മൂന്നു മുതല്‍ 11 വരെ പ്രായമുള്ള കുട്ടികള്‍ക്ക് വാക്‌സിന്‍ നല്‍കാന്‍ അനുമതി നല്‍കി ബഹ്‌റൈന്‍.
മനാമ: മൂന്നു മുതല്‍ 11 വരെ പ്രായമുള്ള കുട്ടികള്‍ക്ക് രണ്ട് ഡോസ് സിനോഫാം വാക്‌സിന്‍ നല്‍കാന്‍ അനുമതി നല്‍കി ബഹ്‌റൈന്‍. ഈ പ്രായത്തിലുള്ള പ്രതിരോധ ശേഷി കുറഞ്ഞ കുട്ടികള്‍ക്ക് വാക്‌സിന്‍ നല്‍കാനാണ് കൊവിഡ് പ്രതിരോധത്തിനായുള്ള ടാസ്‌ക് ഫോഴ്‌സ് അനുമതി നല്‍കിയിരിക്കുന്നത്. അതേസമയം, 11 മുതല്‍ 17 വരെ പ്രായമുള്ള കുട്ടികള്‍ക്ക് സിനോഫാമിനു പുറമെ, ഫൈസര്‍ വാക്‌സിന്‍ നല്‍കാനും അനുമതി നല്‍കി. ഇവയ്ക്കുള്ള രജിസ്‌ട്രേഷന്‍ ഉടന്‍ തുടങ്ങും.പ്രതിരോധ ശേഷി കുറഞ്ഞ കുട്ടികള്‍ക്ക് വാക്‌സിന്‍മൂന്നിനും 11നും ഇടയില്‍ പ്രായമുള്ള കുട്ടികളില്‍ ശ്വാസകോശവുമായി ബന്ധപ്പെട്ട പ്രശ്‌നങ്ങള്‍, ഹൃദയ സംബന്ധമായ രോഗങ്ങള്‍, പ്രമേഹം, കാന്‍സര്‍, ഡൗണ്‍ സിന്‍ഡ്രോം, അമിതവണ്ണം, വിഷാദരോഗം, അലര്‍ജി തുടങ്ങിയവയെ തുടര്‍ന്ന് പ്രതിരോധ ശേഷി കുറവായവര്‍ക്കാണ് ആദ്യഘട്ടത്തില്‍ രണ്ട് ഡോസ് വാക്‌സിന്‍ നല്‍കുക. ഇതുമായി ബന്ധപ്പെട്ട് നടത്തിയ പഠനത്തിന്റെ അടിസ്ഥാനത്തിലാണ് തീരുമാനമെന്ന് ടാസ്‌ക് ഫോഴ്‌സ് അധികൃതര്‍ അറിയിച്ചു.ഈ പ്രായത്തിലുള്ള കുട്ടികളില്‍ വാക്‌സിന്‍ വിതരണം വേഗത്തിലാക്കണമെന്നും അധികൃതര്‍ അറിയിച്ചു. കുട്ടികളില്‍ പലരിലും ലക്ഷണങ്ങളില്ലാതെയാണ് കൊവിഡ് ബാധ റിപ്പോര്‍ട്ട് ചെയ്യപ്പെടുന്നത്. പോസിറ്റീവ് ആയി നാലു ദിവസം വരെ ഇവരില്‍ നിന്ന് മറ്റുള്ളവരിലേക്ക് രോഗം പകരാനുള്ള സാധ്യതയുണ്ട്. വീട്ടിലെ പ്രായമായവര്‍ക്ക് ഉള്‍പ്പെടെ കുട്ടികളില്‍ നിന്ന് കൊവിഡ് ബാധയുണ്ടാവാനുള്ള സാധ്യത ഏറെയാണെന്നും അധികൃതര്‍ നിരീക്ഷിച്ചു.അതിനിടെ, രണ്ട് ഡോസ് വാക്‌സിന്‍ എടുത്ത് ആറു മാസം പിന്നിട്ടവര്‍ക്ക് ബൂസ്റ്റര്‍ ഡോസ് നല്‍കാനും ടാസ്‌ക് ഫോഴ്‌സ് തീരുമാനമെടുത്തു. ഫൈസര്‍, ഓക്‌സ്‌ഫോഡ് വാക്‌സിനുകളില്‍ ഏതെങ്കിലും ഒന്നിന്റെ രണ്ട് ഡോസുകളും സ്വീകരിച്ച 60 വയസ്സ് കഴിഞ്ഞവര്‍ക്കും പ്രതിരോധ ശേഷി കുറഞ്ഞവര്‍ക്കുമാണ് ആദ്യഘട്ടത്തില്‍ ബൂസ്റ്റര്‍ ഡോസ് നല്‍കുക. ബൂസ്റ്റര്‍ ഡോസായി ഫൈസര്‍ വാക്‌സിനോ അല്ലെങ്കില്‍ ആദ്യ രണ്ട് ഡോസുകള്‍ എടുത്ത അതേ വാക്‌സിനോ സ്വീകരിക്കാം. മൂന്നാം ഡോസ് രോഗപ്രതിരോധ ശേഷി വലിയ തോതില്‍ ഉയര്‍ത്തുന്നുവെന്ന് പഠനങ്ങളില്‍ വ്യക്തമായതിന് തുടര്‍ന്നാണ് തീരുമാനം. രണ്ടാം ഡോസ് വാക്‌സിന്‍ എടുത്ത് ആറു മാസം കഴിഞ്ഞവരുടെ ബിവെയര്‍ ആപ്പിലെ സ്റ്റാറ്റസ് ഒക്ടോബര്‍ ഒന്നു മുതല്‍ പച്ചയില്‍ നിന്ന് മഞ്ഞയിലേക്ക് മാറും. ബൂസ്റ്റര്‍ ഡോസ് എടുത്താല്‍ മാത്രമേ അത് തിരികെ പച്ചയായി മാറുകയുള്ളൂ എന്നും അധികൃതര്‍ വ്യക്തമാക്കി.
