ട്വിറ്ററിന് മണി കെട്ടുമോ കൂ ആപ്പ്? തനി ഇന്ത്യൻ പകരക്കാരനെ പരിചയപ്പെടാം
കർഷക സമരവുമായി ബന്ധപ്പെട്ട് 1178-ഓളം പാകിസ്ഥാനി – ഖാലിസ്ഥാനി ബന്ധമുള്ള അക്കൗണ്ടുകൾ മരവിപ്പിക്കണമെന്ന കേന്ദ്രസർക്കാർ നിർദ്ദേശം ഇതുവരെ ട്വിറ്റർ പ്രാബല്യത്തിൽ വരുത്താൻ കൂട്ടാക്കാത്ത സാഹചര്യത്തിൽ ട്വിറ്ററിന് സമാനമായ തനി ഇന്ത്യൻ ആപ്പ് കൂ ശ്രദ്ധ നേടുന്നു. ട്വിറ്ററിന് സമാനമായ ഫീച്ചറുകളാണ് കേന്ദ്ര സർക്കാർ കഴിഞ്ഞ വർഷം നടത്തിയ ആത്മനിർഭർ ഭാരത് ആപ്പ് ചാലഞ്ചിൽ ഒന്നാം സ്ഥാനം നേടിയ കൂ ആപ്പ് ഒരുക്കുന്നത്. എന്നാൽ പിന്നീട് കാര്യമായ വിവരങ്ങൾ ഒന്നുമില്ലാതിരുന്ന കൂ ആപ്പിനെ കഴിഞ്ഞ ദിവസങ്ങളിലാണ് ട്വിറ്ററിന് ബദലായി വളർത്തിക്കൊണ്ടുവരാൻ കേന്ദ്ര സർക്കാർ സർക്കാർ ശ്രമം ആരംഭിച്ചത്. ഈ നീക്കത്തിന്റെ ഭാഗമായി കേന്ദ്ര മന്ത്രിമാരായ പിയുഷ് ഗോയൽ, രവി ശങ്കർ പ്രസാദ്, മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ, മുൻ ക്രിക്കറ്റർ അനിൽ കുംബ്ലെ എന്നിങ്ങനെ നിരവധി പേരാണ് കൂ ആപ്പിൽ അക്കൗണ്ട് ആരംഭിച്ചിരിക്കുന്നത്. കൂ ആപ്പിനെപ്പറ്റി വിശദമായറിയാം.
അപ്രമേയ രാധാകൃഷ്ണ, മായങ്ക് ബിദവാട്ക എന്നിവർ ചേർന്ന് കഴിഞ്ഞ മാർച്ചിൽ തയ്യാറാക്കിയതാണ് കൂ ആപ്പ്. ടാക്സി അഗ്ഗ്രഗേറ്റർ ആപ്പ് ആയിരുന്ന ടാക്സി-ഫോർ-ഷുവർ സ്ഥാപകനാണ് അപ്രമേയ രാധാകൃഷ്ണ. മായങ്ക് ബിദവാട്ക അവിടത്തെ മുൻ കൺസൾട്ടന്റും. ബോംബിനെറ്റ് ടെക്നോളോജിസ് പ്രൈവറ്റ് ലിമിറ്റഡ് ആണ് കൂ ആപ്പിന്റെ മാതൃകമ്പനി. പ്രശസ്തമായ അമേരിക്കൻ ചോദ്യ ഉത്തര വെബ്‌സൈറ്റ് ആയ കോറയുടെ (Quora) ഇന്ത്യൻ ബദൽ വോക്കൽ ( Vokal) അവതരിപ്പിച്ചത് ഇതേ കമ്പനിയാണ്. ബ്ലും വെഞ്ച്വേഴ്‌സ്, കാലാരി ക്യാപിറ്റൽ, ആക്സിൽ പാർട്നെർസ് ഇന്ത്യ എന്നിവയാണ് പ്രധാന നിക്ഷേപകർ. പുതിയ ഫയലിംഗ് അനുസരിച്ച് മുൻ ഇൻഫോസിസ് സിഎഫ്ഓ ടിവി മോഹൻദാസ് പൈയുടെ 3one4 ക്യാപിറ്റലും നിക്ഷേപം നടത്തിയിട്ടുണ്ട്.
ഉപയോക്താക്കൾക്ക് തങ്ങളുടെ അഭിപ്രായങ്ങൾ, ചിത്രങ്ങൾ, ചെറിയ വിഡിയോകൾ എന്നിവ രേഖപെടുത്താവുന്ന ട്വിറ്ററിന് സമാനമായ മൈക്രോബ്ലോഗിംഗ് സേവനമാണ് കൂ ആപ്പ് ഒരുക്കുന്നത്.
- ട്വിറ്ററിന് പോസ്റ്റ് ചെയ്യാവുന്ന അക്ഷരങ്ങളുടെ പരിധി 280 ആണെങ്കിൽ കൂ ആപ്പിൾ ഇത് 400 ആണ്. ഇത് കൂടാതെ 1 മിനിറ്റ് വരെ ദൈർഖ്യമുള്ള ഓഡിയോ, വിഡിയോകൾ കൂ ആപ്പിൽ പോസ്റ്റ് ചെയ്യാം. ട്വിറ്ററിൽ പോസ്റ്റ് ചെയ്യുന്നവയെ ട്വീറ്റ് എന്ന് വിളിക്കുന്നതുപോലെ കൂ ആപ്പിൽ പോസ്റ്റ് ചെയ്യുന്നവയെ കൂവ്സ് എന്ന് വിളിക്കുന്നത്.
- ട്വിറ്റർ ഇംഗ്ലീഷിൽ മാത്രമാണ് ലഭിക്കുന്നതെങ്കിൽ, കൂ ആപ്പ് ഇംഗ്ലീഷ് കൂടാതെ പ്രാദേശിക ഭാഷകളെയും പ്രോത്സാഹിപ്പിക്കുന്നുണ്ട്. ഇപ്പോൾ കന്നഡ, തമിഴ്, തെലുങ്ക്, ഹിന്ദി, ഇംഗ്ലീഷ് ഭാഷകളിലാണ് കൂ ആപ്പ് ലഭിക്കുന്നത്. അധികം താമസമില്ലതെ മറാത്തി, ബംഗ്ലാ, ഗുജറാത്തി, മലയാളം, ഒറിയ, പഞ്ചാബി, ആസാമീസ് പതിപ്പുകൾ ലഭിക്കും എന്നും കൂ ആപ്പ് വ്യക്തമാക്കുന്നു.
- പീപ്പിൾ ഫീഡ്, 1-1 മെസ്സേജിങ്, ഇംഗ്ലീഷിൽ നിന്നും പ്രാദേശിക ഭാഷ കീബോർഡ്, പ്രാദേശിക ഭാഷയിലുള്ള ന്യൂസ് ഫീഡ്, ഹൈപ്പർ ലോക്കൽ ഹാഷ് ടാഗ് എന്നിവയാണ് കൂ ആപ്പിന്റെ മറ്റുള്ള സവിശേഷതകൾ.
ആൻഡ്രോയിഡ്, ഐഓഎസ് ആപ്പ് ആയും വെബ്സൈറ്റിലൂടെയും കൂ ആപ്പ് പ്രവർത്തിപ്പിക്കാം. ഗൂഗിൾ പ്ലെ സ്റ്റോറിൽ Koo എന്ന് സെർച്ച് ചെയ്താൽ മാത്രം മതി. “കൂ: കണക്ട് വിത്ത് ഇന്ത്യൻസ് ഇൻ ഇന്ത്യൻ ലൻഗുവേജസ്” എന്നാണ് ഗൂഗിൾ പ്ലെ സ്റ്റോറിൽ ആപ്പിന്റെ പൂർണമായ പേര്. ഐഓഎസ് ആപ്പ് സ്റ്റോറിൽ Koo എന്ന് മാത്രമെയുള്ളൂ. ഡൗൺലോഡ് ചെയ്യുമ്പോൾ ആപ്പ് നിർമാതാക്കളുടെ ഭാഗത്ത് ബോംബിനെറ്റ് ടെക്നോളോജിസ് പ്രൈവറ്റ് ലിമിറ്റഡ് തന്നെയല്ലേ എന്നുറപ്പ് വരുത്തുക
ഇതാദ്യമായല്ല ട്വിറ്ററിന് ബദൽ എന്ന നിലയിൽ ഒരു ഇന്ത്യൻ ആപ്പ് ശ്രദ്ധ നേടുന്നത്. നവംബറിൽ ടൂറ്റെർ ശ്രദ്ധ നേടിയിരുന്നു. ഇന്റർഫെയ്‌സും, പ്രവർത്തന രീതിയും, നിറങ്ങൾ പോലും ട്വിറ്ററിനോട് ഏറെക്കുറെ സമാനമാണ്. ചുരുക്കത്തിൽ ട്വിറ്ററിന്റെ പാരഡി പതിപ്പാണ് ടൂറ്റെർ എന്നെ ഒറ്റ നോട്ടത്തിൽ തോന്നൂ. നീല നിറത്തിലുള്ള ശംഖ് ആണ് ടൂറ്റെറിൻ്റെ ലോഗോ. സ്വദേശി ആന്ദോളൻ 2.0 എന്ന പ്രാദേശിക പ്രവർത്തനങ്ങളുടെ ഭാഗമായാണ് ടൂറ്റെർ തയ്യാറാക്കിയിരിക്കുന്നത് എന്നാണ് നിർമാതാക്കൾപറയുന്നത്. തെലങ്കാനയിലെ ശ്രീസിറ്റിയിൽ പ്രവർത്തിക്കുന്ന ടൂറ്റെർ പ്രൈവറ്റ് ലിമിറ്റഡ് ആണ് ആപ്പിന്റെ പിന്നിൽ എന്നാണ് ഗൂഗിൾ പ്ലേയ്‌ സ്റ്റോർ വ്യക്തമാക്കുന്നത്.
പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിങ്, സദ്ഗുരു, രാഹുൽ ഗാന്ധി എന്നിവർക്കെല്ലാം ടൂറ്റെറിൽ വെരിഫൈഡ് അക്കൗണ്ടുണ്ട്. ബിജെപിയുടെ ടൂറ്റെർ അക്കൗണ്ടും വെരിഫൈഡ് ആണ്. സിനിമ താരങ്ങളായ ദീപിക പദുകോൺ, അക്ഷയ് കുമാർ, അമിതാഭ് ബച്ചൻ, ഷാറുഖ് ഖാൻ, സൽമാൻ ഖാൻ, അഭിഷേക് ബച്ചൻ, സംവിധായകൻ കരൺ ജോഹർ, ക്രിക്കറ്റ് താരം വിരാട് കോലി എന്നിവരാണ് ടൂറ്റെർ അക്കൗണ്ടുള്ള മറ്റുള്ള പ്രമുഖർ.
