപകടം ആയതിനാൽ ഷോപ്പിങ് ഉപേക്ഷിച്ചിച്ചിട്ട് കുറേ കാലമായോ? വീഡിയോ കോളിലൂടെ സാധനങ്ങൾ കണ്ട് ഷോപ്പിങ് ചെയ്യാൻ ഉപഭോക്താക്കളെ സഹായിക്കുന്ന സംവിധാനവുമായി ബെംഗളൂരുവിലെ ഒരു കമ്പനി. മാൾസ്ട്രീറ്റ് എന്ന സംവിധാനമാണ് ഇതിനായി വികസിപ്പിച്ചിരിയ്ക്കുന്നത്.
ലൈവ് വീഡിയോയിലൂടെ റീട്ടെയ്ൽ ഷോപ്പുകളിലെ സാധനങ്ങൾ കണ്ട് ആവശ്യമുള്ള തെരഞ്ഞെടുത്ത് ഓര്‍ഡര്‍ ചെയ്യാൻ ഉപഭോക്താക്കളെ സഹായിക്കുന്ന പുതിയ പ്ലാറ്റ്‍ഫോമാണ് മാൾസ്ട്രീറ്റ്.
വീഡിയോ കോളിലൂടെ ഷോപ്പിങ് നടത്താം
ഈ പ്ലാറ്റ്‍ഫോം ഉപയോഗിച്ച് ഉപഭോക്താക്കൾക്ക് വീഡിയോ കോളിലൂടെ തങ്ങൾക്കാവശ്യമായ ഉത്പന്നങ്ങൾ കണ്ട് ഷോപ്പിങ് നടത്താൻ ആകും. റി കാസ്റ്റ് ടെക്നോളജീസ് എന്ന കമ്പനിയാണ് സംവിധാനം വികസിപ്പിച്ചിരിയ്ക്കുന്നത്. തുടക്കത്തിൽ ബെംഗളൂരു നഗരത്തിലാണ് സേവനം ലഭ്യമാകുക.
അടുത്ത വര്‍ഷം അവസാനത്തോടെ 20 നഗരങ്ങളിൽ സേവനം ലഭ്യമാക്കാൻ ആണ് കമ്പനി ലക്ഷ്യമിടുന്നത്. ലൈവ് വീഡിയോകളിലൂടെ റീട്ടെയ്ൽ ഷോപ്പുകളിലെ സാധനങ്ങൾ കണ്ട് ആവശ്യമുള്ളവ തെരഞ്ഞെടുക്കാം. ഇത്തരം ബിസിനസ് മോഡലിലൂടെ വരും വര്‍ഷങ്ങളിൽ 500 കോടി രൂപയുടെ വരുമാനം ആണ് കമ്പനി ലക്ഷ്യമിടുന്നത്
ബ്രൗസര്‍ അധിഷ്ഠിത വെബ് ആപ്പ് ആണ് ഇത്. സാമൂഹ്യ അകലം പാലിച്ചു കൊണ്ട് സുരക്ഷിതമായി ഷോപ്പിങ് നടത്താൻ ഉപഭോക്താക്കളെ സഹായിക്കുന്നതാണ് സംവിധാനം. ഇതിന് ഉപഭോക്താക്കളുടെ പേരു വിവരങ്ങൾ ഒന്നു വെളിപ്പെടുത്തേണ്ടതില്ല. തെരഞ്ഞെടുക്കുന്ന സാധനങ്ങൾ സുരക്ഷിതമായി വീട്ടിൽ എത്തിയ്ക്കും
മാൾസ്ട്രീറ്റിലൂടെ ഉത്പന്നങ്ങൾ ഷോര്‍ട് ലിസ്റ്റ് ചെയ്ത് വില പേശി വാങ്ങാൻ ചാറ്റിങ് സംവിധാനവും ലഭ്യമാണ്.
140 സ്റ്റോറുകളെ കോര്‍ത്തിണക്കി ബെംഗളൂരുവിൽ ഇപ്പോൾ കമ്പനി സേവനം നൽകുന്നുണ്ട്. മാര്‍ച്ച് അവസാനത്തോടെ 3,000 റീട്ടെയ്ൽ സ്റ്റോറുകളെ കോര്‍ത്തിണക്കുകയാണ് ലക്ഷ്യം. കൊവിഡ് മൂലം ബിസിനസ് കുറഞ്ഞവര്‍ക്കും പ്ലാറ്റ്‍ഫോം സഹായകരമാകും.
