ഫസ്റ്റ് ബെലിൽ തിങ്കൾ മുതൽ പുതിയ സമയക്രമം!  

തിരുവനന്തപുരം:കൈറ്റ് വിക്ടേഴ്സിലൂടെയുള്ള ഫസ്റ്റ്ബെല്‍ 2.0 ഡിജിറ്റല്‍ ക്ലാസുകളില്‍ പ്ലസ് വണ്‍ റിവിഷന്‍ ക്ലാസുകളുടെ സംപ്രേഷണം 15ന് പൂര്‍ണമാകും. ഒന്നുമുതല്‍ 10 വരെയുള്ള ഇംഗ്ലീഷ് മീഡിയം ക്ലാസുകള്‍ ശനിയാഴ്ച പ്രത്യേകമായി സംപ്രേഷണം ചെയ്യും. നിശ്ചിത എണ്ണം മലയാളം മീഡിയം ക്ലാസുകളുടെ തുടര്‍ച്ചയായാണ് ആ ഭാഗങ്ങള്‍ ഉള്‍പ്പെടുന്ന ഇംഗ്ലീഷ് മീഡിയം ക്ലാസുകള്‍ സംപ്രേഷണം ചെയ്യുക. ഞായറാഴ്ച ഭാഷാ വിഷയങ്ങളും ഒരു കുട്ടിക്ക് പരമാവധി ഒരു ക്ലാസ് എന്ന തരത്തില്‍ സംപ്രേഷണം ചെയ്യും.ആറ് മുതല്‍- 10 വരെയുള്ള ക്ലാസുകള്‍ക്ക് തിങ്കളാഴ്ചമുതല്‍ ഒരു പിരിയഡ് അധികം ഉണ്ടാകും. ഈ ദിവസങ്ങളില്‍ രാവിലെ എട്ടു മുതല്‍ 10 വരെ പത്താം ക്ലാസും (നാല് ക്ലാസ്) 10 ന് ഒന്നാം ക്ലാസും 10.30-ന് പ്രീ-പ്രൈമറി ക്ലാസും ആയിരിക്കും. 11 മുതല്‍ ഒന്നുവരെ യഥാക്രമം രണ്ടുമുതല്‍ അഞ്ചുവരെയുള്ള ക്ലാസുകള്‍ (ഓരോ ക്ലാസ് വീതം) സംപ്രേഷണം ചെയ്യും.ആറ്, ഏഴ്, എട്ട്, ഒമ്ബത് ക്ലാസുകള്‍ പകല്‍ 1, 2, 3, 4 നാണ് യഥാക്രമം സംപ്രേഷണം ചെയ്യുക. ഭാഷാ വിഷയങ്ങളുടെ സംപ്രേഷണം 5.30-ന് ശേഷമായിരിക്കും.19 മുതല്‍ 23 വരെ ഫസ്റ്റ്ബെല്‍ 2.0 ക്ലാസുകള്‍ക്ക് അവധിയായിരിക്കുമെന്ന് കൈറ്റ് സി ഇ ഒ കെ അന്‍വര്‍ സാദത്ത് അറിയിച്ചു. പ്ലസ് വണ്‍ പൊതുപരീക്ഷയ്ക്ക് മുമ്ബ് കുട്ടികള്‍ക്ക് സംശയനിവാരണത്തിനുള്ള ലൈവ് ഫോണ്‍-ഇന്‍ പരിപാടികള്‍ സംപ്രേഷണം ചെയ്യും. പിന്നീട് പ്ലസ് വണ്‍ പൊതു പരീക്ഷയ്ക്ക് ശേഷമാകും പ്ലസ് ടു ക്ലാസുകള്‍ പുനരാരംഭിക്കുക. ക്ലാസുകളും പ്ലസ് വണ്‍ ഓഡിയോ ബുക്കുകളും സമയക്രമവും firstbell. kite.kerala.gov.in പോര്‍ട്ടലില്‍ ലഭ്യമായിരിക്കും.