പാൽ വിതരണവും തുടങ്ങി ജിയോ മാർട്ട് !
മുംബൈ: രാജ്യത്തെ രണ്ട് വമ്പൻ നഗരങ്ങളായ ചെന്നൈയിലും ബംഗളൂരുവിലും റിലയന്‍സിന്‍റ ഓണ്‍ലൈന്‍ റീട്ടയില്‍ യൂണിറ്റായ ജിയോ മാര്‍ട്ട് സബ്സ്ക്രിപ്ഷന്‍ അടിസ്ഥാനത്തില്‍ ദിവസേന പാല്‍ വിതരണം തുടങ്ങി. പാലിന് പുറമേ മുട്ട, റൊട്ടി തുടങ്ങിയ അവശ്യവസ്തുക്കളും കമ്പനി ഈ സംരംഭത്തിലൂടെ വിതരണം ചെയ്യും. ഇരു നഗരങ്ങളിലെയും ലഭ്യമായ പിന്‍കോഡുകളിലാണ് നിലവില്‍ വിതരണം. നവംബര്‍ 14ന് ദീപാവലിയോടനുബന്ധിച്ച്‌ രാജ്യമൊട്ടാകെ പാല്‍വിതരണം വ്യാപിപ്പിക്കാനൊരുങ്ങുകയാണ് ജിയോ മാര്‍ട്ടന്നും റിപ്പോര്‍ട്ടുകളുണ്ട്. എന്നാല്‍, ഇതുമായി ബന്ധപ്പെട്ട് അവര്‍ ഇതുവരെ പ്രതികരിച്ചിട്ടില്ല.
അതേസമയം, രാജ്യത്ത് പാല്‍വിതരണം എന്ന ആശയവുമായി മുന്നോട്ടുവരുന്ന ആദ്യ കമ്ബനിയല്ല, ജിയോമാര്‍ട്ട്.നേരത്തെ സ്വിഗ്ഗിയുടെ സൂപ്പര്‍ ഡൈലി, ബിഗ് ബാസ്കറ്റിന്റെ ബിബി ഡൈലി, മില്‍ക് ബാസ്കറ്റ് എന്നിവ ഈ മേഖലയില്‍ പ്രവര്‍ത്തിക്കുന്നുണ്ട്.
ജൂലൈയില്‍ റിലയന്‍സ് എജിഎമ്മില്‍ മുകേഷ് അംബാനി ജിയോ മാര്‍ട്ടിന് ദിവസം 250,000 ഓര്‍ഡറുകള്‍ ലഭിക്കുന്നതായി അവകാശപ്പെട്ടിരുന്നു.പാല്‍ വിതരണം അടക്കമുള്ള പുതിയ ആശയങ്ങളിലൂടെ അത് ഗണ്യമായി ഉയര്‍ത്താനുള്ള ശ്രമത്തിലാണ് കമ്പനി. മാക്സിമം റീട്ടയില്‍ പ്രൈസില്‍ നിന്നും അഞ്ച് ശതമാനം കുറച്ചാണ് അംബാനിയുടെ കമ്പനി നിലവില്‍ ഉത്പന്നങ്ങള്‍ വില്‍ക്കുന്നത് എന്നതും അവര്‍ക്ക് വലിയ സ്വീകാര്യതയുണ്ടാക്കിയിട്ടുണ്ട്. പാല്‍ വിതരണത്തിലും അത്തരം ഡിസ്കൗണ്ടുകള്‍ ഉണ്ടാവുമോ എന്നത് അറിയാന്‍ ഔദ്യോഗിക പ്രഖ്യാപനത്തിന് വേണ്ടി കാത്തിരിക്കേണ്ടി വരും.
