സ്കൂളുകൾ വീണ്ടും തുറന്ന് പലയിടങ്ങളും  

സെപ്റ്റംബര്‍ 1 ന് ലോകത്ത് ലക്ഷക്കണക്കിനന് വിദ്യാര്‍ത്ഥികള്‍ നീണ്ട ഇടവേളയ്ക്ക് ശേഷം വീണ്ടും സ്‌കൂളില്‍ പോയി. ചില സ്ഥലങ്ങളില്‍ വരും ദിവസങ്ങളില്‍ സ്‌കൂളുകള്‍ വീണ്ടും തുറക്കും. എന്തൊക്കെ മുന്‍കരുതലുകളാണ് അവര്‍ എടുക്കുന്നതെന്ന് നോക്കാം.

കൊവിഡ് 19 തുടക്കത്തില്‍ ഏറെ ഭീതി പടര്‍ത്തിയ രാജ്യങ്ങളില്‍ ഇപ്പോള്‍ സ്‌കൂളുകള്‍ അടക്കമുള്ള വിദ്യാഭ്യാസ സ്ഥാപനങ്ങള്‍ തുറക്കുന്നു. കൊവിഡ് വ്യാപനത്തിന്റെ ഭീതി ഏറ്റവും കൂടുതല്‍ നിലനില്‍ക്കുന്നത് സ്‌കൂളുകള്‍ തുറന്നു പ്രവര്‍ത്തിക്കുമ്പോളാണ്. വിവിധ ഭാഗങ്ങളില്‍ നിന്ന് പല പശ്ചാത്തലത്തില്‍ നിന്നുള്ള വിദ്യാര്‍ത്ഥികള്‍ കുട്ടികള്‍ ആയിരക്കണക്കിന് ഒത്തുകൂടുന്ന സാഹചര്യമുള്ളതിനാല്‍ ആദ്യമെ തന്നെ സ്‌കൂളുകള്‍ അടച്ചിടുകയായിരുന്നു. പ്രധാനപ്പെട്ട പരീക്ഷകളെല്ലാം റദ്ദാക്കുകയോ നീട്ടിവയ്ക്കുകയോ ഒക്കെ ചെയ്തു. എന്നാല്‍ ഇപ്പോള്‍ സ്‌കൂളുകള്‍ വീണ്ടും തുറക്കാനുള്ള ഒരുക്കങ്ങള്‍ ലോകമെമ്പാടും തുടങ്ങി. ലോകത്തെ ചില രാജ്യങ്ങളില്‍ നേരിട്ടുള്ള ക്ലാസുകള്‍ തുടങ്ങി. ഇന്ത്യയില്‍ കൊവിഡ് 19 വ്യാപനം തുടരുന്നതിനാല്‍ ഓണ്‍ലൈന്‍ ക്ലാസുകള്‍ മാത്രമാണ് നടക്കുന്നത്.

വുഹാന്‍

കൊറോണ വൈറസിന്റെ ഉറവിട സ്ഥലമെന്ന് കരുതപ്പെടുന്ന ചൈനയിലെ വുഹാനില്‍ മാസങ്ങളായി അടച്ചിട്ടിരുന്ന സ്‌കൂളുകള്‍ വീണ്ടും തുറന്നു. പുതിയ കേസുകള്‍ റിപ്പോര്‍ട്ട് ചെയ്യാത്തതിനാലാണ് സ്‌കൂളുകള്‍ വീണ്ടും തുറന്നത്. റിപ്പോര്‍ട്ടുകള്‍ പ്രകാരം വുഹാനില്‍ 14 ലക്ഷത്തോളം കുട്ടികള്‍ 2,842 കിന്റര്‍ഗാര്‍ഡനിലും പ്രൈമറി, സെക്കന്‍ഡറി സ്‌കൂളുകളിലുമായി ഹാജര്‍ രേഖപ്പെടുത്തി.
ഇംഗ്ലണ്ടിലും വെയില്‍സിലും

ഇംഗ്ലണ്ടിലെയും വെയില്‍സിലെയും സ്‌കൂളുകളിലും കുട്ടികള്‍ വന്നു തുടങ്ങി. എന്നാല്‍ സുരക്ഷാ മാനദണ്ഡങ്ങള്‍ കൃത്യമായി പാലിക്കാന്‍ നിര്‍ദേശമുണ്ട്. പൊതുഗതാഗത്തിലും സ്‌കൂളുകളിലും തിരക്കുണ്ടാവാതിരിക്കാന്‍ പ്രത്യേകം ശ്രദ്ധ വേണമെന്നാണ് നിര്‍ദേശം. കുട്ടികളെ സ്‌കൂളില്‍ കൊണ്ടു വിടുമ്പോള്‍ രക്ഷകര്‍ത്താക്കള്‍ മറ്റ് രക്ഷകര്‍ത്താക്കളുമായി അടുത്ത് ഇടപഴകുന്നത് ഒഴിവാക്കണം. വിദ്യാഭ്യാസത്തിനും കുട്ടികളുടെ മാനസിക വളര്‍ച്ചയ്ക്കും നേരിട്ടുള്ള ക്ലാസുകള്‍ അത്യാവശ്യാമാണെന്നും ഇവിടത്തെ സ്‌കൂള്‍ അധികൃതര്‍ അഭിപ്രായപ്പെടുന്നു.

റഷ്യ, ഉക്രൈന്‍

റഷ്യ, ഉക്രൈന്‍, ബെല്‍ജിയം, ഫ്രാന്‍സ്, എന്നീ രാജ്യങ്ങളിലെ സ്‌കൂളുകളും ഈയാഴ്ച്ച തുറന്നു. ലോകത്തെല്ലായിട്ടത്തുമെന്ന പോലെ കുട്ടികളോടും ടീച്ചര്‍മാരോടും മാസ്‌ക് ധരിക്കാന്‍ ആവശ്യപ്പെട്ടിട്ടുണ്ട്. പത്തു ലക്ഷത്തോളം പേര്‍ക്ക് കൊവിഡ് 19 ബാധിച്ച റഷ്യയിലും സ്‌കൂളുകള്‍ തുറന്നു. ലക്ഷക്കണക്കിന് വിദ്യാര്‍ത്ഥികള്‍ നീണ്ട് അവധിക്ക് ശേഷം വീണ്ടും സ്‌കൂളുകളിലെത്തി.

ഹോങ്കോങ്

ഹോങ്കോങ്ങിലെ സ്‌കൂളുകള്‍ സെപ്റ്റംബര്‍ 23 മുതല്‍ തുറക്കുമെന്നാണ് അറിയിപ്പ് വന്നിരിക്കുന്നത്. പ്രൈമറി 5, പ്രൈമറി 6, ഫോം 5, ഫോം 6, പ്രൈമറി, സെക്കന്‍ഡറി സ്‌കൂള്‍, അവസാന വര്‍ഷ കിന്റര്‍ഗാര്‍ഡന്‍ വിദ്യാര്‍ത്ഥികള്‍ സെപ്റ്റംബര്‍ 23 ന് സ്‌കൂളില്‍ പോകും. അതേസമയം ഫോം 2, ഫോം 4, പ്രൈമറി 2 മുതല്‍ പ്രൈമറി 4 വരെ, ജൂനിയര്‍ കിന്റര്‍ഗാര്‍ഡന്‍ എന്നിവയിലെ കുട്ടികള്‍ക്ക് സെപ്റ്റംബര്‍ 29 ന് സ്‌കൂളുകള്‍ തുറക്കും.

ഗ്രീസ്

ഗ്രീസിലെ വിദ്യാഭ്യാസ മന്ത്രിയുടെ പ്രസ്താവന അനുസരിച്ച് സ്‌കൂളുകള്‍ സെപ്റ്റംബര്‍ 14 ന് തുറക്കും. സ്‌കൂളുകള്‍ തുറക്കുന്ന തീയതി ഒരാഴ്ച്ച മുമ്പ് തന്നെ പ്രഖ്യാപിച്ചിരുന്നു. അവധി കഴിഞ്ഞ് അള്‍ക്കാര്‍ക്ക് തിരികെയെത്താനുള്ള സൗകര്യത്തിനാണ് ഇങ്ങനെ ചെയ്തത്. കുട്ടികള്‍ക്കും അധ്യാപകര്‍ക്കുമായി 50 ലക്ഷം മാസ്‌കുകള്‍ വിതരണം ചെയ്യുമെന്നും അറിയിച്ചിട്ടുണ്ട്.

സ്‌പെയിന്‍

കൊവിഡ് 19 തുടക്കത്തില്‍ ഭീതി പടര്‍ത്തിയ മറ്റൊരു രാജ്യമായിരുന്നു സ്‌പെയിന്‍. ഇവിടെയും സുരക്ഷാ മാനദണ്ഡങ്ങള്‍ പാലിച്ചാണ് സ്‌കൂളുകള്‍ തുറക്കുന്നത്. വിദ്യാര്‍ത്ഥികള്‍ പരസ്പരം 1.5 മീറ്റര്‍ സാമൂഹിക അകലം പാലിക്കണം. ദിവസവും കുറഞ്ഞത് അഞ്ച് തവണ കൈകള്‍ കഴുകാനും നിര്‍ദേശം നല്‍കിയിട്ടുണ്ട്. മറ്റ് സ്ഥലങ്ങളെക്കാള്‍ സുരക്ഷിതരായവരായിരിക്കും സ്‌കൂളുകളിലെ അധ്യാപകരും അവിടത്തെ ജീവനക്കാരുമെന്നും സ്പാനിഷ് പ്രധാന മന്ത്രി പെഡ്രോ സാഞ്ചെസ് അറിയിച്ചു. അതിനാല്‍ ധൈര്യമായി കുട്ടികളെ സ്‌കൂളുകളിലേക്ക് അയക്കാമെന്നും പ്രധാന മന്ത്രി രക്ഷകര്‍ത്താക്കളോട് ആവശ്യപ്പെട്ടു.