സുമിന് പകരമാവാന്‍ കേരളത്തിന്റെ സ്വന്തം ആപ്പ് ‘വീ കണ്‍സോള്‍’
ഇന്ത്യയുടെ ഔദ്യോഗിക വീഡിയോ കോണ്‍ഫറന്‍സിങ്ങ് ടൂള്‍ ആയി കേരളത്തിലെ സ്റ്റാര്‍ട്ടപ്പായ ടെക്ജന്‍ഷ്യ നിര്‍മ്മിച്ച ‘വീ കണ്‍സോള്‍’ എന്ന ആപ്പ് തെരഞ്ഞെടുക്കപ്പെട്ടിരിക്കുന്നു. കോവിഡ് മഹാമാരി സൃഷ്ടിച്ച പ്രതിസന്ധിയുടെ പശ്ചാത്തലത്തില്‍ സുരക്ഷിതവും തദ്ദേശീയവുമായ വീഡിയോ കോണ്‍ഫറന്‍സ് ആപ്പ് നിര്‍മ്മിക്കുന്നതിനായി കേന്ദ്ര സര്‍ക്കാര്‍ സംഘടിപ്പിച്ച ഇന്നവേഷന്‍ ചാലഞ്ചില്‍ പങ്കെടുത്താണ് ടെക്ജന്‍ഷ്യ ഈ നേട്ടം കൈവരിച്ചത്. പന്ത്രണ്ടായിരത്തിലേറെ കമ്പനികള്‍ സമര്‍പ്പിച്ച ഉത്പന്നങ്ങളില്‍ നിന്നാണ് വീ കണ്‍സോളിനെ കേന്ദ്ര സര്‍ക്കാര്‍ തെരഞ്ഞെടുത്തത്.
കേരളത്തിന്റെ സ്റ്റാര്‍ട്ടപ്പ് മേഖലയ്ക്കാകെ അഭിമാനമായി മാറിയിരിക്കുകയാണ് ടെക്ജന്‍ഷ്യ. ഈ നേട്ടത്തില്‍ ‘വീ കണ്‍സോള്‍’ സ്റ്റാര്‍ട്ടപ്പ് കമ്പനിയെ മുഖ്യമന്ത്രി പിണറായി വിജയന്‍ അഭിനന്ദിച്ചു. ഇനിയും ഒരുപാട് വലിയ ഉയരങ്ങളിലെത്താന്‍ അവര്‍ക്കാകട്ടെയെന്നും ടെക്ജന്‍ഷ്യ കൈവരിച്ച നേട്ടം കേരളത്തിലെ മറ്റു സ്റ്റാര്‍ട്ടപ്പ് സംരംഭകര്‍ക്ക് പ്രചോദനമായി മാറട്ടെ എന്നും മുഖ്യമന്ത്രി ആശംസിച്ചു.
