രണ്ടു പതിറ്റാണ്ടിനുള്ളില്‍ലോകത്തിലെ ആദ്യ മൂന്നു സമ്പദ് വ്യവസ്ഥകളിലൊന്നായി ഇന്ത്യ മാറുമെന്ന് മുകേഷ് അംബാനി!
ന്യൂഡല്‍ഹി: ലോകത്തിലെ ആദ്യ മൂന്നു സമ്പദ് വ്യവസ്ഥകളിലൊന്നായി രണ്ടു പതിറ്റാണ്ടിനുള്ളില്‍ ഇന്ത്യ മാറുമെന്ന് മുകേഷ് അംബാനി. ആളോഹരി വരുമാനം ഇരട്ടിയാകുമെന്നും അദ്ദേഹം കൂട്ടിച്ചേര്‍ത്തു.ഫേസ്ബുക്ക് മേധാവി മാര്‍ക്ക് സക്കര്‍ബര്‍ഗുമായി നടത്തിയ സംഭാഷണത്തിലായിരുന്നു മുകേഷ് അംബാനിയുടെ അവകാശ വാദം. ഇന്ത്യയിലെ പകുതിയോളം വരുന്ന മധ്യവര്‍ഗ കുടുംബങ്ങളുടെ വരുമാനം മൂന്നുമുതല്‍ നാലു ശതമാനം വരെ വര്‍ധിക്കും. ഏറ്റവും പ്രധാനം ഇന്ത്യ ഒരു പ്രീമിയര്‍ ഡിജിറ്റല്‍ സമൂഹമായി മാറും. ചെറുപ്പക്കാര്‍ അതിനായി ചുക്കാന്‍ പിടിക്കും.
നിലവില്‍ 1800 -2000 യു.എസ് ഡോളറുള്ള ആളോഹരി വരുമാനം 5000 യു.എസ് ഡോളറായി ഉയരും -റിലയന്‍സ് ഇന്‍ഡസ്ട്രീസ് ചെയര്‍മാന്‍ പറഞ്ഞു.ഫേസ്ബുക്ക് പോലുള്ള കമ്പനികള്‍ക്കും മറ്റു നൂതന സംരംഭകര്‍ക്കും ഇന്ത്യ സുവര്‍ണ അവസരമൊരുക്കും. വരും പതിറ്റാണ്ടുകളില്‍ നിരവധി സാമൂഹിക, സാമ്പത്തിക മാറ്റങ്ങള്‍ കാണാനാകുമെന്നും അംബാനി പറഞ്ഞു.
