നോക്കിയ 5.3 സ്മാർട്ട്ഫോണിന്റെ വില കുറച്ചു, ഇപ്പോൾ 12,999 രൂപ മാത്രം  

കഴിഞ്ഞ വർഷം അഗസ്റ്റിലാണ് എച്എംഡി ഗ്ലോബലിന്റെ ഉടമസ്ഥതയിലുള്ള ഫിന്നിഷ് സ്മാർട്ട്ഫോൺ ബ്രാൻഡ് നോക്കിയ അല്പകാലത്തെ ഇടവേളയ്ക്ക് ശേഷം പുത്തൻ സ്മാർട്ഫോണുകൾ വിപണിയിലെത്തിച്ചത്. 5.3, C3 എന്നീ പേരുകളിൽ മിഡ്റേഞ്ച്, ബജറ്റ് സ്മാർട്ട്ഫോണുകളും, നോക്കിയ 125, നോക്കിയ 150 (2020) എന്നീ ഫീച്ചർ ഫോണുകളുമാണ് കമ്പനി വില്പനക്കെത്തിച്ചത്. ഇതിൽ മിഡ്റേഞ്ച് സ്മാർട്ട്ഫോൺ ആയ 5.3-യുടെ വില നോക്കിയ കുറച്ചു.

1000 രൂപയാണ് നോക്കിയ കുറിച്ചിരിക്കുന്നത്. ഇപ്പോൾ 4 ജിബി റാം + 64 ജിബി ഓൺബോർഡ് സ്റ്റോറേജ് പതിപ്പിന് 12,999 രൂപയും 6 ജിബി റാം + 64 ജിബി ഓൺബോർഡ് സ്റ്റോറേജ് പതിപ്പിന് 14,499 രൂപയുമാണ് വില. സിയാൻ, സാൻഡ്, ചാർക്കോൾ എന്നിങ്ങനെ 3 നിറങ്ങളിൽ വില്പനക്കെത്തിയിരിക്കുന്ന നോക്കിയ 5.3-യ്ക്ക് 1600×720 പിക്സലുള്ള 6.55 ഇഞ്ച് എച്ഡി+ ഡിസ്പ്ലേയാണ്. ക്വാൽകോം സ്നാപ്ഡ്രാഗൺ 665 പ്രോസസറാണ്. സ്റ്റോക്ക് ആൻഡ്രോയിഡ് ആണ് ഓപ്പറേറ്റിംഗ് സിസ്റ്റം. 2 ദിവസം വരെ ബാറ്ററി ലൈഫുണ്ട് എന്ന് നോക്കിയ അവകാശപ്പെടുന്ന 4000mAh ബാറ്ററി ആണ് നോക്കിയ 5.3-യ്ക്ക്.

13 മെഗാപിക്സൽ പ്രൈമറി ലെൻസ് (എഫ്/1.8 അപ്പർച്ചർ), 5 മെഗാപിക്സൽ വൈഡ് ആംഗിൾ ലെൻസ്, 2 മെഗാപിക്സൽ ഡെപ്ത് സെൻസർ, 2 -മെഗാപിക്സൽ മാക്രോ ഷൂട്ടർ എന്നിവ ചേർന്ന ക്വാഡ് കാമറ സെറ്റപ്പ് ആണ് നോക്കിയ 5.3-യ്ക്ക്. എൽഇഡി ഫ്ലാഷും മെയിൻ ക്യാമറയ്ക്കൊപ്പമുണ്ട്. സെൽഫികൾക്കും, വീഡിയോ കോളിംഗിനുമായി 8 മെഗാപിക്‌സലിന്റെ സെൽഫി ക്യാമറയാണ്.

5.3-യോടൊപ്പം വില്പനക്കെത്തിയ C3യുടെ വില ഡിസംബറിൽ തന്നെ നോക്കിയ കുറച്ചിരുന്നു. 2 ജിബി റാം + 16 ജിബി ഓൺബോർഡ് സ്റ്റോറേജ് പതിപ്പിന് 7,499 രൂപയും 3 ജിബി റാം + 32 ജിബി ഓൺബോർഡ് സ്റ്റോറേജ് പതിപ്പിന് 8,999 രൂപയും ആയിരുന്നു നോക്കിയ C3-യുടെ ലോഞ്ച് വില. 500 രൂപ കുറച്ച് 6,999 ആണ് 2 ജിബി റാം പതിപ്പിന്റെ പുതിയ വില. 3 ജിബി റാം പതിപ്പിന്റെ വില അതേ സമയം 1,000 രൂപ കുറച്ച് ഇപ്പോൾ 7,999 രൂപയാണ്.

നോർഡിക് ബ്ലൂ, സാൻഡ് എന്നിങ്ങനെ രണ്ട് നിറങ്ങളിൽ വില്പനക്കെത്തിയിരിക്കുന്ന നോക്കിയ C3-യ്ക്ക് 5.99-ഇഞ്ച് എച്ഡി+ (720×1,440 പിക്സൽ) ഐപിഎസ് ഡിസ്പ്ലേയാണ്. ഒക്ട-കോർ യൂനിസെക് SC9863A SoC പ്രോസസ്സർ ആണ് കരുത്ത്. 8 മെഗാപിക്സൽ സിംഗിൾ പിൻ ക്യാമറയും, 5 മെഗാപിക്സൽ ഫ്രന്റ് കാമറയുമാണ് നോക്കിയ C3-യ്ക്ക്. 3,040mAh കപ്പാസിറ്റിയുള്ള ബാറ്ററിയാണ് നോക്കിയ C3-യ്ക്ക്.