SBI ATM കളിൽ നിന്നും OTP നിശ്ചിത സമയത്തിനുള്ളിൽ ലഭിക്കാതത്തിനാൽ ഇടപാടുകൾ തടസപ്പെടുന്നു.
തൃശൂര്‍: പതിനായിരം രൂപക്ക് മുകളിലുള്ള തുക എസ്.ബി.ഐ എ.ടി.എമ്മിലൂടെ പിന്‍വലിക്കാന്‍ ഏര്‍പ്പെടുത്തിയ ഒ.ടി.പി (വണ്‍ ടൈം പാസ്വേഡ്) സംവിധാനം വലിയൊരു വിഭാഗം ഉപഭോക്താക്കള്‍ക്ക് പരീക്ഷണമാവുന്നു. സാങ്കേതിക പ്രശ്നങ്ങള്‍ കാരണം നിശ്ചിത സമയത്തിനകം ഒ.ടി.പി ലഭിക്കാതെ ഇടപാട് തടസ്സപ്പെടുന്നത് സംബന്ധിച്ച്‌ നിരവധി പരാതികളാണ് രാജ്യവ്യാപകമായി എസ്.ബി.ഐക്ക് ലഭിക്കുന്നത്.
പ്രശ്നം പരിഹരിക്കാന്‍ ശ്രമം നടക്കുകയാണ്. എ.ടി.എം വഴിയുള്ള തട്ടിപ്പ് തടയാനാണ് ഒ.ടി.പി ഏര്‍പ്പെടുത്തിയത്.10,000 രൂപക്ക് മുകളില്‍ എ.ടി.എമ്മില്‍നിന്ന് എടുക്കാന്‍ രാത്രി എട്ടു മുതല്‍ രാവിലെ എട്ടുവരെ ഒ.ടി.പി ഏര്‍പ്പെടുത്തിയത് കഴിഞ്ഞ ജനുവരിയിലാണ്. അടുത്ത പടിയായാണ് കഴിഞ്ഞമാസം 18 മുതല്‍ ഇത് 24 മണിക്കൂറും ബാധകമാക്കിയത്.
10,000 രൂപക്ക് മുകളിലുള്ള സംഖ്യ എ.ടി.എമ്മില്‍ ടൈപ്പ് ചെയ്താല്‍ ബാങ്കില്‍ രജിസ്റ്റര്‍ ചെയ്ത മൊബൈല്‍ നമ്ബറിലേക്ക് ഒ.ടി.പി വരും. ഇത് നിശ്ചിതസമയത്തിനകം എ.ടി.എമ്മില്‍ ടൈപ് ചെയ്താലേ പണം ലഭിക്കുകയുള്ളൂ. എന്നാല്‍, സംഖ്യ രേഖപ്പെടുത്തി നിശ്ചിത സമയത്തിനകം ഒ.ടി.പി ലഭിക്കുന്നില്ലെന്ന പരാതിയാണ് ഇപ്പോള്‍ വ്യാപകമാവുന്നത്. സുരക്ഷിതത്വത്തിനായി ഏര്‍പ്പെടുത്തിയ ഒ.ടി.പി സംവിധാനത്തിലെ പ്രശ്നങ്ങള്‍ എത്രയും വേഗം പരിഹരിക്കുമെന്ന് എസ്.ബി.ഐ എ.ടി.എം ചാനല്‍ വൃത്തങ്ങള്‍ ‘മാധ്യമ’ത്തോട് പറഞ്ഞു.
