നിങ്ങളുടെ പണം സുരക്ഷിതം. ഇടപാടുകൾക്ക് ഭയക്കേണ്ട എന്ന് paytm.
ന്യൂഡല്‍ഹി: തങ്ങളുടെ ഇടപാടുകാരുടെ പണം പൂര്‍ണ്ണമായും സുരക്ഷിതമാണെന്ന് ഇന്ത്യയിലെ പ്രമുഖ ഡിജിറ്റല്‍ പേയ്മെന്‍റ് ആപ്പായ പേടിഎം. ആപ്പ് പ്ലേസ്റ്റോറില്‍ നിന്നും നീക്കം ചെയ്തതിന് പിന്നാലെയാണ് പേടിഎം അധികൃതരുടെ പ്രതികരണം. ഉപയോക്താക്കള്‍ക്ക് വാതുവെപ്പിന് സൗകര്യമൊരുക്കുന്ന ഓണ്‍ലൈന്‍ ഗെയിമുകള്‍ കളിക്കാന്‍ സൗകര്യമൊരുക്കിയെന്ന് ചൂണ്ടിക്കാട്ടിയാണ് പേടിഎം ആപ്പിനെ പ്ലേസ്റ്റോറില്‍ നിന്ന് ഗൂഗ്ള്‍ പുറത്താക്കിയത്.
ഇതിന് മറുപടിയുമായി പേടിഎം അധികൃതര്‍ ട്വിറ്ററിലെത്തി. ‘നിങ്ങളുടെ എല്ലാവരുടേയും പണം പൂര്‍ണ്ണമായും സുരക്ഷിതമാണ്. പഴയതുപോലെ തന്നെ ആപ്പിലെ സേവനങ്ങള്‍ ആസ്വദിക്കാനും സാധിക്കും.’–കമ്ബനി അവരുടെ ഔദ്യോഗിക ട്വിറ്റര്‍ ഹാന്‍റിലിലൂടെ അറിയിച്ചു.
പ്രതിമാസം അഞ്ച് കോടിയിലധികം സജീവ ഇടപാടുകാരാണ് പേടിഎമ്മിനുള്ളതെന്ന് കമ്ബനി അവകാശപ്പെടുന്നുണ്ട്. ട്വിറ്റര്‍ യൂസര്‍മാരാണ് പേടിഎം പ്ലേസ്റ്റോറില്‍ കാണാനില്ലെന്ന് ആദ്യമായി റിപ്പോര്‍ട്ട് ചെയ്തത്. പേടിഎം വാലറ്റും, ഫസ്റ്റ് ഗെയിംസ് ആപ്പുമാണ് പ്ലേസ്റ്റോറില്‍ നിന്ന് നീക്കംചെയ്തത്. പേടിഎം ഫോര്‍ ബിസിനസ്, പേടിഎം മാള്‍, പേടിഎം മണി എന്നിവയെല്ലാം പ്ലേ സ്റ്റോറില്‍ ഇപ്പോഴും ലഭ്യമാണ്. അതേസമയം, ആപ്പിള്‍ ആപ് സ്റ്റോറില്‍ ആപ്ലിക്കേഷന്‍ ഇപ്പോഴും ലഭ്യമാണ്.
പുതിയ ചൂതാട്ട നയങ്ങളുടെ ഭാഗമായാണ് ഗൂഗ്ള്‍ ആപ്പ് നീക്കം ചെയ്തത്. ഐ. പി.എല്‍ മത്സരം തുടങ്ങാനിരിക്കെയാണ് ഗൂഗ്ളിന്റെ നടപടിയെന്നതും ശ്രദ്ദേയമാണ്. പുതിയ ചൂതാട്ട നയങ്ങളെ കുറിച്ച്‌ കമ്ബനി ബ്ലോഗിലൂടെ വിശദീകരിച്ചു. ഓണ്‍ലൈന്‍ കാസിനോ തങ്ങള്‍ അനുവദിക്കില്ലെന്നും സ്പോര്‍ട്സ് വാതുവെപ്പുകള്‍ക്ക് സൗകര്യമൊരുക്കുന്ന ചൂതാട്ട ആപ്പുകളെ പിന്തുണക്കില്ലെന്നും ഗൂഗ്ള്‍ അറിയിച്ചു.
ഉപയോക്താവിന് പണം സമ്മാനം നല്‍കുന്ന പേയ്ഡ് ഗെയിമുകള്‍ക്കായുള്ള പ്രത്യേക വെബ് സൈറ്റ് ലിങ്കുകള്‍ പ്ലേസ്റ്റോറിലെ ഒരു ആപ്പിന് നല്‍കാന്‍ അനുവാദമില്ലെന്നും അത് തങ്ങളുടെ പോളിസിക്ക് വിരുദ്ധമാണെന്നും ബ്ലോഗില്‍ പറയുന്നുണ്ട്. ഉപഭോക്താക്കള്‍ക്ക് അപകടങ്ങള്‍ ഉണ്ടാകുന്നത് ഒഴിവാക്കാനാണ് ഗൂഗ്ള്‍ പുതിയ നയങ്ങള്‍ അവതരിപ്പിച്ചത്. ചട്ടം ലംഘിക്കുന്നതായി ശ്രദ്ധയില്‍ പെട്ടതോടെ ഡെവലപ്പറെ അക്കാര്യം അറിയിച്ചു. നിയമങ്ങള്‍ കൃത്യമായി പാലിക്കപ്പെടും വരെ ആപ്പ് പ്ലേസ്റ്റോറിലുണ്ടാവില്ല”. -ഗൂഗ്ള്‍ വ്യക്തമാക്കി.
