യമഹ പരിഷ്ക്കരിച്ച 2021 മോഡല്‍ R3 വിപണിയില്‍ എത്തി!
ജാപ്പനീസ് ഇരുചക്രവാഹന നിര്‍മ്മാതാക്കളായ യമഹ പരിഷ്ക്കരിച്ച 2021 മോഡല്‍ R3 വിപണിയില്‍ അവതരിപ്പിച്ചു. ജാപ്പനീസ് വിപണിയിലാണ് വാഹനത്തിന്‍റെ അവതരണം എന്ന് ബൈക്ക് വാലെ റിപ്പോര്‍ട്ട് ചെയ്യുന്നു. 2021 ജനുവരി 15 മുതല്‍ മോട്ടോര്‍സൈക്കിള്‍ വില്‍പ്പനയ്‌ക്കെത്തും. പുതുക്കിയ മോഡലിന് പുതിയ കളര്‍ ഓപ്ഷനുകള്‍ ലഭിച്ചേക്കും.2021 യമഹ R3 പതിപ്പിന് 687,500 ജാപ്പനീസ് യെന്നാണ് (ഏകദേശം 4.89 ലക്ഷം രൂപ) വില. ബൈക്കിനെ ആകര്‍ഷകമാക്കാന്‍ സിയാന്‍ കളര്‍ ഓപ്ഷന്‍ കമ്പനി സമ്മാനിച്ചിട്ടുണ്ട്. മോട്ടോര്‍സൈക്കിളിന്റെ ബോഡി വര്‍ക്കിന്റെ വലിയൊരു ശതമാനം സിയാന്‍ നിറത്തിലാണ്. ചുവന്ന അലോയ് വീലുകള്‍ ആണ് മറ്റൊരു പ്രത്യേകത.
അപ്‌ഡേറ്റ് ചെയ്ത മാറ്റ് ബ്ലാക്ക് ഷേഡിലും 2021 യമഹ R3 ലഭ്യമാണെന്നാണ് റിപ്പോര്‍ട്ട്.
കളര്‍ ഓപ്ഷനില്‍ ഡീപ് പര്‍പ്പിളിഷ് ബ്ലൂ മെറ്റാലിക് ഓപ്ഷനുമുണ്ട്. 320 സിസി പാരലല്‍-ട്വിന്‍ ലിക്വിഡ്-കൂള്‍ഡ് എഞ്ചിന്‍ തന്നെയാണ് മോട്ടോര്‍സൈക്കിളിന്റെ കരുത്ത്. R3-യില്‍ 4 വാല്‍വുകള്‍ക്കൊപ്പം ഒരു DOHC സംവിധാനമാണ്. 10,750 rpm-ല്‍ പരമാവധി 42 bhp പവറും 9,000 rpm-ല്‍ 29 Nm ടോര്‍ക്കും ഉത്‌പാദിപ്പിക്കാന്‍ ശേഷിയുള്ളതാണ് എന്‍ജിന്‍. ആറ് സ്പീഡ് ഗിയര്‍ബോക്സാണ് ട്രാന്‍സ്‍മിഷന്‍. പ്രതിവര്‍ഷം പുതിയ R3 മോഡലിന്റെ 3700 യൂണിറ്റുകള്‍ വില്‍ക്കാനാണ് യമഹ ഇപ്പോള്‍ ലക്ഷ്യമിടുന്നതെനാണ് റിപ്പോര്‍ട്ടുകള്‍.
