സംസ്ഥാനത്തിന്റെ വൈദ്യുതി വിതരണ സംവിധാനത്തിൽ നിർണായക മാറ്റത്തിന് വഴിയൊരുക്കി കാസർഗോഡ് മുല്ലേരിയിൽ കെ.എസ്.ഇ.ബി.യുടെ ആദ്യ ബാറ്ററി എനർജി സ്റ്റോറേജ് സിസ്റ്റം (BESS) സജ്ജമായി. പകൽ സമയത്ത് ലഭിക്കുന്ന കുറഞ്ഞ നിരക്കിലുള്ള വൈദ്യുതിയും. അധിക സൗരോർജവും സംഭരിച്ച് വൈകുന്നേരങ്ങളിലും, രാത്രിയിലും ഡിമാൻഡ് ഉയരുമ്പോൾ ഗ്രിഡിലേക്ക് തിരികെ നൽകുകയാണ് പദ്ധതിയുടെ പ്രധാന ലക്ഷ്യം. വൈദ്യുതി ആവശ്യകത കൂടുന്ന സമയങ്ങളിൽ ഉയർന്ന വിലയ്ക്ക് പുറത്തുനിന്ന് വൈദ്യുതി വാങ്ങേണ്ടിവരുന്ന സാഹചര്യം കുറയ്ക്കാൻ ഈ സംവിധാനം സഹായിച്ചേക്കും. നിരവധി പദ്ധതികളാണ് ഇത്തരത്തിൽ കേരളത്തിലെ വിവിധ ജില്ലകളിലായി ഒരുങ്ങുന്നത്.
നാല് മണിക്കൂർ വരെ വൈദ്യുതി നൽകാംമുല്ലേരിയിലെ ബാറ്ററി സംഭരണ നിലയത്തിന് 15 മെഗാവാട്ട് ശേഷിയാണുള്ളത്. നാല് മണിക്കൂർ വരെ ഈ നിരക്കിൽ വൈദ്യുതി നൽകാൻ രൂപകൽപ്പന ചെയ്തിരിക്കുന്ന സംവിധാനത്തിന്റെ സംഭരണശേഷി മണിക്കൂറിൽ 60 മെഗാവാട്ട് (MWh) എന്ന നിലയിലാണ്. ഒരേക്കറോളം സ്ഥലത്ത്, കെ.എസ്.ഇ.ബി സബ്‌സ്റ്റേഷനു സമീപമാണ് പ്ലാന്റ് സ്ഥാപിച്ചിരിക്കുന്നത്.
പരീക്ഷണാടിസ്ഥാനത്തിൽ, തുടർച്ചയായ രണ്ട് ദിവസങ്ങളിൽ രാത്രിയിലെ ഉയർന്ന ഡിമാൻഡുള്ള സമയത്ത് മണിക്കൂറിൽ 60 മെഗാവാട്ട് വൈദ്യുതി, ഗ്രിഡിലേക്ക് നൽകിയതായി റിപ്പോർട്ടുകൾ വ്യക്തമാക്കുന്നു. എന്നാൽ ഈ പ്ലാന്റ് ഔദ്യോഗികമായി പ്രവർത്തനം ആരംഭിക്കുന്നതിന് മുമ്പ് ആവശ്യമായ പരിശോധനകൾ പൂർത്തിയാക്കി, അനുമതികൾ നേടേണ്ടതുണ്ട്.
വൈദ്യുതി വാങ്ങുന്നതിനുള്ള ചെലവ് കുറയ്ക്കുക ലക്ഷ്യം
വൈകുന്നേരങ്ങളിൽ വൈദ്യുതി ഡിമാൻഡ് കുത്തനെ ഉയരുമ്പോൾ വിപണിയിൽനിന്ന് വൈദ്യുതി വാങ്ങുന്നതിനുള്ള ചെലവും വർധിക്കാം. പകൽ സമയത്ത് താരതമ്യേന കുറഞ്ഞ നിരക്കിൽ ലഭിക്കുന്ന വൈദ്യുതി സംഭരിച്ച് പിന്നീട് ഉപയോഗിക്കുന്നതിലൂടെ ഈ വില വ്യത്യാസം പ്രയോജനപ്പെടുത്താനാണ് ബാറ്ററി സംവിധാനം ലക്ഷ്യമിടുന്നത്.
പദ്ധതി നടപ്പാക്കുന്നത് കേന്ദ്ര പൊതുമേഖലാ സ്ഥാപനമായ എൻ.എച്ച്.പി.സിയുടെ മേൽനോട്ടത്തിലാണ്. ഗുജറാത്ത് ആസ്ഥാനമായ ഓപ്പറ ഗ്രീൻ യാന പ്രൈവറ്റ് ലിമിറ്റഡാണ് നിർമാണം നിർവഹിച്ചത്. കരാർ പ്രകാരം, രാത്രിയിൽ ഉപയോഗിക്കുന്ന വൈദ്യുതിക്ക് യൂണിറ്റിന് 4.38 രൂപ നൽകണമെന്നാണ് റിപ്പോർട്ട്. കെ.എസ്.ഇ.ബിക്ക് ഭൂമി നൽകുന്നതൊഴികെ, നേരിട്ടുള്ള മൂലധനച്ചെലവ് വഹിക്കേണ്ടിവന്നിട്ടില്ലെന്നും റിപ്പോർട്ടിൽ പറയുന്നു. എന്നാൽ യഥാർഥ സാമ്പത്തിക നേട്ടം വിലയിരുത്താൻ സംഭരണനഷ്ടം, കരാർ വ്യവസ്ഥകൾ, പ്രവർത്തനച്ചെലവ് എന്നിവയും കണക്കിലെടുക്കേണ്ടി വരും.