ദേശീയപാത വികസനത്തിന് പിന്നാലെ, ഇന്ത്യന്‍ നഗരങ്ങളിലെ റോഡ് കുഴികള്‍ക്കും രൂക്ഷമായ ഗതാഗതക്കുരുക്കിനും ശാശ്വത പരിഹാരം കാണാന്‍ ‘നാഷണല്‍ മിഷന്‍ ഓണ്‍ അര്‍ബന്‍ റോഡ്സ്’ (National Mission on Urban Roads) പ്രഖ്യാപിക്കാനൊരുങ്ങി കേന്ദ്ര ഉപരിതല ഗതാഗത മന്ത്രി നിതിന്‍ ഗഡ്കരി. റോഡ് ടാറിങ് കഴിഞ്ഞയുടന്‍ പൈപ്പിടാനും കേബിളുകള്‍ വലിക്കാനുമായി റോഡുകള്‍ വെട്ടിപ്പൊളിക്കുന്ന രീതി പൂര്‍ണ്ണമായി അവസാനിപ്പിക്കാനും, എന്‍ജിനീയര്‍മാര്‍ക്ക് വ്യക്തിഗത ഉത്തരവാദിത്തം നിശ്ചയിക്കാനും ലക്ഷ്യമിടുന്ന പദ്ധതി കേരളത്തിലെ നഗരങ്ങള്‍ക്കും വലിയ ആശ്വാസമാകും.
നിതിന്‍ ഗഡ്ക്കരിയുടെ വമ്പന്‍ നീ്ക്കംഇന്ത്യന്‍ നഗരങ്ങളിലെ റോഡ് ഇന്‍ഫ്രാസ്ട്രക്ചര്‍ മെച്ചപ്പെടുത്തുന്നതിനായി നഗര റോഡുകള്‍ക്ക് മാത്രമായി ഒരു ദേശീയ ദൗത്യം (National Mission on Urban Roads) കൊണ്ടുവരാനാണ് ഗഡ്ക്കരി ഒരുങ്ങുന്നത്. ദേശീയ പാതകളുടെ വികസനത്തില്‍ നിന്ന് പാഠങ്ങള്‍ ഉള്‍ക്കൊണ്ട്, നഗരങ്ങളിലെ റോഡ് ശൃംഖലയെ അടിമുടി നവീകരിക്കാനുള്ള പദ്ധതികളാണ് ആവിഷ്‌കരിക്കുന്നത്. നഗര റോഡ് വികസനത്തിന് പൊതുവായ മാനദണ്ഡങ്ങള്‍ രാജ്യത്തുടനീളം നടപ്പിലാക്കാന്‍ ലക്ഷ്യമിടുന്നു.
നിലവില്‍ ശ്രദ്ധ കേന്ദ്രീകരിക്കുന്നത് എവിടെ
നഗരങ്ങളെ തമ്മില്‍ ബന്ധിപ്പിക്കുന്ന ഹൈവേകളുടെ നിര്‍മ്മാണത്തില്‍ വലിയ പരിഷ്‌കാരമാണ് സര്‍ക്കാര്‍ കൊണ്ടുവന്നത്. ഇതിന്റെ തുടര്‍ച്ചയായാണ് നഗരങ്ങള്‍ക്കുള്ളിലെ ദൈനംദിന യാത്രകള്‍ കൂടുതല്‍ സുഗമമാക്കാനുള്ള നീക്കം. മികച്ച പ്രൊജക്റ്റ് പ്ലാനിംഗ്, എന്‍ജിനീയര്‍മാരുടെ വൈദഗ്ദ്ധ്യം വര്‍ധിപ്പിക്കല്‍, നിര്‍മ്മാണത്തിലെ ഗുണനിലവാരം എന്നിവയ്ക്ക് വലിയ മുന്‍ഗണന നല്‍കുന്നു.
നിര്‍മ്മാണത്തിലും റോഡുകളുടെ പരിപാലനത്തിലും കൃത്യമായ ഉത്തരവാദിത്തം ഉറപ്പാക്കും. മികച്ച പ്രവര്‍ത്തനങ്ങള്‍ അംഗീകരിക്കപ്പെടുമെന്നും, മോശം പ്രവര്‍ത്തനങ്ങള്‍ക്ക് കര്‍ശന പ്രത്യാഘാതങ്ങള്‍ ഉണ്ടാകുമെന്നും അദ്ദേഹം വ്യക്തമാക്കുന്നു.
ഇന്റഗ്രേറ്റഡ് അര്‍ബന്‍ റോഡ് പ്ലാനിംഗ് (Integrated Urban Road Planning)
റോഡുകള്‍, മെട്രോ ശൃംഖലകള്‍, റെയില്‍വേ എന്നിവ കൈകാര്യം ചെയ്യുന്ന വിവിധ ഏജന്‍സികള്‍ തമ്മിലുള്ള മികച്ച ഏകോപനമാണ് ഇന്റഗ്രേറ്റഡ് അര്‍ബന്‍ റോഡ് പ്ലാനിംഗ് എന്നതുകൊണ്ട് ഉദ്ദേശിക്കുന്നത്. നഗരങ്ങളിലെ പരിമിതമായ സ്ഥലവും, സര്‍ക്കാരിന്റെ വിഭവങ്ങളും ഏറ്റവും ഫലപ്രദമായി ഉപയോഗിക്കാന്‍ വിവിധ ഏജന്‍സികള്‍ ഒരുമിച്ച് പദ്ധതികള്‍ ആസൂത്രണം ചെയ്യേണ്ടത് അനിവാര്യമാണെന്ന് ഇതിലൂടെ വ്യക്തമാക്കുന്നു.
ഇന്ത്യയ്ക്ക് പ്രധാനമാകുന്നത് എങ്ങനെ
ദേശീയ പാതകള്‍ക്കും ഗ്രാമീണ റോഡുകള്‍ക്കും ലഭിച്ച അതേ പ്രാധാന്യം നഗരങ്ങളിലെ റോഡുകള്‍ക്ക് ഇതുവരെ ലഭിച്ചിരുന്നില്ല. ഈ വിടവ് നികത്താന്‍ പുതിയ ദൗത്യം സഹായിക്കും. ബംഗളൂരുവിലെ Tender S.U.R.E, ഉത്തര്‍പ്രദേശിലെ CM GRIDS (290 കിലോമീറ്റര്‍ നഗര റോഡുകള്‍ വികസിപ്പിക്കുന്ന പദ്ധതി) തുടങ്ങിയ വിജയകരമായ മാതൃകകള്‍ മറ്റ് സംസ്ഥാനങ്ങളിലേക്കും വ്യാപിപ്പിക്കാനാണ് തീരുമാനം. നഗരങ്ങളിലെ അടിസ്ഥാന സൗകര്യങ്ങള്‍ വികസിക്കുന്നത് ഇന്ത്യയുടെ മൊത്തത്തിലുള്ള സാമ്പത്തിക വളര്‍ച്ചയെ നേരിട്ട് സ്വാധീനിക്കുന്ന പ്രധാന ഘടകമാണ്.
പദ്ധതി കേരളത്തിന് എങ്ങനെ നേട്ടമാകും
കേരളത്തിന്റെ സവിശേഷമായ ഭൂപ്രകൃതിയും, നഗരവല്‍ക്കരണ രീതികളും കണക്കിലെടുക്കുമ്പോള്‍ നിതിന്‍ ഗഡ്കരി മുന്നോട്ടുവെക്കുന്ന നഗര റോഡ് ദൗത്യം സംസ്ഥാനത്തിന് വലിയ മാറ്റങ്ങള്‍ കൊണ്ടുവരാന്‍ സാധ്യതയുണ്ട്. ഇതോടെ റോഡ് ടാര്‍ ചെയ്ത് ദിവസങ്ങള്‍ക്കകം വാട്ടര്‍ അതോറിറ്റിയോ (KWA), കെ.എസ്.ഇ.ബിയോ, കേബിള്‍ ഓപ്പറേറ്റര്‍മാരോ റോഡ് കുഴിക്കുന്നത് കേരളത്തിലെ സ്ഥിരം കാഴ്ചയാണ്. ബംഗളൂരുവിലെ ടെന്‍ഡര്‍ ഷുവര്‍ മാതൃകയില്‍ ഭൂഗര്‍ഭ കേബിളുകള്‍ക്കും, പൈപ്പുകള്‍ക്കുമായി പ്രത്യേക യൂട്ടിലിറ്റി ഡക്ടുകള്‍ നിര്‍ബന്ധമാക്കുന്നത് വഴി റോഡുകള്‍ നിരന്തരം വെട്ടിപ്പൊളിക്കുന്നത് പൂര്‍ണ്ണമായും തടയാം.
ശക്തമായ കാലവര്‍ഷം കാരണം കേരളത്തിലെ നഗര റോഡുകള്‍ പെട്ടെന്ന് തകരുന്നതും, ഓടകളുടെ അഭാവം മൂലം വെള്ളക്കെട്ട് രൂപപ്പെടുന്നതും വലിയ പ്രതിസന്ധിയാണ്. ഗുണനിലവാര മാനദണ്ഡങ്ങളും എന്‍ജിനീയര്‍മാര്‍ക്കുള്ള കര്‍ശന ഉത്തരവാദിത്തവും, വരുന്നതോടെ ശാസ്ത്രീയമായ ഡ്രെയിനേജ് സംവിധാനങ്ങള്‍ ശക്താമാക്കേണ്ടി വരും.
കേരളത്തില്‍ റോഡ് വികസനത്തിന് ഏറ്റവും വലിയ തടസം സ്ഥലമേറ്റെടുക്കലിന്റെ ഉയര്‍ന്ന ചെലവും, ജനസാന്ദ്രതയുമാണ്. പരിമിതമായ സ്ഥലം ഏറ്റവും കാര്യക്ഷമമായി ഉപയോഗിക്കാന്‍ മെട്രോ, റെയില്‍വേ, റോഡ് വികസന ഏജന്‍സികള്‍ ഒരുമിച്ചിരുന്ന് ആസൂത്രണം നടത്തുന്നത് (Integrated Planning) ഗതാഗതക്കുരുക്ക് വലിയ തോതില്‍ കുറയ്ക്കും.
കേരളത്തിലെ റോഡപകടങ്ങളില്‍ വലിയൊരു പങ്ക് കാല്‍നടയാത്രക്കാരാണ് ഇരയാകുന്നത്. പുതിയ നഗര നയങ്ങള്‍ കാല്‍നടയാത്രക്കാര്‍ക്കുള്ള സുരക്ഷിതമായ ഫുട്പാത്തുകള്‍, സീബ്ര ക്രോസിംഗുകള്‍, വീല്‍ചെയര്‍ സൗഹൃദ പാതകള്‍ എന്നിവ റോഡ് ഡിസൈനിന്റെ ഭാഗമായി തന്നെ നിര്‍ബന്ധമാക്കും.
കേരളം മുഴുവന്‍ ഒരു തുടര്‍- നഗര ശൃംഖല പോലെ വ്യാപിച്ചു കിടക്കുന്നതിനാല്‍, പ്രധാന കോര്‍പ്പറേഷനുകള്‍ക്ക് (കൊച്ചി, തിരുവനന്തപുരം, കോഴിക്കോട്, തൃശ്ശൂര്‍, കണ്ണൂര്‍, കൊല്ലം) പുറമെ ചെറുപട്ടണങ്ങളിലെ റോഡുകളുടെ നിലവാരം ഉയര്‍ത്താനും ദേശീയ ദൗത്യം സഹായകരമാകും.
തദ്ദേശ സ്വയംഭരണ സ്ഥാപനങ്ങള്‍ പലപ്പോഴും നേരിടുന്ന സാമ്പത്തിക ഞെരുക്കത്തിനും, സാങ്കേതിക വൈദഗ്ദ്ധ്യക്കുറവിനും കേന്ദ്ര ദൗത്യത്തിലൂടെ പുതിയ ഫണ്ടിംഗ് മാതൃകകളും അത്യാധുനിക എന്‍ജിനീയറിംഗ് മാര്‍ഗനിര്‍ദ്ദേശങ്ങളും കൈവരും.