വാട്സ്ആപ്പ് വഴി അഞ്ച് മിനിറ്റിനുള്ളിൽ ഇൻഷുറൻസ് പോളിസി ക്ലെയിം ചെയ്യാം;
കൊറോണ വൈറസിന്റെ പശ്ചാത്തലത്തിൽ തികച്ചും സമ്പർക്കരഹിതമായ ഇടപാടുകൾ നടത്തുന്നതിനാണ് ബാങ്കുകൾ, ഇൻഷുറൻസ് കമ്പനികൾ ഉൾപ്പെടയുള്ള ധനകാര്യ സ്ഥാപനങ്ങൾ മുൻതൂക്കം നൽകുന്നത്. സുരക്ഷിതരായി വീട്ടിൽ ഇരുന്നുകൊണ്ട് പേയ്മെന്റ്, ഇൻഷുറൻസ് പ്രീമിയം അടയ്ക്കൽ, ബാങ്ക് അക്കൗണ്ട് തുറക്കൽ, വായ്പയ്ക്ക് അപേക്ഷിക്കൽ തുടങ്ങിയ ഇടപാടുകൾ നടത്താൻ പുതിയ സംവിധാനങ്ങൾ ഉപഭോക്താക്കളെ പ്രോത്സാഹിപ്പിക്കുന്നുണ്ട്.
നിലവിലെ സാഹചര്യത്തിൽ ആർട്ടിഫിഷ്യൽ ഇന്റലിജൻസ്, ഇലക്ട്രോണിക് ഉപകരണങ്ങൾ, മൊബൈൽ ആപ്ലിക്കേഷനുകൾ, വെർച്വൽ, വീഡിയോ കോൺഫറൻസിംഗ് തുടങ്ങിയ സൗകര്യങ്ങൾ കടലാസ് രഹിതവും സമ്പർക്കരഹിതവുമായി ഇടപാടുകൾ നടത്തുന്നതിന് സഹായിക്കുന്നു. സോഷ്യൽ മീഡിയ ആപ്ലിക്കേഷനായ വാട്‌സ്ആപ്പിന്റെ സഹായത്തോടെ ഉപയോക്താക്കള്‍ക്ക് അതിവേഗ ഇന്‍ഷുറന്‍സ് സേവനം ഒരുക്കാനും കമ്പനികള്‍ ശ്രമിക്കുന്നുണ്ട്
ഇന്ത്യയിൽ 200 മില്ല്യണ്‍ ആളുകള്‍ വാട്സ്ആപ്പ് ഉപയോഗിക്കുന്നുണ്ടെന്ന നിരീക്ഷണത്തെ തുടര്‍ന്നാണ് ഇത്തരം സൗകര്യം ഒരുക്കാന്‍ ഇന്‍ഷുറന്‍സ് കമ്പനികള്‍ മുന്നോട്ടിറങ്ങിയത്.
ആദിത്യ ബിര്‍ളയുടെ സണ്‍ ലൈഫ് ഇന്‍ഷുറന്‍സ്, ഐസിഐസിഐ ലൈഫ്, ലിബര്‍ട്ടി ജനറല്‍ ഇന്‍ഷുറന്‍സ് എന്നീ കമ്പനികള്‍ ഈ സൗകര്യം ഒരുക്കി കഴിഞ്ഞു. ലിബര്‍ട്ടി ഇന്‍ഷുറന്‍സ് കമ്പനി ഇരുചക്ര വാഹന ഇന്‍ഷുറന്‍സുകള്‍ വാട്സ്ആപ്പ് വഴി അടയ്ക്കാനുള്ള സൗകര്യം ഒരുക്കിയിട്ടുണ്ട്. പോളിസി വിവരങ്ങളും മുടങ്ങിയ പ്രീമിയവും സംബന്ധിച്ച വിവരങ്ങളും സണ്‍ ലൈഫ് ഇന്‍ഷുറന്‍സും ലഭ്യമാക്കി തുടങ്ങിയിട്ടുണ്ട്.
അടുത്തിടെ വാട്സ്ആപ്പ് വഴിയുള്ള വീഡിയോ-വോയ്‌സ് ഇന്റർഫേസിംഗ് സെയിൽസ് പ്ലാറ്റ്ഫോം ആരംഭിച്ചിരുന്നു. സമ്പർക്കരഹിതമായി ഇൻഷുറൻസ് പോളിസികൾ വിൽക്കുന്നതിനുള്ള പ്ലാറ്റ്ഫോമാണിത്. ഇതുവഴി ഏജന്റുമാർക്ക് ഉപഭോക്താക്കളുമായി വീഡിയോ കോളിംഗ് നടത്താനും എളുപ്പത്തിൽ പോളിസി വാങ്ങുന്നതിനും ക്ലെയിം ചെയ്യുന്നതിനും ഉപഭോക്താക്കളെ സഹായിക്കാനും സാധിക്കും. ഉപഭോക്താക്കളുടെ ചോദ്യങ്ങളും സംശയങ്ങളും പരിഹരിക്കുന്നതിനും പോളിസി ക്ലെയിം ചെയ്യുന്നതിനുമായി അലക്സാ അധിഷ്ഠിത ഉപഭോക്തൃ സേവന വാട്സ്ആപ്പ് ബോട്ട് സൗകര്യവും കമ്പനി ആരംഭിച്ചിട്ടുണ്ട്. അതായത് വാട്സ്ആപ്പ് വഴി ഇനി അഞ്ച് മിനിറ്റിനുള്ളിൽ ഇൻഷുറൻസ് പോളിസി ക്ലെയിം ചെയ്യാനാകും.
