കേരളത്തിന് കേന്ദ്രത്തിന്റെ തിരുത്ത്: SSLC, PLUS 2 പരീക്ഷകളില്‍ വീണ്ടും മാറ്റം, വിദ്യാര്‍ത്ഥികള്‍ ആശങ്ക!
എസ്‌എസ്‌എല്‍സി, പ്ലസ് ടു ഉള്‍പ്പെടെ സംസ്ഥാനത്തു പ്രഖ്യാപിച്ച പരീക്ഷകള്‍ പൂര്‍ണമായും മാറ്റിവച്ചു. മുഖ്യമന്ത്രി പിണറായി വിജയന്‍റെ അധ്യക്ഷതയില്‍ ഇന്ന് ചേര്‍ന്ന മന്ത്രിസഭാ യോഗത്തിലാണ് തീരുമാനം. മാറ്റി വച്ച പരീക്ഷകള്‍ ജൂണ്‍ ആദ്യ വാരം നടത്താനാണ് ഇപ്പോഴത്തെ തീരുമാനം.
ലോക്ക്ഡൗണ്‍ നീട്ടിയാലും ജൂണ്‍ ആദ്യവാരം പരീക്ഷകള്‍ നടത്തുന്നതിന് ഇളവുകള്‍ നല്‍കാമെന്ന് കേന്ദ്രം ഉറപ്പ് നല്‍കിയ സാഹചര്യത്തിലാണ് തീരുമാനമെന്നാണ് അറിയുന്നത്. ലോക്ക്ഡൗണ്‍ കാലത്ത് പരീക്ഷകള്‍ നടത്തരുതെന്നാണ് കേന്ദ്ര മാര്‍ഗനിര്‍ദേശം.
നാലാം ലോക്ക്ഡൗണിലും ഇക്കാര്യത്തില്‍ ഇളവ് ഉണ്ടായിരുന്നില്ല.
പ്രതിപക്ഷം ഉള്‍പ്പെടെ പരീക്ഷ മാറ്റിവയ്ക്കണമെന്ന് ആവശ്യപ്പെട്ടിട്ടും പാറപോലെ ഉറച്ചുനിന്ന മുഖ്യമന്ത്രി ഇന്ന് തീരുമാനം മാറ്റുകയായിരുന്നു. മുന്‍നിശ്ചയിച്ച പ്രകാരം പരീക്ഷ നടത്താന്‍ എല്ലാ തയാറെടുപ്പുകളും നടത്തിയതിനു ശേഷമാണ് പിന്‍മാറ്റം. ആവശ്യമായ എല്ലാ സുരക്ഷാക്രമീകരണങ്ങളും ഒരുക്കി പരീക്ഷ നടത്തുമെന്നായിരുന്നു ചൊവ്വാഴ്ച നടത്തിയ വാര്‍ത്താ സമ്മേളനത്തില്‍പോലും മുഖ്യമന്ത്രി പറഞ്ഞത്.
മറ്റു ജില്ലകളില്‍ കുടുങ്ങിയ വിദ്യാര്‍ഥികള്‍ക്കു പരീക്ഷയ്ക്ക് എത്താന്‍ ബസുകള്‍ ഉള്‍പ്പെടെ ക്രമീകരണങ്ങളാണ് ഏര്‍പ്പെടുത്തിയത്. പരീക്ഷാ കേന്ദ്രം മാറ്റുന്നതിന് വിദ്യാര്‍ഥികളില്‍നിന്ന് ഓണ്‍ലൈന്‍ അപേക്ഷകളും സ്വീകരിച്ചിരുന്നു. എന്നാല്‍ പരീക്ഷ നടത്തരുതെന്നായിരുന്നു പ്രതിപക്ഷം ആവശ്യപ്പെട്ടത്. സിബിഎസ്‌ഇ പരീക്ഷ ജൂലൈയില്‍ മാത്രം നടത്തുന്ന പശ്ചാത്തലത്തില്‍ എസ്‌എസ്‌എല്‍സി ഉള്‍പ്പെടെയുള്ള പരീക്ഷകള്‍ ഉടനടി നടത്തരുതെന്നു പ്രതിപക്ഷ നേതാക്കള്‍ ഇന്നലെ ആവശ്യപ്പെട്ടു.
