ചൈന ഉള്‍പ്പടെ അയല്‍ രാജ്യങ്ങളില്‍ നിന്നും നേരിട്ടുള്ള വിദേശനിക്ഷേപത്തിന് കര്‍ശന നിയന്ത്രണവുമായി കേന്ദ്രസര്‍ക്കാര്‍!
ന്യൂഡല്‍ഹി: ചൈന ഉള്‍പ്പടെ അയല്‍ രാജ്യങ്ങളില്‍ നിന്നും നേരിട്ടുള്ള വിദേശനിക്ഷേപത്തിന് കര്‍ശന നിയന്ത്രണവുമായി കേന്ദ്രസര്‍ക്കാര്‍. ചൈനയില്‍ നിന്നുള്ള ചെറുതും വലുതുമായ എല്ലാ വിദേശനിക്ഷേപങ്ങള്‍ക്കും ഇനി കേന്ദ്രസര്‍ക്കാറിന്റെ മുന്‍കൂര്‍ അനുമതി വേണം.
ഏപ്രിലില്‍ അയല്‍രാജ്യങ്ങളില്‍ നിന്നുള്ള വിദേശനിക്ഷേപങ്ങള്‍ക്ക് കേന്ദ്രസര്‍ക്കാര്‍ നിയന്ത്രണം ഏര്‍പ്പെടുത്താന്‍ തീമാനിച്ചിരുന്നു. കേന്ദ്ര അനുമതി ആവശ്യമില്ലാത്ത നിക്ഷേപങ്ങളുടെ പരിധി 10 ശതമാനമായോ 25 ശതമാനമായോ കുറക്കാനായിരുന്നു നീക്കം. എന്നാല്‍, ഇക്കാര്യത്തില്‍ അന്തിമ തീരുമാനം എടുത്തിരുന്നില്ല.
എന്നാല്‍, ആറ് മാസങ്ങളായി നടത്തിയ ചര്‍ച്ചകള്‍ക്കൊടുവില്‍ സര്‍ക്കാര്‍ അനുമതി വാങ്ങേണ്ട നിക്ഷേപങ്ങളുടെ ഉയര്‍ന്ന പരിധിയും താഴ്ന്ന പരിധിയും നിശ്ചയിക്കേണ്ടെന്നാണ് കേന്ദ്രസര്‍ക്കാര്‍ തീരുമാനം.അയല്‍ രാജ്യങ്ങളില്‍ നിന്നുള്ള എല്ലാ നിക്ഷേപങ്ങള്‍ക്കും കേന്ദ്രസര്‍ക്കാറിെന്‍റ മുന്‍കൂര്‍ അനുമതി വാങ്ങണം. സിംഗപ്പൂര്‍, മൗറിഷ്യസ് തുടങ്ങിയ രാജ്യങ്ങള്‍ വഴി ചൈനീസ് നിക്ഷേപം എത്താതിരിക്കാനാണ് ചൈനക്ക് പുറമേ മറ്റ് അയല്‍ രാജ്യങ്ങളെ കൂടി പട്ടികയില്‍ ഉള്‍പ്പെടുത്തിയത്. പേടിഎം, സോമാറ്റോ, ബിഗ്ബാസ്കറ്റ് തുടങ്ങി പല ഇന്ത്യന്‍ കമ്ബനികള്‍ക്കും ചൈനീസ് നിക്ഷേപമുണ്ട്. ഇതുമായി ബന്ധപ്പെട്ട നിരവധി അപേക്ഷകള്‍ കേന്ദ്രസര്‍ക്കാറിന്റെ പരിഗണനയിലാണ്.
