Auto Updates India: 2027 ഏപ്രില്‍ 1 മുതല്‍ രാജ്യത്ത് കര്‍ശനമായ CAFE 3 ( Corporate Average Fuel Efficiency Phase 3 ) ഇന്ധനക്ഷമത നിയമങ്ങള്‍ പ്രാബല്യത്തില്‍ വരുന്നു. കേന്ദ്ര ഊര്‍ജ്ജ മന്ത്രാലയം നടപ്പിലാക്കുന്ന ഈ പുതിയ നിയമം കാറുകളുടെ ശരാശരി മലിനീകരണ തോത് വന്‍തോതില്‍ കുറയ്ക്കാന്‍ നിര്‍മ്മാതാക്കളെ നിര്‍ബന്ധിതരാക്കും. എന്‍ജിന്‍ സാങ്കേതികവിദ്യ പരിഷ്‌കരിക്കുന്നതോടെ പെട്രോള്‍, ഡീസല്‍ കാറുകളുടെ വില ഉയരുമെങ്കിലും, ഉപഭോക്താക്കള്‍ക്ക് കൂടുതല്‍ മൈലേജ് ലഭിക്കാന്‍ ഇത് വഴിതെളിക്കും.CAFE 3 മാനദണ്ഡങ്ങള്‍ഈ മാറ്റങ്ങള്‍ വാഹന ഉടമകളെ അല്ല, വാഹന നിര്‍മ്മാതാക്കളെ നേരിട്ടു ബാധിക്കുന്നവയാണ്. പക്ഷെ ഇത് പരോക്ഷമായി ജനങ്ങളെയും ബാധിക്കും. ഇന്ത്യയിലെ വാഹന നിര്‍മ്മാതാക്കള്‍ നിര്‍മ്മിക്കുന്ന കാറുകളുടെ ശരാശരി ഇന്ധനക്ഷമത കൂട്ടാനും, കാര്‍ബണ്‍ ഉദ്വമനം വന്‍തോതില്‍ കുറയ്ക്കാനും ഉദ്ദേശിച്ചുള്ള നിയമമാണ് CAFE 3 (Corporate Average Fuel Efficiency Phase 3).
2027 ഏപ്രില്‍ 1 മുതലാണ് ഈ പുതിയ മാനദണ്ഡങ്ങള്‍ പ്രാബല്യത്തില്‍ വരുന്നത്. ഓരോ വാഹന നിര്‍മ്മാതാക്കളും വില്‍ക്കുന്ന വാഹനങ്ങളുടെ ശരാശരി മലിനീകരണ തോത് നിശ്ചിത പരിധിയില്‍ നിര്‍ത്തണം. നിയമം ലംഘിക്കുന്ന കമ്പനികള്‍ക്ക് ഭീമമായ പിഴ ലഭിക്കും.
പുതിയ വാഹനങ്ങളെയും പഴയ വാഹനങ്ങളെയും എങ്ങനെ ബാധിക്കും
പുതിയ വാഹനങ്ങള്‍: എന്‍ജിനുകളില്‍ പുതിയ സാങ്കേതികവിദ്യകള്‍ ഉള്‍പ്പെടുത്തേണ്ടി വരുന്നതിനാല്‍ പുതിയ പെട്രോള്‍, ഡീസല്‍ കാറുകളുടെ വില വര്‍ദ്ധിക്കും. കമ്പനികള്‍ക്ക് ശരാശരി മലിനീകരണ തോത് കുറയ്ക്കണമെങ്കില്‍ കൂടുതല്‍ ഇലക്ട്രിക് (EV), സ്‌ട്രോങ് ഹൈബ്രിഡ് (Strong Hybrid) വാഹനങ്ങള്‍ വില്‍ക്കേണ്ടി വരും. ഇന്ധനക്ഷമത കുറഞ്ഞ വലിയ പെട്രോള്‍/ ഡീസല്‍ എന്‍ജിന്‍ മോഡലുകള്‍ കമ്പനികള്‍ പിന്‍വലിച്ചേക്കാം. പുതിയതായി വിപണിയിലെത്തുന്ന കാറുകള്‍ക്ക് നിലവിലുള്ളവയേക്കാള്‍ ഉയര്‍ന്ന ഇന്ധനക്ഷമത ലഭിക്കുമെന്നത് ഉപയോക്താക്കള്‍ക്ക് നേട്ടമാകും.
