കൊവിഡ് ബാധ ഹോമിയോ മരുന്ന് കഴിച്ചവരിൽ കുറവെന്ന് ആരോഗ്യ മന്ത്രി
കൊവിഡ് പ്രതിരോധത്തിനായി സംസ്ഥാന സര്‍ക്കാര്‍ വിതരണം ചെയ്യുന്ന ഹോമിയോ മരുന്ന് കഴിച്ചവരിൽ കൊവിഡ് ബാധ കുറവാണെന്നാണ് ആരോഗ്യമന്ത്രി കെ കെ ശൈലജയുടെ വാക്കുകള്‍.
തിരുവനന്തപുരം: കൊവിഡ് 19ന് ഹോമിയോ പ്രതിരോധമരുന്ന് ഫലപ്രദമാണെന്ന് ആരോഗ്യമന്ത്രി കെ കെ. പ്രതിരോധമരുന്ന് കഴിച്ചവരിൽ കുറച്ച് പേര്‍ക്ക് മാത്രമേ കൊവിഡ് 19 ബാധിച്ചിട്ടുള്ളൂ എന്നും രോഗം ബാധിച്ചവര്‍ക്ക് മൂന്നോ നാലോ ദിവസത്തിനുള്ളിൽ ഭേദപ്പെട്ടെന്നുമാണ് ആരോഗ്യമന്ത്രിയുടെ പ്രതികരണം. അതേസമയം, ഐസിഎംആര്‍ മാര്‍ഗനിര്‍ദേശങ്ങള്‍ അനുവദിക്കാത്തതിനാൽ രോഗം സ്ഥിരീകരിച്ച രോഗികളുടെ ചികിത്സയ്ക്ക് ഹോമിയോ മരുന്ന് ഉപയോഗിക്കാൻ കഴിയില്ലെന്നും മന്ത്രി
കെ കെ ശൈലജ വ്യക്തമാക്കി.
ഹോമിയോ മരുന്നിൻ്റെ ഫലപ്രാപ്തി സംബന്ധിച്ച് നടത്തിയ പഠനത്തിലാണ് ഇക്കാര്യം തെളിഞ്ഞതെന്നാണ് ആരോഗ്യമന്ത്രിയുടെ പ്രതികരണം.”ചിലയിടത്ത് ഒരു പഠനം തന്നെ നടത്തിയിട്ടുണ്ട്. പ്രതിരോധ മരുന്ന് കഴിച്ചയാളുകള്‍ക്ക് കുറച്ചു പേര്‍ക്ക് മാത്രമേ വന്നിട്ടുള്ളൂ. അഥവാ വന്നാൽ തന്നെ വളരെ പെട്ടെന്ന്, മൂന്നോ നാലോ ദിവസം കൊണ്ട് തന്നെ രോഗം ഭേദമാകുന്ന അവസ്ഥ ഉണ്ടായി.” മന്ത്രി പറഞ്ഞു. പത്തനംതിട്ട ഡിഎംഓയും സംവിധായകനുമായ ഡോ. ബിജു ആണ് പഠനം നടത്തിയതെന്നും റിസൾട്ട് തന്നെ കാണിച്ചെന്നും ആരോഗ്യമന്ത്രി വിശദമാക്കി.
അതേസമയം, കൊവിഡ് 19 പോസിറ്റീവായവരുടെ ചികിത്സയ്ക്ക് ഹോമിയോ മരുന്ന് ഉപയോഗിക്കാൻ ഐസിഎംആര്‍ മാര്‍ഗനിര്‍ദേശങ്ങള്‍ മൂലം കഴിയില്ലെന്ന് മന്ത്രി പറഞ്ഞു. “കൊവിഡ് പോസിറ്റീവായവരെ ഹോമിയോ മരുന്ന് ഉപയോഗിച്ച് ചികിത്സിക്കാന്‍ കഴിയില്ല, കാരണം അതിന് ഐസിഎംആറിന്റെ പ്രത്യേക മാര്‍ഗനിര്‍ദേശങ്ങളുണ്ട്. പക്ഷെ രോഗം വരാതിരിക്കാനുള്ള പ്രതിരോധ മരുന്ന് കേരളത്തില്‍ ഉടനീളം വിതരണം ചെയ്തിരുന്നു.” മന്ത്രി കൂട്ടിച്ചേര്‍ത്തു.
ഹോമിയോ മരുന്നായ ആഴ്സനിക് ആൽബ് 30 കൊവിഡ് 19 പ്രതിരോധത്തിനും ചികിത്സയ്ക്കും ഫലപ്രദമാണോ എന്ന് തെളിയിക്കാനാണ് ഡോ. ബിജു അടക്കമുള്ള വിദഗ്ധരുടെ നേതൃത്വത്തിൽ നടത്തിയ പഠനം നടത്തിയത്. പഠന റിപ്പോര്‍ട്ടിൻ്റെ കോപ്പി സമയം മലയാളത്തിന് ലഭിച്ചു.
കൊവിഡ് 19 പ്രതിരോധത്തിന് ഹോമിയോ മരുന്നുകള്‍ അടക്കം ഉപയോഗിക്കാമെന്നാണ് കേന്ദ്ര ആയുഷ് മന്ത്രാലയം മാര്‍ച്ച് ആറിന് പുറത്തിറക്കിയ വിജ്ഞാപനത്തിൽ പറയുന്നത്. അതേസമയം, ഐസിഎംആര്‍ മാര്‍ഗനിര്‍ദേശങ്ങള്‍ പ്രകാരം കൊവിഡ് ചികിത്സയ്ക്ക് അലോപ്പതി മരുന്നുകള്‍ ആണ് ഉപയോഗിക്കുന്നതെന്ന് സംസ്ഥാന സര്‍ക്കാര്‍ ഹൈക്കോടതിയിൽ മുൻപ് വ്യക്തമാക്കിയിരുന്നു.
