5ജി തൂത്തു വാരുമെന്ന് റിപ്പോര്‍ട്ട് ; വരാന്‍ പോകുന്നത് ജിബികളുടെ കാലം
2027-ഓടെ രാജ്യത്തെ നെറ്റ് വർക്ക് സബ്സ്ക്രിപ്ഷനുകളിൽ 40% 5ജി ആകുമെന്ന് റിപ്പോർട്ട്. ആഗോളതലത്തിൽ, 2027 ആകുമ്പോഴേക്കും 5G എല്ലാ സബ്‌സ്‌ക്രിപ്‌ഷനുകളുടെയും പകുതിയോളം വരുമെന്നും 4.4 ബില്യൺ സബ്സ്ക്രിപ്ഷനുകളിൽ ഒന്നാമതായിരിക്കും ഇതെന്നും എറിക്സൺ മൊബിലിറ്റി റിപ്പോർട്ട് ചെയ്യുന്നു.
നിലവിൽ ഇന്ത്യയിലെ ഏറ്റവും അപ്ഡേറ്റ‍ഡ് ആയതും പരക്കെ ഉപയോഗിക്കുന്നതും 4ജി കണക്ടിവിറ്റിയാണ്. ഇന്ത്യയിലെ കണക്ടിവിറ്റികളിൽ 68% ഉപഭോക്താക്കളും 4ജി യൂസ് ചെയ്യുന്നവരാണ്. എന്നാൽ 2027 ഓടെ ഇത് 55% ആയി കുറയുമെന്ന് പ്രതീക്ഷിക്കുന്നു. കണക്കുകൾ അനുസരിച്ച് 2027 ൽ 700 ദശലക്ഷം സബ്സ്ക്രിപ്ഷനുകളായി കുറയുമെന്നും 5ജി ലോഞ്ച് ചെയ്തതിനു ശേ‌ഷം വരിക്കാർ കൂട്ടത്തോടെ അങ്ങോട്ട് മാറുമെന്നും റിപ്പോർട്ടിൽ പറയുന്നു.
രാജ്യത്ത് 5ജി നെറ്റ്‌വർക്കുകളുടെ വാണിജ്യ ഔദ്യോഗിക പ്രഖ്യാപനം 2022-ന്റെ രണ്ടാം പകുതിയിൽ ഉണ്ടാകുമെന്നാണ് ഇപ്പോഴത്തെ വിവരം. ഇത് കുറച്ചു കൂടി മെച്ചപ്പെട്ട മൊബൈൽ ബ്രോഡ്‌ബാൻഡ് സംവിധാനമായിരിക്കും ഉപഭോക്താക്കൾക്ക് നൽകുക. 2027 അവസാനത്തോടെ ഇന്ത്യയിലെ മൊബൈൽ സബ്‌സ്‌ക്രിപ്‌ഷനുകളുടെ ഏകദേശം 39% 5ജി ആയിരിക്കും ഉണ്ടാവുക.
2021-നും 2027-നും ഇടയിൽ ഇന്ത്യയിലെ മൊത്തം മൊബൈൽ ഡാറ്റാ ട്രാഫിക്ക് 4 മടങ്ങ് വർദ്ധിക്കുമെന്ന് എറിക്സൺ, നെറ്റ്‌വർക്ക് എവല്യൂഷൻ, എസ് ഇ എ , ഓഷ്യാനിയ ഇന്ത്യ എന്നിവയുടെ തലവൻ ഡോക്ടർ തിയോവ് സെങ് പറഞ്ഞു. സ്മാർട്ഫോൺ ഉപയോക്താക്കളുടെ എണ്ണവും സ്മാർട്ഫോൺ ഉപയോഗിക്കുന്ന സമയത്തിലും വൻ വർധനവാണ് രേഖപ്പെടുത്തി വരുന്നത്. ശരാശരി കണക്കുകളെടുക്കുമ്പോൾ ഒരാളുടെ മൊബൈൽ ഫോൺ ഉപയോഗം 2021-ൽ പ്രതിമാസം 20GB-ൽ നിന്ന് 2027-ൽ പ്രതിമാസം 50GB-ലേക്ക് വളരുമെന്ന് പ്രതീക്ഷിക്കുന്നതെന്നും തിയോവ് സെങ് കൂട്ടിച്ചേർത്തു.
