കലാവധി തീരാൻ പോകുന്ന മോറട്ടോറിയം ഇടപാടുകാർ ചെയ്യേണ്ട കാര്യങ്ങൾ
വിവിധ ലോണുകൾ എടുത്തിട്ടുള്ളവരിൽ പലര്‍ക്കും കൊവിഡ് കാലത്തെ ലോൺ തിരിച്ചടവ് തലവേദന ആയിരുന്നു. മാര്‍ച്ച് 1 മുതൽ ആഗസ്റ്റ് 31 വരെ ആറു മാസം വായ്പാ തിരിച്ചടവിന് മോറട്ടോറിയം പ്രഖ്യാപിച്ചിരുന്നത് മിക്കവര്‍ക്കും ആശ്വാസമായി.എന്നാൽ സര്‍ക്കാര്‍ പ്രഖ്യാപിച്ചിരുന്ന മോറട്ടോറിയാം ആഗസ്റ്റ് 31ന് അവസാനിയ്ക്കുകയാണ്. മോറട്ടോറിയം തുടരണോ എന്ന വിഷയത്തിൽ സെപ്റ്റംബര്‍ ഒന്നിന് സുപ്രീം കോടതി വാദം കേൾക്കും.
ഇനി മോറട്ടോറിയം അല്ല വായ്പാ പുനകക്രമീകരണത്തിന് ആണ് ബാങ്കുകൾക്ക് അനുമതി നൽകുക എന്നായിരുന്നു ഔദ്യോഗിക വൃത്തങ്ങൾ ഇതുവരെ സൂചിപ്പിച്ചിരുന്നത്. ഇതനുസരിച്ച് മോറട്ടോറിയം അവസാനിയ്ക്കുന്നതിനാൽ സെപ്റ്റംബര്‍ മുതലാണ് വായ്പാ തുകയും പലിശയും മുടങ്ങിയ മാസങ്ങളിലെ പലിശത്തുകയുൾപ്പെടെ തിരിച്ചടയ്ക്കണ്ടത്.
മാര്‍ച്ച് മുതൽ മോറട്ടോറിയത്തിന് അപേക്ഷ നൽകിയവര്‍ക്ക് ആറു തിരിച്ചടവ് തവണകളാണ് അധികമായി വരിക. മോറട്ടോറിയം കാലയളവിലെ പലിശ തിരിച്ചടവ് ബാക്കി അടയ്ക്കാനുള്ള വായ്പാ തുകയിലാണ് ഉൾപ്പെടുത്തുക എന്ന് വിവിധ റിപ്പോര്‍ട്ടുകൾ സൂചിപ്പിയ്ക്കുന്നു. പലിശ കൂടുതൽ അടയ്‍ക്കേണ്ടതായി വരും എന്നതിനാൽ പ്രതിമാസ തിരിച്ചടവ് കൂടും എന്നതാണ് മോറട്ടോറിയം എടുത്തിട്ടുള്ളവര്‍ക്കു മുന്നിലുള്ള വെല്ലുവിളി.
മോറട്ടോറിയം കാലയളവിൽ പലിശയും കൂട്ടുപലിശയും ഈടാക്കുന്നത് സംബന്ധിച്ച ഹര്‍ജി സുപ്രീം കോടതിയിൽ സമര്‍പ്പിച്ചിട്ടുണ്ടെങ്കിലും ഇതിന് അന്തിമ തീരുമാനം ആയിട്ടില്ല. കൊവിഡ് സാമ്പത്തിക പ്രതിസന്ധിയിൽ നിന്ന് ബിസിനസുകാര്‍ക്ക് ഉൾപ്പെടെ ഇതുവരെ പൂര്‍ണമായി കര കയറാൻ ആയിട്ടില്ലാത്തതിനാൽ വായ്പാ തിരിച്ചടവ് കൂടുന്നത് മിക്കവര്‍ക്കും അധിക ബാധ്യതയാകാൻ ആണ് സാധ്യത.
ശ്രദ്ധിക്കേണ്ട കാര്യങ്ങൾ
മോറട്ടോറിയം നീട്ടിയിട്ടില്ലെങ്കിലും പലിശ ഇളവ് ഇല്ലെങ്കിൽ സെപ്റ്റംബര്‍ മുതൽ വായ്പാ തിരിച്ചടവ് തുടരണം. മോറട്ടോറിയം കാലാവധിയിൽ തിരിച്ചടവ് മുടങ്ങിയാൽ ക്രെഡിറ്റ് സ്കോറിനെ ബാധിയ്ക്കില്ല. എന്നാൽ കാലാവധി കഴിയുമ്പോൾ മുതൽ തിരിച്ചടവ് മുടങ്ങുന്നത് ക്രെഡിറ്റ് സ്കോര്‍ വഷളാക്കും എന്നതിനാൽ ആണിത്. ബാങ്കിൽ നിന്ന് വായ്പാ പലിശയുടെ തിരിച്ചടവ് തുക അറിയാം.
മോറട്ടോറിയം കാലയളവിലെ പലിശ ഒരുമിച്ച് അടയ്ക്കാൻ ആകുന്നവര്‍ക്ക് ഇത് ചെയ്ത് കൂട്ടുപലിശ ഒഴിവാക്കാൻ ആകും.ആവശ്യമെങ്കിൽ വായ്പകൾ പുനക്രമീകരിയ്ക്കാം. മോറട്ടോറിയം കാലാവധിയിലെ പലിശ മാത്രം മറ്റൊരു വായ്പയായി കണക്കാക്കി തിരിച്ചടയ്ക്കാനും ബാങ്കുകൾ സൗകര്യം ഒരുക്കുന്നുണ്ട്.
