വായ്പ നൽകും ആപ്പുകൾ സൂക്ഷിക്കുക ! തട്ടിപ്പുകൾക്കെതിരെ മുന്നറിയിപ്പുമായി എസ്ബിഐ
കൊച്ചി: മൊബൈൽ ആപ്ലിക്കേഷൻ ഉൾപ്പടെയുള്ള അനധികൃത ഡിജിറ്റൽ പ്ലാറ്റ്‌ഫോമുകൾ വാഗ്ദാനം ചെയ്യുന്ന വായ്പകൾക്കെതിരെ മുന്നറിയിപ്പുമായി സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ). കെവൈസി രേഖകൾ സമർപ്പിക്കാതെ എളുപ്പത്തിൽ വായ്പ നൽകാമെന്ന് വാഗ്ദാനം ചെയ്യുന്ന ഇൻസ്റ്റന്റ് വായ്പ ആപ്ലിക്കേഷനുകളെ സൂക്ഷിക്കണമെന്ന് എസ്ബിഐ ട്വീറ്റിൽ പറഞ്ഞു. അനധികൃത ലിങ്കുകളിൽ ക്ലിക്ക് ചെയ്യരുതെന്നും എസ്‌ബി‌ഐയിൽ നിന്നാണെന്ന് തെറ്റിധരിപ്പിച്ച് നിങ്ങളുമായി ബന്ധപ്പെടുന്നവർക്ക് അക്കൗണ്ട് വിവരങ്ങൾ ഉൾപ്പടെയുള്ള വിശദാംശങ്ങൾ നൽകരുതെന്നും ബാങ്ക് അറിയിച്ചു.
സാമ്പത്തിക ആവശ്യങ്ങൾ നിറവേറ്റുന്നതിന് ബാങ്കിന്റെ ഔദ്യോഗിക വെബ്സൈറ്റ് https://bank.sbi സന്ദർശിച്ചാൽ മതിയെന്നും എസ്ബിഐ ട്വീറ്റിൽ വ്യക്തമാക്കി. ഇത്തരം വായ്പ തട്ടിപ്പുകളിൽ നിന്ന് രക്ഷപ്പെടാനുള്ള സുരക്ഷ ടിപ്പുകളും ബാങ്ക് പങ്കുവച്ചിട്ടുണ്ട്. ഓഫറിന്റെ നിബന്ധനകളും വ്യവസ്ഥകളും പരിശോധിക്കുക, സംശയാസ്പദമായ ലിങ്കുകളിൽ ക്ലിക്ക് ചെയ്യുന്നത് ഒഴിവാക്കുക, ഡൗൺലോഡ് ചെയ്യുന്നതിന് മുമ്പ് ആപ്ലിക്കേഷന്റെ ആധികാരികത പരിശോധിക്കുക എന്നിവയാണ് ഉപഭോക്താക്കൾക്ക് എസ്ബിഐ നൽകിയ സുരക്ഷ ടിപ്പുകൾ.
ആർ‌ബി‌ഐയിൽ രജിസ്റ്റർ ചെയ്തിട്ടുള്ള ബാങ്കുകൾ, ബാങ്കിംഗ് ഇതര ധനകാര്യ കമ്പനികൾ, സംസ്ഥാന സർക്കാരുകൾ നിയന്ത്രിക്കുന്ന സ്ഥാപനങ്ങൾ എന്നിവയ്ക്ക് നിയമാനുസൃതമായി വായ്പ നൽകാം. വർദ്ധിച്ചുവരുന്ന ഓൺലൈൻ വായ്പ തട്ടിപ്പികളിൽ ഇരയാകുന്നതിനെതിരെ കഴിഞ്ഞ മാസം റിസർവ് ബാങ്ക് വ്യക്തികൾക്കും ചെറുകിട ബിസിനസുകൾക്കും മുന്നറിയിപ്പ് നൽകിയിരുന്നു. ഇത്തരം തട്ടിപ്പ് പ്ലാറ്റ്‌ഫോമുകൾ അമിത പലിശ നിരക്കിനൊപ്പം മറ്റ് അധിക നിരക്കുകളും ഈടാക്കുന്നു. പണം വീണ്ടെടുക്കുന്നതിന് സ്വകാര്യവിവരങ്ങൾ ചോർത്തി ഉപഭോക്താക്കളെ ഭീഷണിപ്പെടുത്തുന്നതാണ് ഇവരുടെ രീതി.
വായ്പക്കാരുടെ മൊബൈൽ ഫോണുകളിലെ ഡാറ്റ ആക്‌സസ് ചെയ്താണ് ഭീഷണികൾ നടത്താറുള്ളത്. കേരളം, കർണാടക തുടങ്ങി ഇന്ത്യയിലുടനീളം വായ്പ തട്ടിപ്പുമായി ബന്ധപ്പെട്ട് നിരവധി കേസുകളാണ് റിപ്പോർട്ട് ചെയ്തിട്ടുള്ളത്. അപമാനം തങ്ങാനാകാതെ നിരവധിയാളുകൾ ആത്മഹത്യ ചെയ്തതായും റിപ്പോർട്ടുകളുണ്ട്. ഇതിന്റെ പശ്ചാത്തലത്തിൽ സർക്കാരും റിസർവ് ബാങ്കും പൊതുജനങ്ങൾക്ക് ജാഗ്രത നിർദ്ദേശം നൽകിയിട്ടുണ്ട്. ഡിജിറ്റൽ വായ്പ പ്ലാറ്റ്ഫോം വഴി അജ്ഞാത വ്യക്തികൾ/സ്ഥിരീകരിക്കാത്ത / അനധികൃത ആപ്ലിക്കേഷനുകൾ എന്നിവരുമായി കെവൈസി രേഖകളൊന്നും തന്നെ പങ്കുവയ്ക്കരുത്. ഏതെങ്കിലും ആപ്പ് നിങ്ങളുടെ സ്വകാര്യവിവരങ്ങൾ ഉൾപ്പടെ ചോദിക്കുകയാണെങ്കിൽ ഇതിനെതിരെ പോലീസിൽ പരാതി നൽകാം.
