ഇന്ത്യയിൽ വാണിജ്യ പാചകവാതക സിലിണ്ടറുകളുടെ വില തുടർച്ചയായ മൂന്നാം മാസവും വർധിപ്പിച്ചു. 19 കിലോഗ്രാം സിലിണ്ടറിന് കൊച്ചിയിൽ 12.50 രൂപയാണ് വർധിച്ചത്, ഇത്തരത്തിൽ സിലിണ്ടറൊന്നിന് 2,840 രൂപയാണ് പുതിയ വില. ഇന്ന്, 2026 നവംബർ 1 മുതൽ പുതുക്കിയ പ്രാബല്യത്തിൽ വന്നു. ഇന്ത്യയിലെ പ്രധാന നഗരങ്ങളിൽ 10 മുതൽ 17 രൂപ വരെയാണ് വില വർധിച്ചിരിക്കുന്നത്. രാജ്യ തലസ്ഥാനമായ ഡൽഹിയിലെ പുതിയ വില 2,820 രൂപയാണ്. തുടർച്ചയായ വില വർധന ഹോട്ടൽ വ്യവസായത്തെ സംബന്ധിച്ച് തിരിച്ചടിയാണ്. അതേ സമയം ഗാർഹികാവശ്യത്തിനുള്ള പാചകവാതകത്തിന്റെ വിലയിൽ മാറ്റമുണ്ടായിട്ടില്ല.
കേരളത്തിലെ പ്രധാന നഗരങ്ങളിലെ പുതിയ നിരക്കുകൾ
- കൊച്ചി : 2,840 രൂപ
- കോഴിക്കോട് : 2,870 രൂപ
- തിരുവനന്തപുരം : 2,860 രൂപ
ആശങ്കയോടെ ഭക്ഷ്യമേഖല
ദീപാവലിക്ക് മുന്നോടിയായിട്ടാണ് ഇപ്പോൾ വില വർധന ഉണ്ടായിരിക്കുന്നത്. ഇത് ഹോട്ടൽ-കാറ്ററിങ് മേഖലയെ ആശങ്കപ്പെടുത്തുന്നുണ്ട്. റസ്റ്ററന്റുകൾക്കാണ് തുടർച്ചയായ വില വർധന തലവേദനയാകുന്നത്. എൽ.പി.ജി വില ഉയരുന്നതിനനുസരിച്ച് ആഹാര സാധനങ്ങളുടെയും വില ഉയരും. ഇത്തരത്തിൽ പുറത്തു നിന്ന് ഭക്ഷണം കഴിക്കുന്ന സാധാരണക്കാരെ അടക്കം വില വർധന ബാധിക്കും.
തുടർച്ചയായ മൂന്നാം മാസത്തെ നിരക്ക് വർധന
നേരത്തെ, 2026 സെപ്റ്റംബർ, ഒക്ടോബർ മാസങ്ങളിലും വാണിജ്യാവശ്യത്തിനുള്ള സിലിണ്ടറുകളുടെ വില വർധിപ്പിച്ചിരുന്നു. സെപ്റ്റംബറിൽ സിലിണ്ടറൊന്നിന് 9.50 രൂപയും, ഒക്ടോബറിൽ 62.50 രൂപയുമാണ് ഉയർത്തിയത്. ഇതിനും മുമ്പ് മെയ് മാസത്തിൽ വാണിജ്യ സിലിണ്ടറുകൾക്ക് ഒറ്റയടിക്ക് 993 രൂപയാണ് വർധിപ്പിച്ചത്. അതായത് ഏതാനും മാസങ്ങൾക്കിടെ ആയിരത്തിലധികം രൂപയുടെ വർധനയാണുണ്ടായത്.
വാണിജ്യ പാചകവാതകത്തിന് വില ഉയർന്നതോടെ ഹോട്ടലുകളിലെ നിരക്കുകളും കുതിച്ചു കയറി. തട്ടുകടകൾ ഉൾപ്പെടെയുള്ള ചെറുകിട സ്ഥാപനങ്ങൾ മുതൽ ഫൈവ് സ്റ്റാർ ഹോട്ടലുകൾ വരെ ഭക്ഷണസാധനങ്ങൾക്കെല്ലാം വില വർധിച്ചിട്ടുണ്ട്.
ഒരു പരിധിയിൽ കൂടുതൽ നിരക്കു വർധനയുണ്ടാകുന്നത് വില്പന കുറയാൻ കാരണമാകുമെന്ന് ഈ മേഖലയിലെ വ്യാപാരികൾ ആശങ്കപ്പെടുന്നു. പ്രത്യേകിച്ച് വലിയ തോതിൽ ബിസിനസ് നടക്കാറുള്ള ഫെസ്റ്റിവൽ സീസണിലാണ് നിലവിൽ എൽ.പി.ജി വില ഉയർന്നിരിക്കുന്നത്.
വില നിർണയം ഇങ്ങനെ…
എല്ലാ മാസവും ഒന്നാം തിയ്യതിയാണ് ഇന്ത്യയിലെ എണ്ണക്കമ്പനികൾ എൽ.പി.ജി വില റിവ്യൂ ചെയ്ത്, ആവശ്യമെങ്കിൽ പുതുക്കി നിശ്ചയിക്കുന്നത്. ആഗോള തലത്തിലെ നിരക്കുകൾ ഉൾപ്പെടെ പരിഗണിച്ചാണിത്.