ബിഎംഡബ്ള്യു, ആർ 18ൻ്റെ ലോഞ്ച് തിയതി പ്രഖ്യാപിച്ചു
പ്രീമിയം ക്രൂയ്സർ ബൈക്കുകളുടെ രാജാവാണ് അമേരിക്കൻ വാഹന നിർമ്മാതാക്കളായ ഹാർലി ഡേവിഡ്സൺ. എതിരാളികളിൽ പ്രധാനികളായ ബിഎംഡബ്ള്യു മോട്ടോറാഡും ഡ്യൂക്കാട്ടിയും സ്പോർട്സ്, അഡ്വഞ്ചർ, നേക്കഡ് ബൈക്കുകളിൽ ശ്രദ്ധ പതിപ്പിച്ചിരുന്നതുകൊണ്ട് തന്നേ പ്രീമിയം ക്രൂയ്സർ ബൈക്ക് ശ്രേണി ഹാർലിയുടെ കുത്തകയായിരുന്നു. എങ്കിലും ഈ വർഷം ഏപ്രിലിൽ ഒരു ആഡംബര ക്രൂയ്സർ മോഡൽ ഇല്ല എന്ന കോട്ടം തീർത്ത് ബിഎംഡബ്ള്യു മോട്ടോറാഡ് ആർ 18-നെ അവതരിപ്പിച്ചു.
അഞ്ച് മാസത്തിനുള്ളിൽ ആർ 18-നെ ഇന്ത്യയിലും ലോഞ്ച് ചെയ്യാൻ തയ്യാറെടുക്കുകയാണ് ബിഎംഡബ്ള്യു മോട്ടോറാഡ്. ഹാർലിയുടെ മുറത്തിൽ കേറി കൊത്താൻ ആർ 19 ഈ മാസം 18-ന് ഇന്ത്യൻ വിപണിയിലെത്തും.
ഏകദേശം 18 ലക്ഷം വില പ്രതീക്ഷിക്കുന്ന ബിഎംഡബ്ള്യു ആർ 18, ട്രയംഫിന്റെ അടുത്തിടെ വില്പനക്കെത്തിയ റോക്കറ്റ് 3 ജിടിയ്ക്കും ശക്തമായ വെല്ലുവിളി ഉയർത്തും.
1936 മുതൽ 1950 വരെ ബിഎംഡബ്ള്യു ശ്രേണിയിലുണ്ടായിരുന്ന ആർ 5 എന്ന ക്ലാസിക് ബൈക്കിൽ നിന്ന് പ്രചോദനം ഉൾക്കൊണ്ടാണ് ആർ 18 തയ്യാറാക്കിയിരിക്കുന്നത്. ഒരു ക്ലാസിക് ക്രൂയ്സർ ബൈക്കിൽ പ്രതീക്ഷിക്കും വിധം വെള്ള തുള്ളിയെ അനുസ്മരിപ്പിക്കുന്ന പെട്രോൾ ടാങ്ക്, 49 എംഎം ടെലിസ്കോപിക് മുൻ ഫോർക്കുകൾ, വൃത്താകൃതിയിലുള്ള ഹെഡ്‍ലൈറ്റ്, നീളം കൂടിയ പിൻ മഡ്ഗാർഡുകൾ എന്നിവ ചേർന്നതാണ് ആർ 18-ന്റെ ഡിസൈൻ ഭാഷ്യം.
ലുക്കിൽ മാത്രമാണ് ബിഎംഡബ്ള്യു ആർ 18 ക്ലാസിക്. ബാക്കി എല്ലാകാര്യത്തിലും ആധുനികനാണ് ആർ 18. 1,802 സിസി എയർ & ഓയിൽ കൂൾഡ് എൻജിൻ ആണ് ആർ 18-ന്. 4,750 ആർ‌പി‌എമ്മിൽ 91 ബിഎച്ച്പി പവറും 3,000 ആർ‌പി‌എമ്മിൽ 157 എൻ‌എം ടോർക്കുമാണ് ഈ എൻജിന്റെ ഔട്പുട്ട്. റിവേഴ്‌സ് ഗിയറുള്ള ആറ് സ്പീഡ് കോൺസ്റ്റന്റ് മെഷ് ട്രാൻസ്മിഷൻ ആണ് ആർ 18-ന്. റൈൻ, റോൾ, റോക്ക് എന്നിങ്ങനെ 3 റൈഡിങ് മോഡുകൾ, നിഷ്ക്രീയമാകാവുന്ന ഓട്ടോമാറ്റിക് സ്റ്റെബിലിറ്റി കണ്ട്രോൾ, എൻജിൻ ഡ്രാഗ് ടോർക്ക് കണ്ട്രോൾ എന്നിവയാണ് മറ്റുള്ള റൈഡിങ് എയ്ഡുകൾ.
ഇതുകൂടാതെ ഹിൽ-സ്റ്റാർട്ട് അസിസ്ററ്, ഹീറ്റഡ് ഗ്രിപ്, കോർണേറിങ് ലൈറ്റുകൾ എന്നിവ ഓപ്ഷണലായി തിരഞ്ഞെടുക്കാം.
ഫസ്റ്റ് എഡിഷൻ, സ്റ്റാൻഡേർഡ് എന്നിങ്ങനെ രണ്ട് മോഡലുകളിൽ ആണ് ബിഎംഡബ്ള്യു ആർ 18 വില്പനക്കെത്തുക. ഇതിൽ ഫസ്റ്റ് എഡിഷൻ കൂടുതൽ ക്ലാസിക് ആണ്. കൂടുതൽ ക്രോം ഘടകങ്ങൾ, ബ്ലാക്ക്സ്റ്റോം മെറ്റാലിക് പെയിന്റ്, ഫസ്റ്റ് എഡിഷൻ ബാഡ്ജിങ് ഉള്ള സീറ്റ്, കോപ്പർ സ്‌ക്രൂകൾ എന്നിവയാണ് ഫസ്റ്റ് എഡിഷൻ സ്പെഷ്യൽ ആക്കുന്നത്. ഈ മോഡലിന് വിലയും കൂടുതൽ ആയിരിക്കും.
