ലോകരാജ്യങ്ങളെ അമ്പരപ്പിച്ചു കൊണ്ട്, ഇന്ത്യയിൽ ദാരിദ്ര്യനിരക്കിൽ വലിയ കുറവുണ്ടായതായി ലോകബാങ്കിന്റെ പുതിയ റിപ്പോർട്ട്. 2011 മുതൽ 2023 വരെയുള്ള കാലയളവിൽ ഏകദേശം 49.6 കോടി ആളുകളെ ദാരിദ്ര്യത്തിൽ നിന്ന് കരകയറ്റിയെന്നാണ് ലോകബാങ്കിന്റെ കണ്ടെത്തൽ. രാജ്യത്തെ അതിദാരിദ്ര്യ നിരക്ക് 27.1 ശതമാനത്തിൽ നിന്ന് 2.6 ശതമാനമായി കുറഞ്ഞു. 2026 ഒക്ടോബറിൽ പുറത്തിറക്കിയ ‘Poverty and Equity Brief’റിപ്പോർട്ടിലാണ് ഈ വിവരങ്ങളുള്ളത്. ഇന്ത്യയെ സംബന്ധിച്ച് ഇത് ചരിത്ര നിമിഷമാണ്. അതേ സമയം ചില വെല്ലുവിളികൾ പരിഹരിക്കപ്പെടേണ്ടവയായി ബാക്കി നിൽക്കുന്നുമുണ്ട്. ഇന്ത്യൻ സമ്പദ് വ്യവസ്ഥയെ സംബന്ധിച്ചും നിർണായകമായ കണക്കുകളാണിവ.
മാറുന്ന ഇന്ത്യലോകത്ത് ഏറ്റവും വേഗത്തിൽ ദാരിദ്ര്യം കുറച്ച രാജ്യങ്ങളിലൊന്നാണ് ഇന്ത്യയെന്ന് റിപ്പോർട്ട് വിലയിരുത്തുന്നു. പണത്തിന്റെ അടിസ്ഥാനത്തിലുള്ള ദാരിദ്ര്യത്തിലും, മറ്റ് ജീവിതസാഹചര്യങ്ങളുമായി ബന്ധപ്പെട്ട ദാരിദ്ര്യം കുറയ്ക്കുന്നതിലും ഇന്ത്യ പുരോഗതി കൈവരിച്ചതായി ലോകബാങ്ക് ചൂണ്ടിക്കാട്ടി.
താഴ്ന്ന, ഇടത്തരം വരുമാന വിഭാഗത്തിലെ ദാരിദ്ര്യത്തിലും കുറവ്
പ്രതിദിനം 4.20 ഡോളറിൽ താഴെ വരുമാനമുള്ളവരെ അടിസ്ഥാനമാക്കിയുള്ള താഴ്ന്ന, ഇടത്തരം വരുമാന രാജ്യങ്ങൾക്കായുള്ള ദാരിദ്ര്യരേഖ പ്രകാരവും ഇന്ത്യയിൽ വലിയ മാറ്റമുണ്ടായി. 2021ലെ വാങ്ങൽ ശേഷി അഥവാ പർച്ചേസിങ് പവർ പാരിറ്റി (PPP) അടിസ്ഥാനമാക്കിയുള്ള കണക്കനുസരിച്ച്, ഈ വിഭാഗത്തിൽപ്പെടുന്നവരുടെ അനുപാതം 2011ലെ 57.7 ശതമാനത്തിൽ നിന്ന് 2023ൽ 16.1 ശതമാനമായി കുറഞ്ഞു.
ദാരിദ്ര്യ നിരക്ക് കുറയാനുള്ള കാരണങ്ങൾ
ദാരിദ്ര്യനിരക്കിലെ കുറവിന് പ്രധാനമായും മൂന്ന് ഘടകങ്ങളാണ് സഹായിച്ചതെന്ന് ലോകബാങ്ക് റിപ്പോർട്ട് വ്യക്തമാക്കുന്നു.
1. ഉപഭോഗത്തിലെ വളർച്ച: ജനങ്ങളുടെ ഉപഭോഗച്ചെലവിലും വാങ്ങൽശേഷിയിലും ഉണ്ടായ വർധന.
2. തൊഴിലവസരങ്ങളിലെ വർധന: പ്രത്യേകിച്ച് സ്ത്രീകൾക്കിടയിൽ തൊഴിൽപങ്കാളിത്തം ഉയർന്നു.
3. സാമൂഹിക സുരക്ഷാ ആനുകൂല്യങ്ങൾ: ഭക്ഷ്യസബ്‌സിഡി ഉൾപ്പെടെയുള്ള സർക്കാർ സഹായപദ്ധതികളുടെ വ്യാപനം
ഈ ഘടകങ്ങൾ ജനങ്ങളുടെ ജീവിതനിലവാരം മെച്ചപ്പെടുത്തുന്നതിൽ നിർണായക പങ്കുവഹിച്ചു. 2028 വർഷത്തോടെ ഇന്ത്യയിൽ ദാരിദ്ര്യം ഇനിയും കുറയുമെന്നാണ് ലോകബാങ്കിന്റെ വിലയിരുത്തൽ. എന്നാൽ വരും വർഷങ്ങളിൽ കുറവിന്റെ വേഗം താരതമ്യേന മന്ദഗതിയിലായേക്കാം.
പ്രതിദിനം 4.20 ഡോളർ എന്ന ദാരിദ്ര്യരേഖ അടിസ്ഥാനമാക്കിയുള്ള നിരക്ക് 2026ൽ 14.2 ശതമാനത്തിൽ നിന്ന് 2028ഓടെ 12.1 ശതമാനമായി കുറയുമെന്ന് ലോകബാങ്ക് പ്രവചിക്കുന്നു. അതേസമയം, ഇവ സൂചനാപരമായ കണക്കുകളാണെന്നും, മൈക്രോസിമുലേഷൻ മാതൃകകളെ അടിസ്ഥാനമാക്കിയുള്ളതാണെന്നും റിപ്പോർട്ട് മുന്നറിയിപ്പ് നൽകുന്നു. പുതിയ തൊഴിൽവിപണി, സാമ്പത്തിക വളർച്ച തുടങ്ങിയ വിവരങ്ങൾ ലഭിക്കുന്നതനുസരിച്ച് ഈ കണക്കുകളിൽ മാറ്റമുണ്ടാകാം.
ബഹുമുഖ ദാരിദ്ര്യത്തിലും കുറവ്
വരുമാനം മാത്രമല്ല, ആരോഗ്യം, വിദ്യാഭ്യാസം, ജീവിതസൗകര്യങ്ങൾ തുടങ്ങിയ ഘടകങ്ങൾ കൂടി പരിഗണിച്ചുള്ള ‘ബഹുമുഖ ദാരിദ്ര്യ’ ത്തിലും (Multidimensional Poverty) ഇന്ത്യയിൽ വലിയ കുറവുണ്ടായി.
ഓക്സ്ഫഡ് പോവർട്ടി ആൻഡ് ഹ്യൂമൻ ഡെവലപ്മെന്റ് ഇനിഷ്യേറ്റീവിന്റെ (OPHI) മൾട്ടിഡൈമെൻഷണൽ പോവർട്ടി ഇൻഡക്സ് പ്രകാരം, ദാരിദ്ര്യനിരക്ക് 2005-06ലെ 53.8 ശതമാനത്തിൽ നിന്ന് 2019-21ൽ 16.4 ശതമാനമായി കുറഞ്ഞു. ലോകബാങ്കിന്റെ ബഹുമുഖ ദാരിദ്ര്യം അടിസ്ഥാനമാക്കിയ കണക്കനുസരിച്ച് 2022-23ൽ ഈ നിരക്ക് 15.5 ശതമാനമായിരുന്നു.
രാജ്യത്തിന്റെ ചില മേഖലകളിൽ ഇപ്പോഴും വെല്ലുവിളി
രാജ്യത്തുടനീളം ദാരിദ്ര്യം ഒരേ വേഗത്തിലല്ല കുറയുന്നതെന്നും റിപ്പോർട്ട് ചൂണ്ടിക്കാട്ടുന്നു. ഇന്ത്യയിലെ ദരിദ്രരിൽ ഏകദേശം 57 ശതമാനവും ഉത്തർപ്രദേശ് മുതൽ പശ്ചിമ ബംഗാൾ വരെ, തുടർച്ചയുള്ള ഭൂമിശാസ്ത്ര മേഖലയിലാണ് കേന്ദ്രീകരിച്ചിരിക്കുന്നത്. ഈ സംസ്ഥാനങ്ങളിൽ ഉല്പാദനക്ഷമമായ തൊഴിലവസരങ്ങൾ സൃഷ്ടിക്കുന്നത് ദാരിദ്ര്യം ഇനിയും കുറയ്ക്കുന്നതിൽ നിർണായകമാകുമെന്നും ലോകബാങ്ക് വിലയിരുത്തുന്നു.
13.4 കോടി പുതിയ തൊഴിലവസരങ്ങൾ
2017 മുതൽ 2023 വരെയുള്ള കാലയളവിൽ ഇന്ത്യയിൽ ഏകദേശം 13.4 കോടി ആളുകൾക്ക് അധികമായി തൊഴിൽ ലഭിച്ചു. ഇതേ കാലയളവിലെ തൊഴിൽപ്രായത്തിലുള്ള ജനസംഖ്യയുടെ വളർച്ചയുടെ ഏകദേശം ഇരട്ടിയായിരുന്നു തൊഴിൽ വർധന. ഗ്രാമീണ മേഖലകളിലെ സ്ത്രീകൾ ശമ്പളത്തോടെയുള്ള ജോലികളിലേക്ക് കടന്നുവന്നതാണ് ഈ വളർച്ചയ്ക്ക് പ്രധാനമായും കാരണമായത്.
യുവാക്കൾക്കിടയിൽ ആശങ്ക
എന്നാൽ യുവാക്കൾക്കിടയിലെ തൊഴിലില്ലായ്മ ഇപ്പോഴും ആശങ്കയായി തുടരുന്നു. 2026 സാമ്പത്തിക വർഷത്തിന്റെ ആദ്യ പാദത്തിൽ 14.6 ശതമാനമായിരുന്ന യുവജനങ്ങളിലെ തൊഴിലില്ലായ്മാ നിരക്ക്, 2027 സാമ്പത്തിക വർഷത്തിന്റെ ആദ്യ പാദത്തിൽ 15.9 ശതമാനമായി ഉയർന്നു. ഗ്രാമീണ മേഖലയിലെ യുവതികൾക്കിടയിലാണ് ഈ വർധന പ്രധാനമായും പ്രകടമായത്.
പ്രകടമായ മാറ്റമില്ലാത്ത വേതന വർധന
തൊഴിലവസരങ്ങൾ വർധിച്ചെങ്കിലും, യഥാർഥ വേതനത്തിൽ കാര്യമായ വളർച്ചയുണ്ടായിട്ടില്ലെന്നും റിപ്പോർട്ട് പറയുന്നു. താരതമ്യേന കുറഞ്ഞ ഉല്പാദനക്ഷമതയുള്ള മേഖലകളിലാണ് തൊഴിൽവർധനയുടെ വലിയൊരു ഭാഗം ഉണ്ടായത്.
കൂടാതെ, കുടുംബങ്ങളുടെ ഉപഭോഗ സർവേകളെ അടിസ്ഥാനമാക്കിയാണ് ദാരിദ്ര്യനിരക്ക് കണക്കാക്കുന്നതെന്നും ലോകബാങ്ക് വ്യക്തമാക്കി. സമീപകാലത്തെ ചില പുരോഗതികൾ യഥാർഥ ജീവിതനിലവാരത്തിലെ മാറ്റങ്ങൾക്കൊപ്പം, കണക്കെടുപ്പ് രീതികളിലുണ്ടായ മെച്ചപ്പെടുത്തലുകളും സൂചിപ്പിച്ചേക്കാമെന്നും റിപ്പോർട്ട് മുന്നറിയിപ്പ് നൽകുന്നു.
ഹൈലൈറ്റ്സ്
2011-23 കാലയളവിൽ 49.6 കോടി ആളുകൾ ദാരിദ്ര്യത്തിൽ നിന്ന് പുറത്തുവന്നതും അതിദാരിദ്ര്യ നിരക്ക് 2.6 ശതമാനമായി കുറഞ്ഞതും ഇന്ത്യയുടെ സാമൂഹിക-സാമ്പത്തിക രംഗത്തെ ശ്രദ്ധേയമായ മാറ്റമാണ്. എന്നാൽ യുവജനങ്ങൾക്കിടയിലെ തൊഴിലില്ലായ്മ, കുറഞ്ഞ വേതനവളർച്ച, പ്രാദേശിക അസമത്വങ്ങൾ എന്നിവ പരിഹരിക്കേണ്ട വെല്ലുവിളികളായി തുടരുന്നു.