ഉത്സവ സീസണിൽ ഇ-കൊമേഴ്സ് സ്ഥാപനങ്ങള്‍ക്ക് ചട്ടലംഘനവുമായി ബന്ധപ്പെട്ട് കേന്ദ്ര സര്‍ക്കാരിന്റെ നോട്ടീസ്
ഒരുമാസം നീണ്ടുനിൽക്കുന്ന ഉത്സവകാല വിലക്കിഴിവ് വിൽപന നടക്കുന്നതിനിടെയാണ് ഇ-കൊമേഴ്സ് കമ്പനികൾക്ക് സർക്കാർ നോട്ടീസ് അയച്ചത്. ഉത്പന്നം നിര്‍മിച്ച രാജ്യം പ്രദർശിപ്പിക്കാത്തത് എന്തുകൊണ്ടാണെന്ന് 15 ദിവസത്തിനുള്ളിൽ വിശദീകരണമെന്ന് സർക്കാർ നോട്ടീസിൽ ആവശ്യപ്പെട്ടു.
ഡൽഹി: ഉത്പന്നങ്ങളിൽ ഏത് രാജ്യത്തിൽനിന്നുള്ളതാണെന്ന് പ്രദർശിപ്പിക്കണമെന്ന ചട്ടം പാലിക്കാത്തതിനെ തുടർന്ന് ഇ-കൊമേഴ്സ് ഭീമന്മാരായ ആമസോൺ, ഫ്ലിപ്കാർട്ട് എന്നിവയ്ക്ക് കേന്ദ്ര സർക്കാർ നോട്ടീസ് അയച്ചു. ഒരുമാസം നീണ്ടുനിൽക്കുന്ന ഉത്സവകാല വിലക്കിഴിവ് വിൽപന നടക്കുന്നതിനിടെയാണ് ഇ-കൊമേഴ്സ് കമ്പനികൾക്ക് സർക്കാർ നോട്ടീസ് അയച്ചത്. ഉത്പന്നം നിര്‍മിച്ച രാജ്യം പ്രദർശിപ്പിക്കാത്തത് എന്തുകൊണ്ടാണെന്ന് 15 ദിവസത്തിനുള്ളിൽ വിശദീകരണമെന്ന് സർക്കാർ നോട്ടീസിൽ ആവശ്യപ്പെട്ടു.
ഇത് വ്യക്തമായ ചട്ടലംഘമാണെന്നും ആദ്യത്തെ ലംഘനത്തിന് 25,000 രൂപ വരെ പിഴ ഈടാക്കാമെന്നും ഉപഭോക്തൃ കാര്യ വകുപ്പ്, ഭക്ഷ്യ, പൊതുവിതരണ മന്ത്രാലയം അറിയിച്ചു. ആവർത്തിച്ചുള്ള ലംഘനങ്ങൾക്ക് 50,000 രൂപ പിഴയോ തടവോ ആണ് ശിക്ഷ. ഇ-കൊമേഴ്സ് സ്ഥാപനങ്ങള്‍ നിലവിലെ വില്‍പന ചട്ടം ലഘിച്ചതായി ഉപഭോക്തൃകാര്യ മന്ത്രാലയവും ഭക്ഷ്യ-പൊതുവിതരണ വകുപ്പും നോട്ടീസിൽ വ്യക്തമാക്കി.
2011ലെ ലീഗൽ മെട്രോളജി (പാക്കേജ് ചെയ്‌ത ചരക്കുകൾ) ചട്ടപ്രകാരം ഡിജിറ്റൽ പ്ലാറ്റ്ഫോമുകളിൽ ചില ഇ-കൊമേഴ്സ് സ്ഥാപനങ്ങൾ ഉത്പന്നങ്ങൾ ഏത് രാജ്യത്തിൽനിന്നുള്ളതാണെന്ന ചട്ടം ലംഘിക്കുന്നതായി കണ്ടെത്തിയതായി നോട്ടീസിൽ പറഞ്ഞു.
ഫ്ലിപ്കാർട്ട് ഇന്ത്യ പ്രൈവറ്റ് ലിമിറ്റഡിനും ആമസോൺ ഡവലപ്മെന്റ് സെന്റർ ഇന്ത്യ പ്രൈവറ്റ് ലിമിറ്റഡിനും അയച്ച നോട്ടീസുകൾ പ്രകാരം എല്ലാ നിർബന്ധിത പ്രഖ്യാപനങ്ങളും ഇ-കൊമേഴ്സ് ഇടപാടുകൾക്ക് ഉപയോഗിക്കുന്ന ഡിജിറ്റൽ, ഇലക്ട്രോണിക് നെറ്റ്‌വർക്കിൽ പ്രദർശിപ്പിക്കേണ്ടതുണ്ടെന്ന് ഉറപ്പാക്കേണ്ടതുണ്ടെന്ന് ചൂണ്ടികാട്ടി. സെപ്റ്റംബര്‍ 30നകം സ്ഥാപനങ്ങള്‍ നിയമം നടപ്പാക്കണമെന്ന് കഴിഞ്ഞ ജൂലായിലാണ് കേന്ദ്രം നിര്‍ദേശിച്ചത്.
