സ്വന്തമായി ഒരിഞ്ചു ഭൂമിയില്ലാതെയും, മൊബൈല്‍ ആപ്പുകളിലൂടെയും, ഡിജിറ്റല്‍ പ്ലാറ്റ്ഫോമുകളിലൂടെയും കാര്‍ഷിക സംരംഭകരാകാന്‍ മലയാളികള്‍ക്ക് അവസരമൊരുക്കുകയാണ് ഓണ്‍ലൈന്‍ ഫാമിംഗ് ( ക്ലൗഡ് ഫാമിംഗ് ). നഗരവാസികള്‍ക്ക് കൃഷിയിടങ്ങളിലെ വിളകളും മൃഗങ്ങളും ദത്തെടുക്കാനും, കര്‍ഷകര്‍ക്ക് ഇടനിലക്കാരില്ലാതെ സോഷ്യല്‍ മീഡിയ വഴി നേരിട്ട് ഉല്‍പന്നങ്ങള്‍ വിറ്റഴിക്കാനും സഹായിക്കുന്ന ഈ പുതിയ അഗ്രിടെക് ബിസിനസ് മോഡല്‍ കേരളത്തില്‍ എങ്ങനെ പ്രാവര്‍ത്തികമാക്കാമെന്ന് പരിശോധിക്കാം.
എന്താണ് ഓണ്‍ലൈന്‍ കൃഷി (Online Farming)സാങ്കേതികവിദ്യ, ഡിജിറ്റല്‍ പ്ലാറ്റ്ഫോമുകള്‍, സോഷ്യല്‍ മീഡിയ എന്നിവ കൃഷിയുമായി സംയോജിപ്പിച്ച് നടത്തുന്ന ആധുനിക കൃഷിരീതിയാണിത്. ഉപഭോക്താക്കള്‍ മൊബൈല്‍ ആപ്പുകളിലൂടെ കൃഷിഭൂമിയോ, ഫാമിലെ ചെടികളെയോ, വളര്‍ത്തുമൃഗങ്ങളെയോ (ആട്, കോഴി, പശു) വാടകയ്ക്കെടുക്കുകയോ ദത്തെടുക്കുകയോ ചെയ്യാം.
കര്‍ഷകര്‍ അത് നിങ്ങള്‍ക്കായി പരിപാലിക്കുകയും, തത്സമയ ക്യാമറകളിലൂടെ ഉപഭോക്താക്കള്‍ക്ക് വളര്‍ച്ച നിരീക്ഷിക്കുകയും ചെയ്യാം. വിളവെടുക്കുമ്പോള്‍ ഉല്‍പന്നങ്ങള്‍ ഉപഭോക്താവിന്റെ വീട്ടിലെത്തിക്കുകയോ വിറ്റ് ലാഭം പങ്കിടുകയോ ചെയ്യുന്നു.
സ്വന്തം കൃഷിയിടത്തിലെ ഉല്‍പാദന രീതികള്‍ യൂട്യൂബ്, ഇന്‍സ്റ്റാഗ്രാം, ഫേസ്ബുക്ക് തുടങ്ങിയവയിലൂടെ പങ്കുവെക്കാം. ഇങ്ങനെ ഇടനിലക്കാരില്ലാതെ ഓണ്‍ലൈന്‍ വഴി ഓര്‍ഡറുകള്‍ സ്വീകരിച്ച് വിളകളും, മൂല്യവര്‍ദ്ധിത ഉല്‍പന്നങ്ങളും വിറ്റഴിക്കുകയും ചെയ്യാം.
കുടുംബങ്ങള്‍ക്ക് ലക്ഷങ്ങളുടെ വരുമാന സാധ്യത
പച്ചക്കറികളും പഴങ്ങളും പ്രാദേശിക മാര്‍ക്കറ്റുകളില്‍ കുറഞ്ഞ വിലയ്ക്ക് നല്‍കാതെ, ഓണ്‍ലൈന്‍ വഴി നേരിട്ട് വില്‍ക്കുന്നതിലൂടെ പരമാവധി ലാഭവിഹിതം കര്‍ഷക കുടുംബത്തിന് തന്നെ ലഭിക്കും. കൃഷി വിശേഷങ്ങളും ടിപ്പുകളും പങ്കുവെക്കുന്ന വീഡിയോകള്‍ വഴി യൂട്യൂബ് പരസ്യ വരുമാനം (AdSense), ഫേസ്ബുക്ക് മോണിറ്റൈസേഷന്‍ എന്നിവയിലൂടെ മാസം മികച്ച തുക നേടാം.
പച്ചക്കറികള്‍ക്ക് പുറമെ ഉണക്കിയ പഴങ്ങള്‍, അച്ചാറുകള്‍, ജൈവവളങ്ങള്‍, തൈകള്‍, മേല്‍ത്തരം വിത്തുകള്‍ എന്നിവ ഓണ്‍ലൈന്‍ വഴി പ്രീമിയം നിരക്കില്‍ വില്‍ക്കുന്നതും വരുമാനം നല്‍കും. കാര്‍ഷിക ഉപകരണങ്ങള്‍, വിത്തുകള്‍, ജൈവ കീടനാശിനികള്‍ എന്നിവ റിവ്യൂ ചെയ്യുന്നതിലൂടെ കമ്പനികളില്‍ നിന്നുള്ള സ്‌പോണ്‍സര്‍ഷിപ്പ് വരുമാനം കിട്ടും.
നഗരങ്ങളിലെ കുടുംബങ്ങള്‍ക്ക് ആഴ്ചയിലോ, മാസത്തിലോ ആവശ്യമായ വിഷരഹിത പച്ചക്കറികള്‍ സ്ഥിരമായി എത്തിച്ചുനല്‍കുന്ന പ്രതിമാസ വരിസംഖ്യ (Subscription model) മോഡലും വരുമാനം നല്‍കും.
ഓണ്‍ലൈന്‍ കൃഷി: നേട്ടങ്ങളും ഹൈലൈറ്റുകളും
- കുറഞ്ഞ സ്ഥലത്തും (ടെറസ്, ബാല്‍ക്കണി, ചെറിയ പ്ലോട്ടുകള്‍) മികച്ച ആസൂത്രണത്തോടെ ചെയ്യാന്‍ സാധിക്കും.
- കൃഷി ആരംഭിക്കുന്നതിന് മുമ്പ് തന്നെ സോഷ്യല്‍ മീഡിയ വഴി ഉപഭോക്താക്കളെ കണ്ടെത്താനും, മുന്‍കൂര്‍ ഓര്‍ഡര്‍ ഉറപ്പാക്കാനും കഴിയും.
- വീട്ടിലിരിക്കുന്ന സ്ത്രീകള്‍ക്കും, പ്രായമായവര്‍ക്കും ഒരുപോലെ പങ്കാളികളാകാന്‍ കഴിയുന്ന കുടുംബ സൗഹൃദ ബിസിനസ് മോഡലാണിത്.
- സ്വന്തമായി ഒരു അഗ്രി- ബ്രാന്‍ഡ് രൂപപ്പെടുത്തിയെടുക്കാനുള്ള അവസരമാണിത്.
- പരമ്പരാഗത കൃഷിയെ അപേക്ഷിച്ച് മികച്ച സാമ്പത്തിക ഭദ്രതയും തൊഴില്‍ സംതൃപ്തിയും ലഭിക്കും.
പരമ്പരാഗത കൃഷിയില്‍ നിന്ന് എങ്ങനെ വ്യത്യസ്തമാകുന്നു
പരമ്പരാഗത കൃഷി മൊത്തവ്യാപാര മാര്‍ക്കറ്റുകളെയും, ഇടനിലക്കാരെയും ആശ്രയിക്കുമ്പോള്‍ ഓണ്‍ലൈന്‍ കൃഷി ഡിജിറ്റല്‍ ഉപഭോക്താക്കളെ നേരിട്ട് കണ്ടെത്തുന്നു. പരമ്പരാഗത മാര്‍ക്കറ്റില്‍ വിലയിലെ അസ്ഥിരത കര്‍ഷകനെ ബാധിക്കുമ്പോള്‍ ഓണ്‍ലൈനില്‍ ഗുണനിലവാരം മുന്‍നിര്‍ത്തി കര്‍ഷകന് തന്നെ സ്ഥിരമായ വില നിശ്ചയിക്കാം.
പരമ്പരാഗത കൃഷിയില്‍ ഉല്‍പന്നം വില്‍ക്കുമ്പോള്‍ മാത്രമാണ് പണം ലഭിക്കുന്നത്. എന്നാല്‍ ഓണ്‍ലൈന്‍ കൃഷിയില്‍ ഉല്‍പന്ന വില്‍പനയോടൊപ്പം വിവരങ്ങളും, അനുഭവങ്ങളും കണ്ടന്റാക്കി മാറ്റിയും വരുമാനമുണ്ടാക്കാന്‍ സഹായിക്കും. കൂടാതെ ഉപഭോക്താക്കളുമായി നേരിട്ട് ആശയവിനിമയം നടത്താനും അവരുടെ ഫീഡ്ബാക്ക് അനുസരിച്ച് വിളകള്‍ തെരഞ്ഞെടുക്കാനും സാധിക്കും.