ഇനി സൗജന്യമായി നെറ്റ്ഫ്ലിക്സിൽ സീരിസും സിനിമകളും കാണാം!
ലോക്ക്ഡൗണ്‍ കാലത്ത് രാജ്യത്തിന്റെ സാമ്പത്തിക രംഗം അല്‍പ്പം ക്ഷീണിച്ചപ്പോള്‍ രണ്ടു കൂട്ടര്‍ക്കാണ് ഈ പ്രതികൂല സാഹചര്യത്തില്‍ നിന്നും ഏറ്റവും കൂടുതല്‍ സാമ്ബത്തിക നേട്ടം ഉണ്ടാക്കാനായത്. ഇ-കോമേഴ്‌സ് സൈറ്റുകള്‍ക്കും ഒ .ടി.ടി പ്ലാറ്റ്‌ഫോമുകള്‍ക്കും.
കൊവിഡ് പ്രതിരോധ മാര്‍ഗങ്ങളുടെ ഭാഗമായി അധികമാരും സാധനങ്ങളും മറ്റും വാങ്ങാനും വിനോദത്തിനുമായി പുറത്തിറങ്ങാത്തതാണ് ഇവര്‍ക്ക് ഗുണകരമായി മാറിയത്. ഇതിന്റെ ചുവടുപിച്ച്‌ തങ്ങള്‍ക്ക് ഉണ്ടായ നേട്ടം നിലനിര്‍ത്താനുള്ള ഒരുക്കത്തിലാണ് പ്രമുഖ ഓവര്‍ ദ ടോപ്പ്(ഒ.ടി.ടി) പ്ലാറ്റഫോമായ നെറ്റ്ഫ്ലിക്സ്.
തികച്ചും സൗജന്യമായി ഇന്ത്യക്കാര്‍ക്ക് സീരീസും സിനിമയും കാണാനുള്ള അവസരമാണ് നെറ്റ്ഫ്ലിക്സ് ഒരുക്കുന്നത്.ഇന്ത്യ അതിവേഗം വളരുന്ന വിപണിയാണെന്ന് കണ്ടുകൊണ്ടാണ് നെറ്റ്ഫ്ലിക്സ് ഈ പുത്തന്‍ ഓഫറുമായി ഇന്ത്യന്‍ ആസ്വാദകര്‍ക്ക് മുന്‍പിലേക്ക് എത്തുന്നത്.
തുടര്‍ച്ചയായി 48 മണിക്കൂര്‍ നേരം പൂര്‍ണമായും സൗജന്യമായി നെറ്റ്ഫ്ലിക്സിലെ പരിപാടികള്‍ കാണാന്‍ സാധിക്കുമെന്നാണ് പ്ലാറ്റ്ഫോം വാഗ്ദാനം ചെയ്യുന്നത്. സാധാരണഗതിയില്‍ നെറ്റ്ഫ്ലിക്സില്‍ ആപ്പ് വഴിയോ കമ്ബ്യൂട്ടര്‍ വഴിയോ പ്രവേശിക്കുമ്ബോള്‍ സബ്‌സ്‌ക്രിപ്‌ഷന്‍ സംബന്ധിച്ചുള്ള വിവരങ്ങളാണ് സ്‌ക്രീനില്‍ തെളിയുകയെങ്കില്‍ ഈ സമയപരിധിയില്‍ അതുണ്ടാകില്ല എന്നാണു നെറ്റ്ഫ്ലിക്സ് പറയുന്നത്.
എന്നാല്‍ ഈ ഓഫര്‍ ആസ്വദിക്കാനായി അല്‍പ്പം കാത്തിരിക്കേണ്ടി വരും. വരുന്ന ഡിസംബര്‍ നാലാം തീയതി അര്‍ദ്ധരാത്രി മുതലാണ് ഓഫര്‍ നെറ്റ്ഫ്ലിക്സില്‍ ആക്റ്റീവ് ആകുക. ഇതുവഴി ഇന്ത്യന്‍ കാണികളില്‍ നല്ലൊരു വിഭാഗം ആള്‍ക്കാരെ തങ്ങളുടെ സബ്സ്ക്രൈബേര്‍സ് ആക്കി മാറ്റാന്‍ സാധിക്കുമെന്നാണ് ഒ.ടി.ടി പ്ലാറ്റ്ഫോമിന്റെ കണക്കുകൂട്ടല്‍.
