സെപ്റ്റംബര്‍ ഒന്നുമുതല്‍ സ്‌കൂളുകളും കോളേജുകളും തിയേറ്ററുകളും തുറക്കും :തമിഴ്‌നാട് സര്‍ക്കാര്‍
സെപ്റ്റംബര്‍ ഒന്നുമുതല്‍ സ്‌കൂളുകളും കോളേജുകളും തുറക്കുമെന്ന് തമിഴ്‌നാട് സര്‍ക്കാര്‍ അറിയിച്ചു. ഒമ്ബത് മുതല്‍ പന്ത്രണ്ടാം ക്ലാസ് വരെയുള്ളവര്‍ക്ക് സെപ്റ്റംബര്‍ ഒന്ന് മുതല്‍ സ്‌കൂളുകള്‍ തുറക്കുമെന്നാണ് അറിയിച്ചിരിക്കുന്നത്. ഒപ്പം കോളേജുകളും തുറക്കും.സ്‌കൂളുകളും കോളേജുകളും തുറക്കുന്നതിന് മുന്നോടിയായി അദ്ധ്യാപകരും സ്‌കൂളിലെ മറ്റു ജീവനക്കാരും രണ്ട് ഡോസ് വാക്സിനും സ്വീകരിച്ചിട്ടുണ്ടെന്ന് ഉറപ്പാക്കും.പോളിടെക്നിക് കോളേജുകളും ഇതിനോടൊപ്പം തുറക്കാന്‍ അനുമതിയുണ്ട്.സ്‌കൂളുകള്‍ ആദ്യ ഘട്ടത്തില്‍ ഒമ്ബത് മുതല്‍ പന്ത്രണ്ടാം ക്ലാസുകാര്‍ക്ക് മാത്രമേ തുറക്കുന്നുള്ളുവെങ്കിലും സെപ്റ്റംബര്‍ 15ന് ശേഷം ഒന്ന് മുതല്‍ എട്ട് വരെ ക്ലാസുകാര്‍ക്ക് തുറക്കുന്നതും പരിഗണനയിലുണ്ട്. സാഹചര്യങ്ങള്‍ വിലയിരുത്തിയ ശേഷമായിരിക്കും തീരുമാനം .സംസ്ഥാനത്ത് തിങ്കളാഴ്ച മുതല്‍ തിയേറ്ററുകള്‍ തുറക്കാനും തീരുമാനിച്ചിട്ടുണ്ട്. സീറ്റുകളുടെ 50 ശതമാനം ഉപയോഗിച്ച്‌ പ്രവര്‍ത്തിക്കാനാണ് തിയേറ്ററുകള്‍ക്ക് അനുമതി നല്‍കിയിരിക്കുന്നത്. മുഖ്യമന്ത്രി എം.കെ.സ്റ്റാലിന്റെ അധ്യക്ഷതയില്‍ ചേര്‍ന്ന യോഗത്തിലാണ് അനുമതി നല്‍കിയത്. ഈ ഇളവുകള്‍ സഹിതം തമിഴ്‌നാട്ടില്‍ ലോക്ഡൗണ്‍ സെപ്റ്റംബര്‍ ആറുവരെ നീട്ടിയിട്ടുണ്ട്.ബാറുകള്‍ തുറക്കാനും ബീച്ചുകളില്‍ സന്ദര്‍ശകരെ അനുവദിക്കാനും തീരുമാനിച്ചിട്ടുണ്ട്. മൃഗശാലകളിലും സന്ദര്‍ശകരെ അനുവദിക്കും. ആന്ധ്രാപ്രദേശില്‍നിന്നും കര്‍ണാടകയില്‍ നിന്നുമുള്ള ബസ് സര്‍വീസുകള്‍ക്കും അനുമതി നല്‍കി.
