വിരമിച്ചവര്‍ക്കും, സ്ഥിരവരുമാനം ആഗ്രഹിക്കുന്നവര്‍ക്കുമായി ഫെഡറല്‍ ബാങ്ക് അവതരിപ്പിച്ച ആന്വിറ്റി ഡെപ്പോസിറ്റ് സ്‌കീമിലൂടെ മാസംതോറും 29,631 രൂപ വരെ സുരക്ഷിതമായി സ്വന്തമാക്കാം. 15 ലക്ഷം രൂപ ഒറ്റത്തവണയായി 5 വര്‍ഷത്തേക്ക് നിക്ഷേപിക്കുന്ന മുതിര്‍ന്ന പൗരന്മാര്‍ക്കാണ് 6.90% വാര്‍ഷിക പലിശനിരക്കില്‍ ഈ തുക ലഭിക്കുന്നത്. സാധാരണ സ്ഥിരനിക്ഷേപങ്ങളില്‍ (FD) നിന്ന് വ്യത്യസ്തമായി മുതലും, പലിശയും ചേര്‍ത്താണ് പ്രതിമാസ വരുമാനമായി അക്കൗണ്ടിലെത്തുന്നത്.
ഫെഡറല്‍ ബാങ്ക് ആന്വിറ്റി ഡെപ്പോസിറ്റ് സ്‌കീംഒറ്റത്തവണയായി വലിയൊരു തുക നിക്ഷേപിച്ച്, കൃത്യമായ ഇടവേളകളില്‍ സ്ഥിരവരുമാനം നേടാന്‍ സഹായിക്കുന്ന പദ്ധതിയാണിത്. സാധാരണ സ്ഥിരനിക്ഷേപങ്ങളില്‍ (FD) നിന്ന് വ്യത്യസ്തമായി ഇതില്‍ കാലാവധി കഴിയുമ്പോള്‍ മാത്രമല്ല പണം തിരികെ ലഭിക്കുന്നത്. മറിച്ച് ഓരോ തവണയും നിങ്ങള്‍ക്ക് ലഭിക്കുന്ന തുകയില്‍ നിക്ഷേപിച്ച മുതലിന്റെ ഒരു ഭാഗവും അതിന്റെ പലിശയും ഉള്‍പ്പെടും.
സ്‌കീമിന്റെ നേട്ടങ്ങളും ഹൈലൈറ്റുകളും
കുറഞ്ഞത് 15 ലക്ഷം രൂപയെങ്കിലും ഈ പദ്ധതിയില്‍ നിക്ഷേപിക്കേണ്ടതുണ്ട്. പരമാവധി നിക്ഷേപം 2 കോടി രൂപയില്‍ താഴെയായിരിക്കണം. 5 മുതല്‍ 20 വര്‍ഷം വരെ നിക്ഷേപകര്‍ക്ക് നിക്ഷേപ കാലയളവ് തിരഞ്ഞെടുക്കാം.
മാസം തോറുമോ, മൂന്നു മാസത്തിലൊരിക്കലോ, അര്‍ദ്ധവാര്‍ഷികമായോ, വാര്‍ഷികമായോ വരുമാനം നേടാന്‍ സാധിക്കും. ബാക്കി കിടക്കുന്ന നിക്ഷേപത്തുകയുടെ 75% വരെ അടിയന്തര ഘട്ടങ്ങളില്‍ മുന്‍കൂര്‍ വായ്പയായി എടുക്കാന്‍ സാധിക്കും.
ജോയിന്റ് അക്കൗണ്ട്, നോമിനേഷന്‍ സൗകര്യം, കാലാവധി എത്തും മുമ്പ് പണം പിന്‍വലിക്കാനുള്ള സൗകര്യം എന്നിവയും അക്കൗണ്ട് വാഗ്ദാനം ചെയ്യുന്നു.
ഏറ്റവും പുതിയ പലിശ നിരക്കുകള്‍
- 5 മുതല്‍ 10 വര്‍ഷം വരെ: സാധാരണക്കാര്‍ക്ക് 6.40% വാര്‍ഷിക പലിശ, മുതിര്‍ന്ന പൗരന്മാര്‍ക്ക് 6.90%.
- 10 വര്‍ഷത്തിന് മുകളില്‍ 20 വര്‍ഷം വരെ: സാധാരണക്കാര്‍ക്ക് 6.00% വാര്‍ഷിക പലിശ. മുതിര്‍ന്ന പൗരന്മാര്‍ക്ക് 6.15%.
മാസം 29,631 രൂപ സ്ഥിരവരുമാനം
15 ലക്ഷം രൂപ 5 വര്‍ഷത്തേക്ക് ഈ സ്‌കീമില്‍ നിക്ഷേപിക്കുന്ന മുതിര്‍ന്ന പൗരന്മാര്‍ക്കാണ് (6.90% പലിശ നിരക്കില്‍) പ്രതിമാസം ഏകദേശം 29,631 രൂപ ലഭിക്കുക. ഇതേ തുക നിക്ഷേപിക്കുന്ന സാധാരണക്കാര്‍ക്ക് (6.40% പലിശ നിരക്കില്‍) പ്രതിമാസം 29,279 രൂപ ലഭിക്കും.
സ്‌കീം ആര്‍ക്കൊക്കെ അനുയോജ്യമാണ്
വിപണിയിലെ ചാഞ്ചാട്ടങ്ങളെ ഭയക്കാതെ സുരക്ഷിതമായ ഒരു സ്ഥിരവരുമാനം ദീര്‍ഘകാലത്തേക്ക് ആഗ്രഹിക്കുന്നവര്‍ക്ക് ഈ പദ്ധതി ഉപയോഗിക്കാം. പ്രത്യേകിച്ച്, ജോലിയില്‍ നിന്ന് വിരമിച്ചവര്‍ക്ക് പെന്‍ഷന്‍ പോലെയുള്ള സുരക്ഷിത വരുമാനം ഉറപ്പാക്കാന്‍ ഇത് മികച്ച ഓപ്ഷനാണ്. ഒറ്റത്തവണയായി വലിയൊരു തുക കൈവശമുള്ളവര്‍ക്കും ഈ പദ്ധതി നേട്ടമാണ്.
കാലാവധിക്കു ശേഷം നിക്ഷേപതുകയ്ക്ക് എന്തുസംഭവിക്കും
കാലാവധി പൂര്‍ത്തിയാകുമ്പോള്‍ നിക്ഷേപിച്ച തുക (Principal amount) മൊത്തമായി തിരികെ ലഭിക്കില്ല. കാരണം, ഓരോ തവണയും നിങ്ങള്‍ക്ക് ലഭിക്കുന്ന തുകയില്‍ പലിശയ്‌ക്കൊപ്പം നിങ്ങളുടെ മുതലും കൂടി ചേരുന്നുണ്ട്. അതിനാല്‍ കാലാവധി കഴിയുമ്പോഴേക്കും നിക്ഷേപത്തുക പൂര്‍ണ്ണമായും നിങ്ങള്‍ക്ക് തിരികെ ലഭിച്ചു കഴിഞ്ഞിട്ടുണ്ടാകും.
ലഭിക്കുന്ന പലിശയ്ക്ക് ആദായ നികുതി വകുപ്പിന്റെ നിയമപ്രകാരം ടിഡിഎസ് (TDS) ബാധകമാണ്. നിക്ഷേപകന്റെ ഇന്‍കം ടാക്‌സ് സ്ലാബ് അനുസരിച്ചാകും പലിശയ്ക്ക് നികുതി നല്‍കേണ്ടി വരിക. ഇവിടെ മാസവരുമാനമായി ലഭിക്കുന്ന തുക പൂര്‍ണ്ണമായും പലിശയാണെന്ന് തെറ്റിദ്ധരിക്കരുത്. ഇതില്‍ നിങ്ങളുടെ നിക്ഷേപത്തുകയുടെ ഒരു ഭാഗം കൂടിയുണ്ട്.
ഇതില്‍ ചേരാന്‍ ചുരുങ്ങിയത് 15 ലക്ഷം രൂപയെങ്കിലും ആവശ്യമാണ് എന്നത് ചെറിയ നിക്ഷേപകര്‍ക്കുള്ള പ്രധാന പരിമിതിയാണ്. 20 വര്‍ഷം വരെ പണം ഇതില്‍ ലോക്ക് ചെയ്യപ്പെടാന്‍ സാധ്യതയുള്ളതിനാല്‍, ഭാവിയിലെ വലിയ സാമ്പത്തിക ആവശ്യങ്ങള്‍ മുന്‍കൂട്ടി കണ്ടുകൊണ്ട് മാത്രം നിക്ഷേപിക്കണം.