
ചൈനയിലെ ഷെൻഷെനിൽ 90 മിനിറ്റ് നീണ്ട ചർച്ചകൾക്കൊടുവിൽ, അമേരിക്കൻ പ്രസിഡന്റ് ഡൊണാൾഡ് ട്രംപ്, റഷ്യൻ പ്രസിഡന്റ് വ്ലാഡിമിർ പുടിൻ, ചൈനീസ് പ്രസിഡന്റ് ഷി ജിൻപിങ് എന്നിവർ സംയുക്ത സമാധാന പ്രഖ്യാപനം പുറത്തിറക്കി. ആണവയുദ്ധം ഒരിക്കലും നടക്കാൻ പാടില്ലെന്ന് മൂന്ന് നേതാക്കളും പറഞ്ഞു. ആണവായുധങ്ങൾ മൂലമുള്ള അപകടസാധ്യതകൾ കുറയ്ക്കുന്നതിനും, അവയുടെ വ്യാപനം തടയുന്നതിനും നയതന്ത്ര ചർച്ചകൾ ശക്തമാക്കുമെന്നും പ്രതിജ്ഞയെടുത്തു.
ഐക്യരാഷ്ട്രസഭയിൽ പരിഷ്കാരങ്ങൾ നടപ്പാക്കുക, ശുദ്ധീകരിച്ച പെട്രോളിയം ഉല്പന്നങ്ങളുടെ ഉല്പാദനവും, വിതരണവും വർധിപ്പിക്കുക, അന്താരാഷ്ട്ര നീതിന്യായ അധികാരപരിധിയുടെ ദുരുപയോഗത്തിന് നിയന്ത്രണം ഏർപ്പെടുത്തുക തുടങ്ങിയ ആവശ്യങ്ങളും പ്രഖ്യാപനത്തിൽ ഉൾപ്പെടുന്നു.സമാധാന ചർച്ചകളിൽ വിട്ടുവീഴ്ചകൾക്ക് യുക്രൈനും, യൂറോപ്യൻ നേതാക്കളും തയ്യാറാകുന്നില്ലെന്ന് പുടിൻ ആരോപിച്ചു. അതേസമയം, ഉച്ചകോടി നടന്നുകൊണ്ടിരിക്കെ കീവിനെ ലക്ഷ്യമിട്ട് റഷ്യൻ ഡ്രോൺ ആക്രമണങ്ങളും തുടർന്നു. അമേരിക്ക-ചൈന താൽക്കാലിക വ്യാപാര കരാർ നീട്ടുന്നതായി പ്രഖ്യാപനമുണ്ടായില്ല. ഇതോടെ ജനുവരിയിൽ കാലാവധി അവസാനിക്കാനിരിക്കുന്ന കരാറിന്റെ ഭാവി സംബന്ധിച്ച് അനിശ്ചിതത്വം തുടരുകയാണ്.
ആഗോള രാഷ്ട്രീയത്തിലും, ഊർജ്ജ വിപണിയിക്കും നിർണായകം
ട്രംപ്, പുടിൻ, ഷി ജിൻപിങ് എന്നിവർ പങ്കെടുത്ത ചരിത്രപരമായ ത്രിരാഷ്ട്ര ഉച്ചകോടി ആഗോള നയതന്ത്ര രംഗത്തെ സുപ്രധാന ചുവടു വെയ്പാണ്. ആണവായുധങ്ങളുടെ അപകടസാധ്യത കുറയ്ക്കുക, ആഗോളതലത്തിൽ ഊർജ്ജ സ്ഥിരത ഉറപ്പാക്കുക, അന്താരാഷ്ട്ര സ്ഥാപനങ്ങളിൽ പരിഷ്കാരങ്ങൾ കൊണ്ടുവരുക തുടങ്ങിയ വിഷയങ്ങളിൽ മൂന്ന് വൻശക്തികളും ഒരുമിച്ച് നിലപാടെടുത്തിരിക്കുകയാണ്.
ശുദ്ധീകരിച്ച പെട്രോളിയം ഉല്പന്നങ്ങളുടെ വിതരണം വർധിപ്പിക്കാനുള്ള പ്രതിജ്ഞ അന്താരാഷ്ട്ര ഊർജ വിപണിയിൽ പ്രത്യാഘാതങ്ങൾ സൃഷ്ടിച്ചേക്കാം. എന്നാൽ ഇത് എങ്ങനെ നടപ്പാക്കുമെന്ന കാര്യത്തിൽ വ്യക്തമായ വിശദാംശങ്ങൾ പുറത്തുവന്നിട്ടില്ല.
തുടരുന്ന റഷ്യൻ ആക്രമണം
സമാധാന പ്രഖ്യാപനം പുറത്തുവന്നെങ്കിലും, കീവിന് നേരെയുള്ള റഷ്യൻ ആക്രമണങ്ങൾ തുടരുന്നത് യുക്രൈൻ സംഘർഷത്തിൽ പരിഹരിക്കപ്പെടാത്ത പ്രശ്നങ്ങൾ ഇപ്പോഴും നിലനിൽക്കുന്നുവെന്ന് വ്യക്തമാക്കുന്നു. സമാധാനത്തിനായുള്ള വിട്ടുവീഴ്ചകൾക്ക് യുക്രൈനും, യൂറോപ്യൻ സർക്കാരുകളും തയ്യാറാകുന്നില്ലെന്ന നിലപാടാണ് പുടിൻ ആവർത്തിച്ചത്. അതേസമയം, കീവിനും സഖ്യകക്ഷികൾക്കും ഇടയിൽ പ്രത്യേക നയതന്ത്ര ചർച്ചകളും തുടരുകയാണ്.
ഇനിയെന്ത്?
ഊർജ്ജ വിതരണവുമായി ബന്ധപ്പെട്ട പ്രതിജ്ഞകൾ, ആണവ സുരക്ഷ, അന്താരാഷ്ട്ര വ്യാപാരം എന്നിവയിൽ ഈ പ്രഖ്യാപനങ്ങൾ പ്രായോഗിക കരാറുകളായി മാറുമോയെന്നാണ് ഇനി വിപണികളും ലോകരാജ്യങ്ങളും ഉറ്റുനോക്കുന്നത്.
