പെട്രോളിൽ എഥനോൾ കലർത്തുന്നതിലൂടെ രാജ്യത്തിന് ക്രൂഡ് ഓയിൽ ഇറക്കുമതി കുറയ്ക്കാനും, വിദേശനാണ്യം ലാഭിക്കാനും സാധിക്കുമെന്നാണ് കേന്ദ്രസർക്കാരിന്റെ വാദം. എന്നാൽ അനുവദനീയമായ 20 ശതമാനത്തേക്കാൾ ഉയർന്ന അളവിൽ എഥനോൾ കലർന്ന പെട്രോൾ വിൽക്കുന്നുവെന്ന കർണാടക സർക്കാരിന്റെ ആരോപണം പുതിയ വിവാദത്തിന് വഴിതുറന്നിരിക്കുകയാണ്. ഇതിലൂടെ കേരളം അടക്കമുള്ള സംസ്ഥാനങ്ങളിലെ വാഹന ഉടമകൾക്ക് ഒരു ലക്ഷം കോടി രൂപയുടെ നഷ്ടമാണുണ്ടാവുകയെന്നാണ് വാദം. ഇത് ശരിയാണെങ്കിൽ നേട്ടം എണ്ണക്കമ്പനികൾക്കും, നഷ്ടം വാഹനയുടമകൾക്കുമാണോ എന്ന ചോദ്യവും ഉയരുന്നു. ഈ വിഷയമാണ് ഇവിടെ പരിശോധിക്കുന്നത്.
എണ്ണക്കമ്പനികൾക്ക് എന്താണ് നേട്ടം?എഥനോൾ പെട്രോളിന് പകരമായി ഒരു ഭാഗം ഉപയോഗിക്കുന്നതിനാൽ ക്രൂഡ് ഓയിൽ ഇറക്കുമതി കുറയ്ക്കാൻ സഹായിക്കുന്നു. ആഭ്യന്തരമായി ഉൽപ്പാദിപ്പിക്കുന്ന എഥനോൾ വാങ്ങുന്നതിലൂടെ കർഷകർക്കും, പഞ്ചസാര വ്യവസായത്തിനും വരുമാനം ലഭിക്കുന്നു.
എണ്ണക്കമ്പനികൾക്ക് സർക്കാർ നിശ്ചയിച്ച വിലയിൽ എഥനോൾ ലഭ്യമാക്കി ഫ്യുവൽ ബ്ലെൻഡിങ് ലക്ഷ്യങ്ങൾ കൈവരിക്കാനും സാധിക്കുന്നു. എന്നാൽ അനുവദനീയമായ പരിധി മറികടന്ന് എഥനോൾ കലർത്തിയാൽ കമ്പനികൾക്ക് അധിക ലാഭമുണ്ടാകുമെന്ന് തെളിയിക്കുന്ന കണക്കുകൾ പുറത്തുവന്നിട്ടില്ല.
വാഹനയുടമകൾക്ക് എത്ര നഷ്ടം?
എഥനോളിന്റെ ഊർജമൂല്യം പെട്രോളിനേക്കാൾ കുറവായതിനാൽ ബ്ലെൻഡിങ്ങിന്റെ അളവ് കൂടുമ്പോൾ മൈലേജ് കുറയാൻ സാധ്യതയുണ്ട്. കർണാടക ഉപഭോക്തൃകാര്യ മന്ത്രി റിസ്വാൻ അർഷാദ് മുന്നോട്ടുവച്ച കണക്കനുസരിച്ച് ഇന്ത്യയിൽ പ്രതിവർഷം ഏകദേശം 6,200 കോടി ലിറ്റർ പെട്രോൾ ഉപയോഗിക്കുന്നു.
മൈലേജിൽ 10% കുറവുണ്ടായാൽ വാഹനയുടമകൾക്ക് ഏകദേശം 62,000 കോടി രൂപയുടെ അധിക ചെലവുണ്ടാകുമെന്നാണ് അദ്ദേഹത്തിന്റെ വിലയിരുത്തൽ. വാഹനഭാഗങ്ങൾക്കുണ്ടാകാവുന്ന കേടുപാടുകളുടെ അറ്റകുറ്റപ്പണിക്ക് 39,000 കോടി രൂപയും കണക്കാക്കുന്നു. അങ്ങനെ ആകെ നഷ്ടം ഏകദേശം 1.01 ലക്ഷം കോടി രൂപ വരുമെന്നാണ് മന്ത്രിയുടെ അവകാശവാദം. അതേ സമയം, ഇത് സർക്കാർ സ്ഥിരീകരിച്ച നഷ്ടക്കണക്കല്ല.
കർണാടകയുടെ കണ്ടെത്തൽ, എണ്ണക്കമ്പനികളുടെ മറുപടി
സംസ്ഥാനത്ത് ശേഖരിച്ച 63 സാമ്പിളുകളിൽ ചിലതിൽ 31.2% വരെ എഥനോൾ കണ്ടെത്തിയെന്നാണ് കർണാടകയുടെ വാദം. എന്നാൽ പരിശോധനാ സംബന്ധമായ നടപടിക്രമങ്ങൾ ഇവിടെ പാലിച്ചിട്ടില്ലെന്ന് എണ്ണക്കമ്പനികൾ ആരോപിക്കുന്നു. രാജ്യത്തെ 27 സംസ്ഥാനങ്ങളിലെയും, കേന്ദ്രഭരണ പ്രദേശങ്ങളിലെയും 893 സാമ്പിളുകൾ പരിശോധിച്ചപ്പോൾ എഥനോൾ അളവ് 19–21% പരിധിയിലായിരുന്നുവെന്നും കർണാടകയിലെ 56 സാമ്പിളുകളിൽ ശരാശരി 19.3% മാത്രമായിരുന്നുവെന്നും കമ്പനികൾ പറയുന്നു.
നഷ്ടപരിഹാരത്തിന് ആവശ്യം
അമിത എഥനോൾ ബ്ലെൻഡിങ് മൂലം വാഹനങ്ങൾക്ക് കേടുപാടുകൾ സംഭവിച്ചാൽ നഷ്ടപരിഹാരം നൽകാൻ കേന്ദ്രം പ്രത്യേക E20 ഫണ്ട് രൂപീകരിക്കണമെന്നാണ് കർണാടകയുടെ ആവശ്യം. പെട്രോൾ പമ്പുകളിൽ എഥനോൾ അളവ് പ്രദർശിപ്പിക്കണമെന്നും സംസ്ഥാനം ആവശ്യപ്പെട്ടിട്ടുണ്ട്.
എഥനോൾ ബ്ലെൻഡിങ് നയം, ഇറക്കുമതി കുറയ്ക്കാനും ആഭ്യന്തര ഉല്പാദനത്തിന് പിന്തുണ നൽകാനും സഹായിക്കുമ്പോൾ, അനുവദനീയമായ പരിധി ലംഘിച്ചിട്ടുണ്ടോ എന്നതാണ് ഇപ്പോഴത്തെ നിർണായക ചോദ്യം. പരിശോധനാ ഫലങ്ങൾ സ്വതന്ത്രമായി സ്ഥിരീകരിക്കപ്പെടുകയും, വാഹനയുടമകളുടെ യഥാർഥ നഷ്ടം വിലയിരുത്തപ്പെടുകയും ചെയ്താൽ മാത്രമേ നഷ്ടമുണ്ടാകുമോ? ഉണ്ടെങ്കിൽ അതിന്റെ വ്യാപ്തി എത്രത്തോളമായിരിക്കും? എന്നീവക കാര്യങ്ങൾ വ്യക്തമാവുകയുള്ളൂ.