ഇരുപത് പുതിയ വിമാന സര്‍വീസുകള്‍ പ്രഖ്യാപിച്ച്‌ സ്‌പൈസ് ജെറ്റ്.  

ഡല്‍ഹി: ഇരുപത് പുതിയ വിമാന സര്‍വീസുകള്‍ പ്രഖ്യാപിച്ച്‌ സ്‌പൈസ് ജെറ്റ്. ജയ്പൂരിലേക്ക് മാത്രം 16 പുതിയ സര്‍വീസുകള്‍ നടത്തുന്നതായാണ് വിവരം. ഡെറാഡൂണ്‍, അമൃത്സര്‍, ഉദയ്പൂര്‍, ഡല്‍ഹി എന്നിവിടങ്ങളില്‍ നിന്നാണ് ജയ്പൂരിലേക്ക് സര്‍വീസുകള്‍ ഉണ്ടാകുക. ജയ്പൂരില്‍ നിന്ന് സൂറത്ത് വഴി ഗോവയിലേക്കും സര്‍വീസുകള്‍ ഉണ്ടാകും. ഉഡാന്‍ പദ്ധതി പ്രകാരം സിക്കിമിലെ പക്യോങ് നിന്ന് ഡല്‍ഹിയിലേക്കും കൊല്‍ക്കത്തയിലേക്കും സ്പൈസ് ജെറ്റിന്റെ സര്‍വീസുകള്‍ ഉണ്ടാകും. ഇതുകൂടാതെ ഡല്‍ഹിയില്‍ നിന്ന് തിരിച്ച്‌ ഡെറാഡൂണിലേക്കും സര്‍വീസ് ഏര്‍പ്പെടുത്തും. എല്ലാ പുതിയ വിമാന സര്‍വീസുകളും ഫെബ്രുവരി 1 നും ഫെബ്രുവരി 10 നും ഇടയില്‍ പ്രാബല്യത്തില്‍ വരുമെന്ന് സ്പൈസ് ജെറ്റ് അറിയിച്ചു.ജയ്പൂരില്‍ നിന്ന് ഡെറാഡൂണിലേക്ക് ആഴ്ചയില്‍ നാല് തവണയും ജയ്പൂര്‍-അമൃത്സര്‍ റൂട്ടില്‍ ആഴ്ചയില്‍ മൂന്ന് തവണയുമാണ് സര്‍വീസ് നടത്തുക. ജയ്പൂരില്‍ നിന്ന് ഉദയ്പൂര്‍, ഗോവ, ഡല്‍ഹി എന്നിവിടങ്ങളിലേക്കും ഡല്‍ഹിയില്‍ നിന്ന് ഡെറാഡൂണിലേക്കും പതിവായി സര്‍വീസ് ഉണ്ടാകും. അതേസമയം കൊല്‍ക്കത്ത-പക്യോങ് റൂട്ടിലേക്ക് ആഴ്ചയില്‍ അഞ്ച് തവണയാണ് സര്‍വീസ് നടത്തുക. പുതിയ സര്‍വീസുകള്‍ക്ക് 2,407 മുതല്‍ 3,981 രൂപ വരെയാണ് ചാര്‍ജ്. ബോംബാര്‍ഡിയര്‍ ക്യു 400 വിമാനമാണ് പുതിയ സര്‍വീസുകള്‍ക്കായി ഉപയോഗിക്കുന്നത്. കൊവിഡ് രോഗികളുടെ എണ്ണം കുറഞ്ഞതോടെയാണ് സ്പൈസ് ജെറ്റ് പുതിയ ആഭ്യന്തര സര്‍വീസുകള്‍ പ്രഖ്യാപിച്ചത്.