ജിയോ 5ജി സ്മാര്‍ട്ട്ഫോണുകൾ ഇനി 2,500 രൂപ വിലയിൽ എത്തുന്നു
കൊച്ചി: 5 ജി സ്മാര്‍ട്ട്ഫോണുകൾ ഏറ്റവും കുറഞ്ഞ വിലയിൽ ഉപഭോക്താക്കളിൽ എത്തിയ്ക്കാൻ ഒരുങ്ങുകയാണ് ജിയോ. 2,500 രൂപ മുതൽ 3,000 രൂപ വരെ വിലയിൽ സ്മാര്‍ട്ട് ഫോണുകൾ വിപണിയിൽ എത്തിയ്ക്കാൻ ആണ് പദ്ധതി.
ജിയോ അധികൃതര്‍ ആണ് ഇക്കാര്യം വ്യക്തമാക്കിയത്. 4 ജി ലഭ്യമായിരുന്നിട്ടും നിലവിൽ 20-മുതൽ 30 കോടി വരെ ഉപഭോക്താക്കൾ 2ജി സാങ്കേതിക വിദ്യ ഉപയോഗിയ്ക്കുന്നുണ്ട് എന്നാണ് കണക്കുകൂട്ടൽ. ഈ ഉപഭോക്താക്കളെയാണ് ജിയോ ലക്ഷ്യമിടുന്നത്.
5,000 രൂപയിൽ താഴെയുള്ള ഫോണുകൾ പുറത്തിറക്കി അഫോര്‍ഡബ്ൾ ഫോണുകളുടെ വിപണി കൈയടക്കുകയാണ് ലക്ഷ്യം.
നിലവിൽ ഇന്ത്യയിൽ 5ജി സ്മാര്‍ട്ട്ഫോണുകൾക്ക് 27,000 രൂപ മുതലാണ് വില.
1, 500 രൂപയ്ക്ക് ജിയോ ഫോണുകൾ വാങ്ങാൻ തയ്യാറായവര്‍ക്ക് സൗജന്യ 4ജി സേവനങ്ങൾ നൽകാൻ ജിയോ തയ്യാറായിരുന്നു. ആദ്യമായാണ് ഒരു ടെികോം കമ്പനി ഇത്തരം ഒരു ഓഫര്‍ ഉപഭോക്താക്കൾക്ക് നൽകുന്നത്.
ഇതേ തന്ത്രങ്ങൾ തന്നെ 5ജിയിലും ആധിപത്യം നേടാൻ ജിയോ പ്രയോഗിച്ചേക്കും. ഇന്ത്യ 5ജിയിൽ എത്തി നിൽക്കുന്ന ഈ കാലഘട്ടത്തിൽ 2ജി ഫീച്ചര്‍ ഫോണുകൾ ഉപയോഗിയ്ക്കുന്ന 30 കോടിയോളം വരുന്ന ജനങ്ങൾ അഫോര്‍ഡബ്ൾ സ്മാര്‍ട്ട്ഫോണുകളിലേയ്ക്ക് മാറുന്നതിൻെറ പ്രാധാന്യം റിലയൻസ് ജിയോ മേധാവി മുകേഷ് അംബാനി 43-ാം വാര്‍ഷിക യോഗത്തിൽ സൂചിപ്പിച്ചിരുന്നു.
ജിയോ പ്ലാറ്റ്‍ഫോമിൽ 33,737 കോടി രൂപ ഗൂഗിൾ നിക്ഷേപിയ്ക്കുമെന്നും കമ്പനിയുടെ 7.7 ശതമാനം ഓഹരികൾ വാങ്ങുമെന്നും അംബാനി സൂചിപ്പിച്ചിരുന്നു. കമ്പനിയുമായി ചേര്‍ന്ന് ആൻഡ്രോയിഡ് സ്മാര്‍ട്ട്ഫോണുകൾ പുറത്തിറക്കുകയാണ് ലക്ഷ്യം .
