വാട്സ്ആപ്പ് ബിസിനെസ്സ് ഉപയോഗിക്കാൻ പണം കൊടുക്ക്ണം – ഫേസ്ബുക്!
ഇന്ത്യയില്‍ ഏറ്റവും കൂടുതല്‍ ഉപയോഗിക്കപ്പെടുന്ന ആപ്പുകളില്‍ മുമ്പനാണ് വാട്സ്ആപ്പ്. ഭീമന്‍തുക നല്‍കി ഫേസ്ബുക്ക് സ്വന്തമാക്കിയ ഈ ജനപ്രിയ മെസ്സേജിങ് ആപ്പ് ഉപയോഗിക്കുന്നവരില്‍ പലര്‍ക്കും ഇപ്പോഴും ഒരു സംശയം ബാക്കിയുണ്ട്. മാതൃകമ്പനിയായ ഫേസ്ബുക്കിന് വാട്സ്ആപ്പ് കൊണ്ട് എന്താണ് ഗുണം. ഇന്‍സ്റ്റഗ്രാമും ഫേസ്ബുക്കും പരസ്യങ്ങളിലൂടെയും മറ്റും വരുമാനം കണ്ടെത്തുമ്പോൾ വാട്സ്ആപ്പ് യാതൊരു പരസ്യങ്ങളുമില്ലാതെ മികച്ച സേവനം നല്‍കി മുന്നോട്ടുപോകുന്നു. ഇതുകൊണ്ട് എന്താണ് ലാഭം…?
എന്നാല്‍, വാട്ട്‌സ്‌ആപ്പില്‍ നിന്ന് വരുമാനം നേടാനുള്ള പദ്ധതിയുടെ ഭാഗമായി, പുതിയ നീക്കത്തിനൊരുങ്ങുകയാണ് ഫേസ്ബുക്ക്.തങ്ങളുടെ ഉപഭോക്താക്കളുമായി സംവദിക്കാന്‍ വാട്സ്ആപ്പ് സേവനം ഉപയോഗിക്കുന്ന ബിസിനസുകള്‍ക്കായി ആപ്ലിക്കേഷനില്‍ ഇ-കൊമേഴ്‌സ് ഓപ്ഷനുകളും ഹോസ്റ്റിംഗ് സേവനങ്ങളും ആരംഭിക്കുമെന്ന് ഫേസ്ബുക്ക് വ്യക്തമാക്കി. വൈകാതെ ‘വാട്സ്ആപ്പ് ബിസിനസ്’ ആപ്പ് ഉപയോഗിക്കുന്നവരില്‍ നിന്നും പണമീടാക്കി തുടങ്ങുമെന്നും ഫേസ്ബുക്ക് മുന്നറിയിപ്പ് നല്‍കുന്നുണ്ട്.
മൊത്തത്തില്‍, ഷോപ്പിംഗ്, ഫേസ്ബുക്ക് ഹോസ്റ്റിംഗ് സേവനങ്ങള്‍, ബിസിനസ് സെയില്‍സ് എന്നീ മൂന്ന് വരുമാന സ്ട്രീമുകളാണ് ഫേസ്ബുക്ക് വാട്സ്ആപ്പില്‍ നിന്നും പ്രതീക്ഷിക്കുന്നത്. പുതിയ മാറ്റം പ്രകാരം ബിസിനസുകള്‍ക്ക് വാട്സ്ആപ്പില്‍ അവരുടെ ഉത്പന്നങ്ങള്‍ വില്‍ക്കാന്‍ സാധിക്കും. ഫേസ്ബുക്ക് ഷോപ്സ് വഴിയാകും വില്‍പ്പന. ‘ലഭ്യമായ ഉല്‍‌പ്പന്നങ്ങള്‍ പരിശോധിക്കുന്നതിനും ചാറ്റില്‍ നിന്നുതന്നെ ഉപയോക്താക്കള്‍ക്ക് സാധനങ്ങള്‍ വാങ്ങാനുമുള്ള സൗകര്യങ്ങള്‍ വിപുലീകരിക്കുമെന്നും ഫേസ്ബുക്ക് വ്യക്തമാക്കി.
മറ്റൊരു സേവനം ഫേസ്ബുക്ക് ഹോസ്റ്റിങ് ആണ്. ബിസിനസുകള്‍ക്ക് വാടസ്ആപ്പ് മെസ്സേജുകള്‍ മികച്ച രീതിയില്‍ മാനേജ് ചെയ്യാനുള്ള ഒാപ്ഷനാണിത്. വാട്സ്ആപ്പ് ബിസിനസ് ഉപയോഗിക്കുന്ന ചെറുകിട – ഇടത്തര ബിസിനസുകാര്‍ക്ക് അവരുടെ ചാറ്റ് ഹിസ്റ്ററിയും മെസ്സേജുകളും ഫേസ്ബുക്ക് സെര്‍വറുകകളില്‍ സൂക്ഷിക്കാനുള്ള സൗകര്യം ഇതിലൂടെ ലഭിക്കും.
വാട്സ്ആപ്പ് ബിസിനസിന് പണമീടാക്കാനുള്ള കാരണവും ഫേസ്ബുക്ക് വെളിപ്പെടുത്തുന്നുണ്ട്. രണ്ട് ബില്യണിലധികം വരുന്ന ആളുകള്‍ക്ക് സൗജന്യമായി അതീവ സുരക്ഷയോടെയുള്ള ചാറ്റിങ്, കോളിങ് അടക്കമുള്ള മികച്ച സൗകര്യങ്ങള്‍ വാട്സ്ആപ്പ് ഒരുക്കുമ്പോൾ പണമടച്ചുള്ള സേവനം അവതരിപ്പിക്കുക വഴി തങ്ങളുടെ സ്വന്തം ബിസിനസും കെട്ടിപ്പടുക്കുന്നത് തുടരാന്‍ കഴിയുമെന്നാണ് ഫേസ്ബുക്കിന്റെ പ്രതികരണം.
