ഏറ്റവും വലിയ വിപ്ലവവുമായ് LG രംഗത്ത് ! -LG wing- ഇതുപോലൊരു ഫോൺ നിങ്ങൾ ഇതുവരെ കണ്ടിട്ടുണ്ടവില്ല .
കണ്ണഞ്ചിപ്പിക്കുന്ന വേഗതയിലാണ് വിപണിയില്‍ സ്മാര്‍ട്ട്ഫോണുകളുടെ പുത്തന്‍ മോഡലുകള്‍ കുമിഞ്ഞുകൂടുന്നത്. പുതുതായി പുറത്തിറങ്ങിയ ഒരു ഫോണ്‍ വാങ്ങിയ ഉപഭോക്താവിന് ഏതാനും ദിവസങ്ങള്‍ക്കുള്ളില്‍ തന്നെ, തന്റെ ഫോണിനേക്കാള്‍ വിലക്കുറവുള്ള, അതേസമയം കൂടുതല്‍ ഫീച്ചേഴ്സുള്ള ഫോണുകള്‍ വിപണി ഭരിക്കുന്നത് കാണേണ്ടി വരുന്ന സ്ഥിതിവിശേഷവും അപൂര്‍വമല്ല. ഏറ്റവും കുറഞ്ഞ വിലയില്‍ ഏറ്റവും മികച്ച മൊബൈല്‍ ഫോണുകള്‍ വിപണിയിലെത്തിക്കാനാണ് സ്മാര്‍ട്ട്ഫോണ്‍ മേഖലയിലെ വമ്ബന്മാരായ ആപ്പിള്‍, ഷവോമി, വിവോ, റിയമി, സാംസങ്ങ് തുടങ്ങിയ കമ്ബനികള്‍ ശ്രമിക്കുന്നത്.
ഇക്കാരണം കൊണ്ടുതന്നെ സ്മാര്‍ട്ട് വിപണി അടക്കിഭരിക്കുന്ന ഈ കമ്ബനികള്‍ക്കിടയിലെ കിടമത്സരവും അതിതീവ്രമാണ്.ഉപഭോക്താക്താക്കള്‍ ഇന്നുവരെ കണ്ടിട്ടില്ലാത്ത തരത്തിലുള്ള ഏറ്റവും നൂതനമായ സ്മാര്‍ട്ട്ഫോണുകള്‍ രംഗത്തിറക്കാനുള്ള കമ്ബനികളുടെ ‘പല്ലും നഖവും’ ഉപയോഗിച്ചിട്ടുള്ള ഈ മത്സരത്തില്‍ ഏറ്റവും മുന്‍പില്‍ നില്‍ക്കുന്നത് രണ്ട് കമ്ബനികളാണ്. ദക്ഷിണ കൊറിയന്‍ കമ്ബനിയായ സാംസങ്ങും ചൈനീസ് കമ്ബനിയായ ‘വിവോ’യും. 2018 വിവോ പുറത്തിറക്കിയ ‘വിവോ നെക്സി’ലൂടെയാണ് ടെക്ക് ലോകം ആദ്യമായി ‘പോപ്പ് അപ്പ് സെല്‍ഫി ക്യാമറ’യെ ആദ്യമായി പരിചയപ്പെടുന്നത്.
ലോകത്തില്‍ ആദ്യമായി ‘സൂപ്പര്‍ അമോലെഡ് എച്ച്‌.ഡി ഡിസ്‌പ്ലേ’കളുള്ള ഫോണുകള്‍ പുറത്തിറക്കിയത് ഈ ദക്ഷിണ കൊറിയന്‍ ടെക്ക് രാജാവായിരുന്നു. ഇതിനു പുറകെ, വയര്‍ലെസ് ചാര്‍ജിംഗ് സംവിധാനം, നനവിനെ പ്രതിരോധിക്കുന്ന ഐ.പി റേറ്റിംഗോടുകൂടിയ ഫോണ്‍ എന്നിവ സാംസങ്ങ് ഉപഭോക്താക്കളുടെ കൈകളിലേക്ക് എത്തിക്കുകയുണ്ടായി. എന്നാല്‍ 2019ലാണ് സാംസങ്ങ് ടെക്ക് ലോകത്തെ കാര്യമായി ഒന്ന് ഞെട്ടിച്ചത്. മടക്കാനാകുന്ന ഡിസ്‌പ്ളേയുള്ള ‘സാംസങ്ങ് ഗ്യാലക്സി ഫോള്‍ഡ്’ പുറത്തിറക്കികൊണ്ടായിരുന്നു ഇത്. സ്മാര്‍ട്ട്ഫോണ്‍ മേഖലയിലെ ഏറ്റവും വലിയ ഇന്നൊവേഷനായിരുന്ന ‘ഫോള്‍ഡിന്’ പക്ഷെ അല്‍പ്പായുസായിരുന്നു.
ഫോണ്‍ മടക്കുമ്ബോള്‍ ഡിസ്‌പ്ളേയില്‍ ഉണ്ടാകുന്ന തകരാറുകള്‍ മൂലം ഉപഭോക്താക്കള്‍ പെട്ടെന്നുതന്നെ സാംസങ്ങിനുനേരെ മുഖം കറുപ്പിച്ചു. ഫോണിന്റെ രണ്ടാം പതിപ്പായ ‘ഫോള്‍ഡ് 2’ പുറത്തിറക്കി കമ്ബനി ഈ കുറവുകള്‍ ഏറെക്കുറെ പരിഹരിച്ചുവെങ്കിലും ഉപഭോക്താക്കളെ വേണ്ടപോലെ കയ്യിലെടുക്കാന്‍ ഈ സ്മാര്‍ട്ട്ഫോണ്‍ ബ്രാന്‍ഡിന് കഴിഞ്ഞില്ല. മറ്റൊരു ബ്രാന്‍ഡായ മോട്ടോറോളയും ഇതേ മാതൃകയിലുള്ള ‘റേസറി’ന്റെ ഫോള്‍ഡബിള്‍ പതിപ്പ് പുറത്തിറക്കികൊണ്ട് ഒരു തിരിച്ചുവരവിന് ശ്രമിച്ചുവെങ്കിലും സമാനമായ പ്രശ്നങ്ങള്‍ കാരണം കാര്യമായി ശ്രദ്ധ നേടാന്‍ കഴിഞ്ഞില്ല.
ഇങ്ങനെയുള്ള സാഹചര്യത്തിലാണ്, ഒരു കാലത്ത് ഫോണ്‍ വിപണി അടക്കിവാഴുകയും, പിന്നീട് പതുകെ വിസ്മൃതിയിലേക്ക് മറയുകയും ചെയ്ത ദക്ഷിണ കൊറിയയിലെ തന്നെ മറ്റൊരു കമ്ബനിയായ എല്‍.ജി ഇന്നുവരെ ഉപഭോക്താക്കള്‍ കാണാത്തൊരു നൂതന ആശയവുമായി രംഗത്തെത്തുന്നത്. സാംസങ്ങ് ഫോള്‍ഡിനെയും ‘റേസറിനെ’യും കവച്ചുവയ്ക്കുന്ന ഒരു ആശയമായിരുന്നു അത്. ‘സ്ളാബ്'(പലക) മാതൃകയിലുള്ള ഫോണുകള്‍ കണ്ടുമടുത്ത ഉപഭോക്താക്കള്‍ക്ക് ചിറകുകള്‍ പോലെ വശങ്ങളിലേക്ക് സ്ലൈഡ് ചെയ്യാനാകുന്ന ഡ്യുവല്‍ മാക്സിമം ഡിസ്‌പ്ളേയുള്ള ഫോണാണ് എല്‍.ജി ഉപഭോക്താക്കള്‍ക്ക് മുന്‍പിലേക്ക് എത്തിക്കാന്‍ പോകുന്നത്.
ഈ പുത്തന്‍ ഫോണിന് കമ്ബനി നല്‍കിയിരിക്കുന്ന പേര് ‘എല്‍.ജി വിംഗ്’ എന്നാണ്. സ്മാര്‍ട്ട്ഫോണ്‍ നിര്‍മാണ രംഗത്ത് ഇന്നുവരെ കണ്ടതില്‍ വച്ച്‌ ഏറ്റവും നവീനമായ, അതേസമയം പ്രയോജനപ്രദവുമായ ഫീച്ചറാണ് ഇതെന്നാണ് ടെക്ക് നിരൂപകരും സ്മാര്‍ട്ട്ഫോണ്‍ ആരാധകരും ഒരേ സ്വരത്തില്‍ പറയുന്നത്. ആദ്യകാഴ്ചയില്‍ ഒരു സാധാരണ സ്മാര്‍ട്ട്ഫോണ്‍ എന്ന് തോന്നാവുന്ന ‘വിംഗി’ന്റെ ആദ്യ സ്ക്രീന്‍ മുകളിലേക്ക് തിരശ്ചീനമായി(ഹൊറിസോണ്‍ടല്‍) ‘നിരക്കി’കഴിയുമ്ബോഴാണ് ഫോണിന്റെ വിശ്വരൂപം നമുക്ക് കാണാന്‍ കഴിയുക.
സ്ലൈഡ് ചെയ്തുകഴിയുമ്ബോള്‍ ചിറക് വിടര്‍ത്തിയ മാതൃകയിലാകുന്ന ഫോണ്‍ നിരവധി സാദ്ധ്യതകളാണ് ഉപഭോക്താവിന് മുന്‍പില്‍ തുറന്നിടുന്നത്. താഴെയുള്ളതും മുകളിലുള്ളതുമായ പാനലുകള്‍ രണ്ട് വ്യത്യസ്ത രീതികളില്‍ ഉപയോഗിക്കാന്‍ സാധിക്കുന്നതിലൂടെ ഗെയിമിംഗ്, വീഡിയോ റെക്കോര്‍ഡിങ്, വീഡിയോ എഡിറ്റിംഗ്, വീഡിയോ വ്യൂവിംഗ് എന്നിവ ഉപഭോക്താവിന് പുതുമയുള്ളതും വ്യത്യസ്തവുമായ അനുഭവമായി മാറുന്നു. ഇത്തരത്തില്‍ ‘ലാന്‍ഡ്‌സ്‌കേപ്പ്’ നിലയിലുള്ള പല പ്രവര്‍ത്തനങ്ങളും നമുക്ക് കൂടുതല്‍ കാര്യക്ഷമമായി ചെയ്യാനും സാധിക്കും.
ചുരുക്കത്തില്‍ മള്‍ട്ടി ടാസ്‌കിങ്ങിന്റെ പുതിയൊരു ചക്രവാളമാണ് ‘എല്‍.ജി വിംഗ്’ നമുക്ക് മുന്നിലായി തുറന്നിടുന്നത്. ‘സാംസങ്ങ് ഫോള്‍ഡ്’ പോലുള്ള മിക്ക ഇനൊവേറ്റീവ് ഫ്ലാഗ്ഷിപ്പ് ഫോണുകളും ഡിസൈനിന്റെ കാര്യത്തില്‍ മാത്രം വ്യത്യസ്തമാകാന്‍ നോക്കുമ്ബോള്‍ ‘വിംഗ്’ ഒരേ സമയം രൂപഘടനയിലും പ്രവര്‍ത്തനത്തിനും ഉപഭോക്താവിനെ അത്ഭുതപ്പെടുത്താനും ആനന്ദിപ്പിക്കാനുമാണ് ശ്രമിക്കുന്നത്. അതുകൊണ്ടുതന്നെ ‘വിംഗ്’ എല്‍.ജിയുടെ തിരിച്ചുവരവിനെയാണ് സൂചിപ്പിക്കുന്നതെന്നാണ് ടെക്ക് ലോകത്തെ വിദഗ്ദര്‍ പറയുന്നത്. ഈ വര്‍ഷം ഒക്ടോബറില്‍ പുറത്തിറങ്ങുന്ന ഈ ‘5ജി’ സ്മാര്‍ട്ട്ഫോണില്‍ ഒരു പ്രിമിയം ഫോണിന് ആവശ്യമായ എല്ലാവിധ ഫീച്ചറുകളുമുണ്ട്.
