ദേശീയപാത ടോള്‍ പ്ലാസകള്‍ക്ക് സമീപം താമസിക്കുന്ന സ്ഥിരം യാത്രക്കാര്‍ക്ക് ആശ്വാസമായി കേന്ദ്ര ഉപരിതല ഗതാഗത മന്ത്രാലയം. ടോള്‍ പ്ലാസകളുടെ 20 കിലോമീറ്റര്‍ ചുറ്റളവില്‍ താമസിക്കുന്ന സ്വകാര്യ വാഹന ഉടമകള്‍ക്കായി 1,500 രൂപ, 3,000 രൂപ നിരക്കുകളിലുള്ള പുതിയ വാര്‍ഷിക ഫാസ്ടാഗ് (FASTag) ലോക്കല്‍ പാസുകള്‍ നവംബര്‍ 1 മുതല്‍ നിലവില്‍ വരും. സാധാരണക്കാരായ സ്ഥിരം യാത്രക്കാരുടെ പ്രതിമാസ യാത്രാച്ചെലവ് ഗണ്യമായി കുറയ്ക്കാന്‍ സഹായിക്കുന്ന പദ്ധതിയാണിത്.
പുതിയ ഹൈവേ ടോള്‍ റൂളുകള്‍ദേശീയ പാതകളിലെ ടോള്‍ പ്ലാസകളുടെ 20 കിലോമീറ്റര്‍ ചുറ്റളവില്‍ താമസിക്കുന്നവര്‍ക്കായി പുതിയ ടോള്‍ പാസ് സൗകര്യം നവംബര്‍ 1 മുതല്‍ നിലവില്‍ വരും. അര്‍ഹരായവര്‍ക്ക് 1,500 രൂപയോ 3,000 രൂപയോ നിരക്കില്‍ വാര്‍ഷിക പാസ് ലഭിക്കും. വാലിഡായ ഫാസ്ടാഗ് ഉള്ളതും, സ്വകാര്യ ആവശ്യങ്ങള്‍ക്കായി ഉപയോഗിക്കുന്നതുമായ വാഹനങ്ങള്‍ക്ക് മാത്രമാണ് ഈ ആനുകൂല്യം ലഭിക്കുക.
എന്തുകൊണ്ടാണ് നിയമങ്ങള്‍ മാറുന്നു
വീടിനടുത്തുള്ള ടോള്‍ പ്ലാസകളിലൂടെ നിത്യേന യാത്ര ചെയ്യുന്നവര്‍ക്ക് യാത്ര കൂടുതല്‍ എളുപ്പമാക്കാനും, അവര്‍ക്ക് ടോള്‍ ഇനത്തിലുള്ള സാമ്പത്തിക ബാധ്യത കുറയ്ക്കാനുമാണ് റോഡ് ഗതാഗത- ദേശീയ പാതാ മന്ത്രാലയം ഈ പുതിയ മാറ്റം കൊണ്ടുവന്നിരിക്കുന്നത്.
1,500- 3000 രൂപ ആനുവല്‍ പാസ് ആര്‍ക്കൊക്കെ ലഭിക്കും
ടോള്‍ പ്ലാസയുടെ 20 കിലോമീറ്റര്‍ ചുറ്റളവില്‍ താമസിക്കുന്ന വ്യക്തികള്‍ക്കു മാത്രമാണ് ഈ പാസ് ലഭിക്കുക. വാണിജ്യേതര ആവശ്യങ്ങള്‍ക്കായി രജിസ്റ്റര്‍ ചെയ്ത, കൃത്യമായി പ്രവര്‍ത്തിക്കുന്ന ഫാസ്ടാഗ് ഉള്ള വാഹന ഉടമകള്‍ക്കെ അപേക്ഷിക്കാന്‍ കഴിയൂ.
ക്ലോസ്ഡ് ടോള്‍ പിരിവ് സംവിധാനം (closed toll collection system) ഉള്ള ഹൈവേകളിലോ, എക്‌സ്പ്രസ് വേകളിലോ ഈ പാസ് ലഭ്യമാകില്ല. അതുപോലെ, യാത്ര ചെയ്യാന്‍ സര്‍വീസ് റോഡുകളോ മറ്റ് സമാന്തര പാതകളോ ഉള്ള സ്ഥലങ്ങളിലെ താമസക്കാര്‍ക്കും ഈ ആനുകൂല്യത്തിന് അര്‍ഹതയില്ല.
നിരക്ക് നിശ്ചയിക്കുന്നത് എങ്ങനെടോള്‍ പ്ലാസ സ്ഥിതി ചെയ്യുന്ന പ്രദേശം മുന്‍സിപ്പല്‍ അല്ലെങ്കില്‍ ലോക്കല്‍ ടൗണ്‍ പരിധിയിലാണോ അല്ലയോ എന്നതിനെ അടിസ്ഥാനമാക്കിയാണ് വാര്‍ഷിക നിരക്ക് നിശ്ചയിച്ചിരിക്കുന്നത്:
- മുന്‍സിപ്പല്‍/ ലോക്കല്‍ ടൗണ്‍ പരിധിക്ക് പുറത്തുള്ള ടോള്‍ പ്ലാസ: 1,500 രൂപ (പ്രതിവര്‍ഷം)
- മുന്‍സിപ്പല്‍/ ലോക്കല്‍ ടൗണ്‍ പരിധിക്കുള്ളില്‍ സ്ഥിതി ചെയ്യുന്ന ടോള്‍ പ്ലാസ: 3,000 രൂപ (പ്രതിവര്‍ഷം)
എല്ലാ വര്‍ഷവും ഏപ്രില്‍ 1-ന് ഈ നിരക്കുകളില്‍ മാറ്റം വരുത്താന്‍ സര്‍ക്കാരിന് അധികാരമുണ്ട്. ഏത് ടോള്‍ പ്ലാസയില്‍ നിന്നാണോ പാസ് അനുവദിച്ചത്, ആ പ്രത്യേക ടോള്‍ പ്ലാസയില്‍ മാത്രമേ ഇത് ഉപയോഗിക്കാന്‍ സാധിക്കൂ. മറ്റ് ടോള്‍ പ്ലാസകളില്‍ ഇതിലൂടെ സൗജന്യ യാത്ര സാധ്യമല്ല.
പാസിന് അപേക്ഷിക്കാന്‍ ആവശ്യമായ രേഖകള്‍
- വാഹനത്തിന്റെ രജിസ്‌ട്രേഷന്‍ വിവരങ്ങള്‍.
- ആക്ടീവ് ആയിട്ടുള്ളതും കൊമേഴ്സ്യല് അല്ലാത്തതുമായ ഫാസ്ടാഗ്.
- വാഹന ഉടമ ടോള്‍ പ്ലാസയുടെ 20 കിലോമീറ്റര്‍ പരിധിയിലാണ് താമസിക്കുന്നത് എന്ന് തെളിയിക്കുന്ന രേഖകള്‍.
- വാഹനത്തിന്റെ നമ്പറും, അതുമായി ബന്ധിപ്പിച്ചിട്ടുള്ള മറ്റ് വിവരങ്ങളും.
- ഉപയോക്താവിന്റെ തിരിച്ചറിയല്‍ രേഖ.
റെഗുലര്‍ ഫാസ്ടാഗുകളില്‍ നിന്നുള്ള മാറ്റം
പുതിയ ലോക്കല്‍ പാസ് ഒരു പ്രത്യേക ടോള്‍ പ്ലാസയുടെ അടുത്ത് താമസിക്കുന്നവര്‍ക്ക് വേണ്ടി മാത്രമുള്ളതാണ്. ഇത് ആ ഒരു ടോള്‍ പ്ലാസയില്‍ മാത്രമേ പ്രവര്‍ത്തിക്കുകയുള്ളൂ. റെഗുലര്‍ ഫാസ്ടാഗ് ആനുവല്‍ പാസിന് 3,075 രൂപയാണ് വാര്‍ഷിക നിരക്ക്. ഇത് രാജ്യത്തുടനീളമുള്ള ദേശീയ പാതകളിലെയും, എക്‌സ്പ്രസ് വേകളിലെയും അര്‍ഹമായ ടോള്‍ പ്ലാസകളില്‍ ഉപയോഗിക്കാം. ഇത് പരമാവധി 200 യാത്രകള്‍ അല്ലെങ്കില്‍ ഒരു വര്‍ഷത്തെ വാലിഡിറ്റിയോടെ വരുന്നു.
മലയാളികള്‍ക്ക് ഗുണമാകുന്നത് എങ്ങനെ
ഈ ആനുകൂല്യം ഇന്ത്യ ഒട്ടാകെയാണെങ്കിലും മലയാളികള്‍ക്ക് ഇത് വലിയൊരു ആശ്വാസമാണ്. കേരളത്തില്‍ ടോള്‍ പ്ലാസകള്‍ക്ക് സമീപം താമസിക്കുകയും, ജോലിക്കോ സ്‌കൂളിലോ പോകുന്നതിനായി ദിവസവും ടോള്‍ പ്ലാസകള്‍ കടന്നുപോകേണ്ടി വരികയും ചെയ്യുന്ന ധാരാളം ആളുകളുണ്ട്. പ്രതിദിനം വലിയൊരു തുക ടോള്‍ നല്‍കുന്നതിന് പകരം ചെറിയൊരു വാര്‍ഷിക തുക അടച്ച് ഒരു വര്‍ഷത്തേക്ക് തടസങ്ങളില്ലാതെ യാത്ര ചെയ്യാന്‍ ഇത് അവരെ സഹായിക്കും. കേരളത്തില്‍ ടോള്‍ സംവിധാനവുമായി ബന്ധപ്പെട്ട് പലപ്പോഴും വിവാദങ്ങള്‍ പതിവാണ്.
ശ്രദ്ധിക്കേണ്ട കാര്യങ്ങള്‍
നവംബര്‍ 1 മുതലാണ് ഈ സൗകര്യം ആരംഭിക്കുന്നത്. അപേക്ഷിക്കുന്നതിന് മുന്‍പായി NHAI-യുടെയോ, അതത് ടോള്‍ പ്ലാസകളുടെയോ ഔദ്യോഗിക അറിയിപ്പുകള്‍ക്കും മാര്‍ഗനിര്‍ദ്ദേശങ്ങള്‍ക്കുമായി കാത്തിരിക്കുക.
നിങ്ങളുടെ വീട് ടോള്‍ പ്ലാസയുടെ 20 കി.മീ ചുറ്റളവിലാണോ എന്ന് കൃത്യമായി പരിശോധിച്ചു ഉറപ്പുവരുത്തുക.
നിങ്ങളുടെ വാഹനത്തിലെ ഫാസ്ടാഗ് ആക്ടീവ് ആണെന്നും, അത് കൊമേഴ്സ്യല് വാഹനമായിട്ടല്ല നല്‍കിയിരിക്കുന്നതെന്നും ഉറപ്പാക്കുക.
നിങ്ങള്‍ക്ക് യാത്ര ചെയ്യാന്‍ ടോള്‍ പ്ലാസ ഒഴിവാക്കിക്കൊണ്ടുള്ള മറ്റ് സര്‍വീസ് റോഡുകള്‍ ഉണ്ടോ എന്ന് പരിശോധിക്കുക. അങ്ങനെയുണ്ടെങ്കില്‍ പാസ് ലഭിക്കില്ല.