ഉത്തർപ്രദേശിലെ ഉജ്ജ്വല പദ്ധതി ഗുണഭോക്താക്കൾക്ക് ദീപാവലിക്കും ഹോളിക്കും സൗജന്യ എൽ.പി.ജി സിലിണ്ടർ നൽകുമെന്ന് മുഖ്യമന്ത്രി യോഗി ആദിത്യനാഥ്. പ്രധാനമന്ത്രി ഉജ്ജ്വല യോജനയിൽ ഉൾപ്പെട്ട അർഹരായ കുടുംബങ്ങൾക്കാണ് ആനുകൂല്യം ലഭിക്കുക. സംസ്ഥാനത്തെ 1.89 കോടിയിലധികം ഗുണഭോക്താക്കൾക്ക് ഇതിന്റെ പ്രയോജനം ലഭിക്കുമെന്നാണ് റിപ്പോർട്ട്. ഇതിനായി 1,500 കോടി രൂപയാണ് സംസ്ഥാന സർക്കാർ നീക്കി വെച്ചിരിക്കുന്നത്.
1,500 കോടി രൂപയുടെ സബ്സിഡിഉജ്ജ്വല പദ്ധതി ഗുണഭോക്താക്കൾക്ക് എൽ.പി.ജി സിലിണ്ടർ റീഫിൽ ചെയ്യുന്നതിനുള്ള സബ്സിഡി വിതരണം ചെയ്യാൻ 1,500 കോടി രൂപ നീക്കിവെച്ചതായി യോഗി ആദിത്യനാഥ് അറിയിച്ചു. സബ്സിഡി വിതരണവുമായി ബന്ധപ്പെട്ട പരിപാടിയിൽ പങ്കെടുത്തുകൊണ്ടാണ് അദ്ദേഹം പ്രഖ്യാപനം നടത്തിയത്.
ദീപാവലിക്കും, ഹോളിക്കും ഓരോ തവണയും ഒരു സിലിണ്ടർ വീതം സൗജന്യമായി നൽകാനാണ് സംസ്ഥാന സർക്കാരിന്റെ തീരുമാനം. ഇതിലൂടെ ഉത്സവകാലത്തെ പാചകവാതക ചെലവ് കുറയ്ക്കാൻ സാധിക്കുമെന്നാണ് സർക്കാരിന്റെ വിലയിരുത്തൽ.
സിലിണ്ടറിന്റെ വിലയും സബ്സിഡിയും
ഒരു ഗാർഹിക എൽ.പി.ജി സിലിണ്ടറിന്റെ വില 983.45 രൂപയാണെന്ന് യോഗി ആദിത്യനാഥ് പറഞ്ഞു. ഇതിൽ 335 രൂപ കേന്ദ്രസർക്കാർ സബ്സിഡിയായി നൽകുന്നുണ്ട്. ബാക്കി 648.55 രൂപയാണ് ഉപഭോക്താവ് സ്വന്തം നിലയിൽ ചെലവാക്കേണ്ടിവരുന്നത്. ഈ തുകയുടെ ഭാരം കുറയ്ക്കുന്നതിനാണ് ഉത്സവകാലങ്ങളിൽ സംസ്ഥാന സർക്കാർ സൗജന്യ സിലിണ്ടർ നൽകുന്നതെന്നും അദ്ദേഹം വിശദീകരിച്ചു.
സൗജന്യ സിലിണ്ടർ എങ്ങനെ ലഭിക്കും?
സിലിണ്ടർ റീഫിൽ ചെയ്യുന്നതിനുള്ള തുക ആദ്യം ഉപഭോക്താവ് അടയ്ക്കുകയും, തുടർന്ന് അർഹമായ സബ്സിഡി ബാങ്ക് അക്കൗണ്ടിലേക്ക് ലഭിക്കുകയും ചെയ്യുന്ന രീതിയിലാണ് ആനുകൂല്യം നടപ്പാക്കുന്നത്. അതിനാൽ ഉജ്ജ്വല പദ്ധതിയിലെ ഗുണഭോക്താക്കൾക്ക് ബാങ്ക് അക്കൗണ്ടും, ആധാറുമായി ബന്ധപ്പെട്ട വിവരങ്ങളും കൃത്യമാണെന്ന് ഉറപ്പാക്കേണ്ടതുണ്ട്. സൗജന്യ സിലിണ്ടർ ലഭിക്കുന്നതിനുള്ള വിതരണക്രമവും മറ്റ് നടപടികളും സംബന്ധിച്ച വിശദാംശങ്ങൾ സംസ്ഥാന സർക്കാർ അറിയിക്കുന്നതാണ്.
ഉജ്ജ്വല പദ്ധതി ഗുണഭോക്താക്കൾക്ക് ആശ്വാസം
പാവപ്പെട്ട കുടുംബങ്ങൾക്ക് സൗജന്യ പാചകവാതക കണക്ഷൻ ലഭ്യമാക്കുന്നതിനായി കേന്ദ്രസർക്കാർ നടപ്പാക്കിയ പദ്ധതിയാണ് പ്രധാനമന്ത്രി ഉജ്ജ്വല യോജന. ഈ പദ്ധതിയിൽ ഉൾപ്പെട്ട അർഹരായ കുടുംബങ്ങൾക്കാണ് പുതിയ പ്രഖ്യാപനത്തിന്റെ പ്രയോജനം ലഭിക്കുക. ഉത്സവകാലങ്ങളിൽ സിലിണ്ടർ വാങ്ങുന്നതിനായി ചെലവാക്കേണ്ട തുക ലാഭിക്കാനും ആ പണം മറ്റ് ആവശ്യങ്ങൾക്ക് ഉപയോഗിക്കാനും സാധിക്കുമെന്ന് യോഗി ആദിത്യനാഥ് പറഞ്ഞു.
അതേ സമയം, ഈ ആനുകൂല്യം ഉത്തർപ്രദേശിലെ അർഹരായ ഉജ്ജ്വല പദ്ധതി ഗുണഭോക്താക്കൾക്കുള്ളതാണ്. സംസ്ഥാനത്തെ എല്ലാ എൽ.പി.ജി ഉപഭോക്താക്കൾക്കും സൗജന്യ സിലിണ്ടർ ലഭിക്കുമെന്ന് പ്രഖ്യാപനത്തിൽ പറയുന്നില്ല.