വൈറസ് ഇവിടെനിന്ന് പോയിട്ടില്ല:ഉത്സവകാലത്തു കൂടുതല്‍ ജാഗ്രത പുലര്‍ത്തണമെന്നു – പ്രധാനമന്ത്രി നരേന്ദ്ര മോദി.
ന്യൂഡല്‍ഹി: ഉത്സവകാലത്തു കോവിഡിനെതിരേ കൂടുതല്‍ ജാഗ്രത പുലര്‍ത്തണമെന്നു പ്രധാനമന്ത്രി നരേന്ദ്ര മോദി. വൈറസ് ഇവിടെനിന്ന് പോയിട്ടില്ല. അതിനാല്‍ അധികജാഗ്രത വേണം. കോവിഡ് മാനദണ്ഡങ്ങളില്‍ ഒരു തരത്തിലുള്ള ഇളവു വരുത്തരുതെന്നും പ്രതിമാസ റേഡിയോ പരിപാടിയായ മന്‍കി ബാത്തില്‍ പ്രധാനമന്ത്രി പറഞ്ഞു.വാക്സിന്‍ എടുക്കുന്നതിന് ആരും മടി കാണിക്കരുത്.ഭയമില്ലാതെ വാക്സിന്‍ സ്വീകരിക്കാന്‍ എല്ലാവരും തയാറാകണം. വാക്സിന്‍ എടുക്കുന്നവരില്‍ ചിലര്‍ക്കു പനി അനുഭവപ്പെടും. ഇത്തരം അസ്വസ്ഥതകള്‍ ഏതാനും മണിക്കൂറുകള്‍ മാത്രമേ ഉണ്ടാകൂ. വാക്സിന്‍ എടുക്കേണ്ടെന്ന് ഒരാള്‍ തീരുമാനിക്കുന്പോള്‍ അവരുടെ കുടുംബത്തെയൊന്നടങ്കം അപകടത്തിലാക്കുന്ന തീരുമാനമായി അതുമാറുകയാണെന്നും പ്രധാനമന്ത്രി ചൂണ്ടിക്കാട്ടി.ടോക്കിയോ ഒളിന്പിക്സില്‍ പങ്കെടുക്കുന്ന കായികതാരങ്ങളെ പ്രോത്സാഹിപ്പിക്കാന്‍ മോദി ആഹ്വാനം ചെയ്തു. ഭാവി തലമുറയെ കരുതി ജലസംരക്ഷണത്തിന് എല്ലാവരും ശ്രമിക്കണമെന്നും പ്രധാനമന്ത്രി നിര്‍ദേശിച്ചു.
