ടീസറെത്തി! വൺപ്ലസ് ഫിറ്റ്നസ് ബാൻഡ് വിപണിയിലേക്ക്  

ചൈനീസ് പ്രീമിയം സ്മാർട്ട്ഫോൺ നിർമ്മാതാക്കളായ വൺപ്ലസ്സിനെ സംബന്ധിച്ച് 2020 ഒരു നിർണായക വർഷം ആയിരുന്നു. പ്രീമിയം സ്മാർട്ഫോണുകൾക്ക് പുറമെ മിഡ്റേഞ്ച് സ്മാർട്ട്ഫോൺ ആയ നോർഡ് അവതരിപ്പിച്ച വൺപ്ലസ് കഴിഞ്ഞ വർഷം തന്നെ സ്മാർട്ട് ടിവി സെഗ്മെന്റിലേക്കും കാലെടുത്തു വച്ചു. അവിടെയും അവസാനിക്കുന്നില്ല വൺപ്ലസ്സിന്റെ പുത്തൻ സെഗ്മെന്റുകളിലേക്കുള്ള വരവ്. ഫിറ്റ്നസ് ബാൻഡ് വിപണിയിലേക്കാണ് വൺപ്ലസ് അടുത്ത കാൽവയ്പ്പ്.

ഈ മാസം തന്നെ വൺപ്ലസ് ഫിറ്റ്നസ് ബാൻഡ് (യഥാർത്ഥ പേര് വെളിപ്പെടുത്തിയിട്ടില്ല) അവതരിപ്പിക്കും എന്ന് വ്യക്തമാക്കി കമ്പനി ടീസർ പുറത്തുവിട്ടു. ടിപ്പ്സ്റ്റർമാർ നൽകുന്ന വിവരങ്ങൾ അനുസരിച്ച് ഈ മാസം 11-ന് ആയിരിക്കും വൺപ്ലസ് ഫിറ്റ്നസ് ബാൻഡിന്റെ അവതരണം. ‘ഫിറ്റ്നസിന്റെ പുതിയ മുഖം’, ‘ഉടൻ വരുന്നു’ തുടങ്ങിയ ഹാഷ് റ്റാഗുകൾ സഹിതം പുറത്തുവിട്ടിരിക്കുന്നത് ടീസർ ചിത്രത്തിൽ പക്ഷെ ഫിറ്റ്നസ് ബാൻഡിനെപ്പറ്റി വിവരങ്ങൾ ഒന്നുമില്ല. എങ്കിലും ഷവോമിയുടെ എംഐ ബാൻഡ് സിരീസിന് സമാനമായി ദീർഘ ചതുരാകൃതിയിലുള്ള ഡയൽ ആയിരിക്കും എന്നാണ് വിവരം. ടിപ്പ്സ്റ്റർ മുകുൾ ശർമ്മ നൽകുന്ന വിവരങ്ങളെ അനുസരിച്ച് വിവിധ നിറങ്ങളിലുള്ള (ബ്ലാക്ക്, നേവി, ടാൻജീറിൻ ഗ്രേ) സ്ട്രാപ്പുകളിൽ വൺപ്ലസ് ഫിറ്റ്നസ് ബാൻഡ് ലഭിക്കും.

1.1 ഇഞ്ച് അമോലെഡ് ടച്ച് ഡിസ്പ്ലേ, 24×7 ഹാർട്ട് റേറ്റ് സെൻസർ, സ്പോ 2 ബ്ലഡ് സാച്ചുറേഷൻ മോണിറ്ററിംഗ്, 3-ആക്സിസ് ആക്സിലറോമീറ്റർ, ഗൈറോസ്കോപ്പ്, ബ്ലൂടൂത്ത് 5.0, ഐപി 68 ഡസ്റ്റ്, വാട്ടർ റെസിസ്റ്റൻസ് റേറ്റിംഗ് എന്നിവ സഹിതമാണ് വൺപ്ലസ് ഫിറ്റ്നസ് ബാൻഡ് വിപണിയിലെത്തുക എന്നാണ് ഇതുവരെയുള്ള റിപോർട്ടുകൾ. 13-ൽ അധികം എക്‌സേർസൈസ് മോഡുകളും ബാൻഡിലുണ്ടാവും. സ്ലീപ്പ് ട്രാക്കിംഗ് ഫീച്ചറും ബാൻഡിലുണ്ടാവും.

വൺപ്ലസ് ബാൻഡ് 50 മീറ്റർ വരെ വാട്ടർപ്രൂഫ് ആണെന്നും 100 എംഎഎച്ച് ബാറ്ററി 14 ദിവസം വരെ സ്റ്റാൻഡ് ബൈ ടൈം നൽകുമെന്നും മുകുൾ ശർമ്മ വ്യക്തമാക്കുന്നു. 40.4×17.6×11.45 എംഎം വലിപ്പവും 10.3 ഗ്രാം ഭാരവും (ട്രാക്കർ മാത്രം) വൺപ്ലസ് ഫിറ്റ്നസ് ബാൻഡിനുണ്ടാവും.
ഒപ്പോ, റിയൽമി, എംഐ ഫിറ്റ്നസ് ബാന്റുകളോട് മത്സരിക്കാൻ എത്തുന്ന വൺപ്ലസ് ഫിറ്റ്നസ് ബാൻഡിന് ഏകദേശം Rs. 2,500 രൂപയാണ് വില പ്രതീക്ഷിക്കുന്നത്.