പേയ്‌മെന്റ് നടത്താം:ക്രെഡിറ്റ് കാർഡിന്റെ ആവശ്യം ഇല്ല
കൊച്ചി: ക്രെഡിറ്റ് കാർഡ് കയ്യിൽ കൊണ്ടുനടക്കാതെ ഇനി എളുപ്പത്തിലും വേഗത്തിലും പേയ്മെന്റുകൾ നടത്താനാകും. പൊതുമേഖല ബാങ്കായ പഞ്ചാബ് നാഷണൽ ബാങ്ക് (പി‌എൻ‌ബി) ആണ് ക്രെഡിറ്റ് കാർഡിന്റെ ഡിജിറ്റൽ പതിപ്പായ ഇ-ക്രെഡിറ്റ് കാർഡ് പുറത്തിറക്കിയത്. പിഎന്‍ബി ഉപഭോക്താക്കള്‍ക്ക് മാത്രമാണ് ഈ സൗകര്യം ലഭിക്കുക.ക്രെഡിറ്റ് കാര്‍ഡ് കയ്യിൽ ഇല്ലെങ്കിൽ ഇ-കൊമേഴ്‌സ് പ്ലാറ്റ്‌ഫോമിലും പിഒഎസിലും ഇടപാടുകള്‍ നടത്താമെന്നതാണ് ഇ-ക്രെഡിറ്റ് കാര്‍ഡിന്റെ പ്രധാന ഗുണം. പിഎന്‍ബി ജീനീ മൊബൈൽ ആപ്ലിക്കേഷൻ ഉപയോഗിച്ചാണ് ഇ-ക്രെഡിറ്റ് കാർഡ് പ്രവർത്തിക്കുന്നത്. ആപ്പിലെ ഇ-ക്രെഡിറ്റ് സൗകര്യം എന്ന ഓപ്ഷനിൽ ക്ലിക്ക് ചെയ്ത് ഉപഭോക്താക്കൾക്ക് ഇ-ക്രെഡിറ്റ് കാര്‍ഡ് വിവരങ്ങള്‍ അറിയാനും കാർഡ് ആക്സസ് ചെയ്യാനും കഴിയും.കാര്‍ഡ് ആക്റ്റിവേറ്റ് ചെയ്യാനും എടിഎമ്മിലെ ഇടപാട് പരിധി ഉയര്‍ത്താനും ഇ-കൊമേഴ്‌സ്, പിഒഎസ്, കോണ്‍ടാക്റ്റ്‌ലെസ് പേയ്‌മെന്റ് തുടങ്ങിയ ഇടപാടുകള്‍ക്കും ജീനീ ആപ്പ് ഉപയോഗിക്കാം. അന്താരാഷ്ട്ര, ആഭ്യന്തര ഉപയോഗത്തിനായി കാർഡ് സജീവമാക്കുന്നതിനും പി‌എൻ‌ബി ജീനി ആപ്പ് സഹായിക്കും. നിലവിലെ പിഎന്‍ബി ഉപഭോക്താക്കള്‍ ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവിടങ്ങളിൽനിന്ന് പിഎന്‍ബി ജീനീ ആപ്പ് അപ്‌ഡേറ്റ് ചെയ്താല്‍ മതി.
