ഫ്ലിപ്കാര്ട്ട്, ആമസോണ്‍ തുടങ്ങിയ പ്രമുഖ ഇ-കൊമേഴ്‌സ് പ്ലാറ്റ്ഫോമുകള്‍ വഴി ഇരുചക്രവാഹനങ്ങള്‍ വാങ്ങുമ്പോള്‍ ഉത്സവ സീസണില്‍ 20,000 രൂപ വരെ തല്‍ക്ഷണ സാമ്പത്തിക നേട്ടം സ്വന്തമാക്കാം. ഷോറൂമുകളിലെ വിലപേശലുകളില്ലാതെ ഹീറോ, ബജാജ്, ടിവിഎസ്, ഏഥര്‍ തുടങ്ങിയ മുന്‍നിര ബ്രാന്‍ഡുകള്‍ ഓണ്‍ലൈനായി ഓര്‍ഡര്‍ ചെയ്യാന്‍ സാധിക്കുമെങ്കിലും, എക്‌സ്-ഷോറൂം നിരക്കും ആര്‍ടിഒ രജിസ്‌ട്രേഷനും തമ്മിലുള്ള വ്യത്യാസം കൃത്യമായി മനസിലാക്കിയില്ലെങ്കില്‍ ഉപഭോക്താക്കള്‍ക്ക് വലിയ സാമ്പത്തിക നഷ്ടമുണ്ടാകാന്‍ സാധ്യതയുണ്ട്. ഈ ഉത്സവ സീസണില്‍ ഷോറൂമുകള്‍ കയറിയിറങ്ങാതെയും, വിലപേശലുകളുടെ സമ്മര്‍ദ്ദമില്ലാതെയും കഷ്ടപ്പെട്ടുണ്ടാക്കിയ പണം പരമാവധി ലാഭിച്ച് പുതിയൊരു വാഹനം സ്വന്തമാക്കാനുള്ള എളുപ്പവഴിയായി ഓണ്‍ലൈന്‍ പര്‍ച്ചേസ്.
ഓണ്‍ലൈനില്‍ വാഹനം വാങ്ങുന്നതു കൊണ്ടുള്ള പ്രധാന നേട്ടങ്ങള്‍
- ഡീലര്‍ഷിപ്പുകള്‍ കയറിയിറങ്ങാതെ വാങ്ങാം: വീട്ടിലിരുന്ന് തന്നെ വിവിധ ബ്രാന്‍ഡുകളുടെ ഫീച്ചറുകള്‍, വേരിയന്റുകള്‍, നിറങ്ങള്‍, ഉപഭോക്തൃ റിവ്യൂകള്‍ എന്നിവ എളുപ്പത്തില്‍ താരതമ്യം ചെയ്യാന്‍ സാധിക്കും.
- വിലയിലെ സുതാര്യത: മറഞ്ഞിരിക്കുന്ന ചാര്‍ജുകളില്ലാതെ കൃത്യമായ എക്‌സ്-ഷോറൂം വില വ്യക്തമായി മനസിലാക്കാം.
- മികച്ച ഓഫറുകളും ഇളവുകളും: ഉത്സവ സീസണുകളിലും, പ്രത്യേക സെയിലുകളിലും ഡീലര്‍ഷിപ്പുകളില്‍ ലഭിക്കുന്നതിനേക്കാള്‍ വലിയ തുകയുടെ ഡിസ്‌കൗണ്ടുകളും, ക്യാഷ്ബാക്കുകളും ഇ-കൊമേഴ്‌സ് പ്ലാറ്റ്ഫോമുകള്‍ വഴി ലഭിക്കും.
- സുഗമമായ പേയ്മെന്റ് ഓപ്ഷനുകള്‍: ക്രെഡിറ്റ്, ഡെബിറ്റ് കാര്‍ഡ് വഴിയുള്ള തല്‍ക്ഷണ ഇളവുകള്‍, കുറഞ്ഞ പലിശ അല്ലെങ്കില്‍ നോ-കോസ്റ്റ് ഇഎംഐ (No-Cost EMI) സൗകര്യങ്ങള്‍ ലഭ്യമാണ്.
- സെയില്‍സ് എക്സിക്യൂട്ടീവുകളുടെ സമ്മര്‍ദ്ദമില്ല: സ്റ്റോക്കിലുള്ള പഴയ മോഡലുകള്‍ വിറ്റഴിക്കാന്‍ ഡീലര്‍മാര്‍ നടത്തുന്ന നിര്‍ബന്ധിത സെയില്‍സ് തന്ത്രങ്ങള്‍ ഒഴിവാക്കാം.
ഇന്ത്യയില്‍ ഫ്ലിപ്കാര്ട്ട്, ആമസോണ്‍ വഴി വാഹനങ്ങള്‍ വാങ്ങാന്‍ പറ്റുമോ
ഫ്‌ലിപ്കാര്‍ട്ടിലും ആമസോണിലും Hero, Bajaj, TVS, Suzuki, Ather, Ampere തുടങ്ങിയ പ്രമുഖ ബ്രാന്‍ഡുകളുടെ പെട്രോള്‍- ഇലക്ട്രിക് ബൈക്കുകളും സ്‌കൂട്ടറുകളും പൂര്‍ണ്ണമായി വാങ്ങാനും ബുക്ക് ചെയ്യാനും സൗകര്യമുണ്ട്. ഓണ്‍ലൈനില്‍ എക്‌സ്-ഷോറൂം വില നല്‍കിയാല്‍, നിങ്ങളുടെ അടുത്തുള്ള അംഗീകൃത ഡീലര്‍ വഴിയാണ് വാഹനം ഡെലിവറി ചെയ്യുന്നത്.
അതേസമയം കാറുകളുടെ വില്‍പ്പനയില്‍ നിലവില്‍ ചില പരിമിതികളുണ്ട്. പൂര്‍ണ്ണമായ വാങ്ങല്‍ നിലവില്‍ സാധ്യമല്ല. എന്നാല്‍ ഉത്സവ സീസണുകളിലും, പുതിയ ലോഞ്ചുകളിലും ഫ്ലിപ്കാര്ട്ട്, ആമസോണ്‍ വഴി ചില കാര്‍ നിര്‍മ്മാതാക്കള്‍ ടോക്കണ്‍ ബുക്കിംഗ് (Token Booking) അനുവദിക്കാറുണ്ട്. കാറുകള്‍ ഓണ്‍ലൈനായി വാങ്ങാന്‍ ആഗ്രഹിക്കുന്നവര്‍ക്ക് നിര്‍മ്മാതാക്കളുടെ ഔദ്യോഗിക വെബ്സൈറ്റുകള് (ഉദാ: Tata Motors Click to Drive, Maruti Suzuki Smart Finance) പ്രയോജനപ്പെടുത്താവുന്നതാണ്.
ഏകദേശം എത്ര രൂപയുടെ സാമ്പത്തിക നേട്ടം ലഭിക്കും
ഇരുചക്രവാഹനങ്ങള്‍ക്ക് മികച്ച ഓഫറുകള്‍ ലഭിക്കും. മോഡലും ഓഫറും അനുസരിച്ച് സാധാരണയായി 3,000 മുതല്‍ 15,000 വരെ രൂപ വരെ ലാഭിക്കാം. ഉത്സവ സെയില്‍ സമയങ്ങളില്‍ (പ്രത്യേകിച്ച് ഇലക്ട്രിക് സ്‌കൂട്ടറുകള്‍ക്ക്) ബാങ്ക് ഓഫറുകളും, പ്ലാറ്റ്ഫോം ഡിസ്‌കൗണ്ടും ചേര്‍ത്ത് 20,000 രൂപ വരെ ലാഭം ലഭിക്കാറുണ്ട്.
കാറുകള്‍ക്ക് കമ്പനികളുടെ വെബ്സൈറ്റുകള് വഴിയുള്ള ഓണ്‍ലൈന്‍ ബുക്കിംഗുകള്‍ക്ക് ക്യാഷ് ഡിസ്‌കൗണ്ടുകളായും, കോര്‍പ്പറേറ്റ് ആനുകൂല്യങ്ങളായും, ഫ്രീ ആക്‌സസറികളായും 15,000 രൂപ മുതല്‍ 50,000 രൂപയിലധികം വരെ നേട്ടമുണ്ടാക്കാം.
ലഭ്യമാകുന്ന പ്രധാന ഇളവുകള്‍
- ബാങ്ക് / കാര്‍ഡ് ഇന്‍സ്റ്റന്റ് ഡിസ്‌കൗണ്ടുകള്‍: പ്രമുഖ ബാങ്കുകളുടെ ക്രെഡിറ്റ് കാര്‍ഡുകള്‍ വഴി വാങ്ങുമ്പോള്‍ 3,000 മുതല്‍ 10,000 രൂപ വരെ തല്‍ക്ഷണ കിഴിവ് (Instant Discount) കിട്ടും.
- ക്യാഷ്ബാക്ക് ഓഫറുകള്‍: ഫ്ലിപ്കാര്ട്ട് ആക്‌സിസ് ബാങ്ക് കാര്‍ഡ് അല്ലെങ്കില്‍ ആമസോണ്‍ പേ ഐസിഐസിഐ കാര്‍ഡ് എന്നിവ ഉപയോഗിച്ചാല്‍ 5% വരെ അണ്‍ലിമിറ്റഡ് ക്യാഷ്ബാക്ക്.
- നോ-കോസ്റ്റ് ഇഎംഐ: പലിശയില്ലാതെ തവണകളായി അടയ്ക്കാനുള്ള സൗകര്യം വഴി 4,000 മുതല്‍ 10,000 രൂപ വരെയുള്ള പലിശച്ചെലവ് ലാഭിക്കാം.
- പ്ലാറ്റ്ഫോം കൂപ്പണുകള്‍ / ഫെസ്റ്റിവല്‍ ഓഫറുകള്‍: ബിഗ് ബില്യണ്‍ ഡേയ്‌സ്, ഗ്രേറ്റ് ഇന്ത്യന്‍ ഫെസ്റ്റിവല്‍ തുടങ്ങിയ സമയങ്ങളില്‍ ലഭിക്കുന്ന സ്‌പെഷ്യല്‍ പ്രൊമോ കോഡുകള്‍.
- സൂപ്പര്‍ കോയിനുകള്‍ / റിവാര്‍ഡ് പോയിന്റുകള്‍: തുടര്‍ന്നുള്ള മറ്റ് ആവശ്യങ്ങള്‍ക്ക് ഉപയോഗിക്കാവുന്ന റിവാര്‍ഡ് പോയിന്റുകള്‍.
ശ്രദ്ധിക്കേണ്ട പ്രധാന കാര്യങ്ങള്‍
- ഓണ്‍ലൈന്‍ പ്ലാറ്റ്ഫോമില്‍ നിങ്ങള്‍ അടയ്ക്കുന്നത് വാഹനത്തിന്റെ എക്‌സ്-ഷോറൂം വില മാത്രമായിരിക്കും. റോഡ് ടാക്‌സ്, ആര്‍ടിഒ രജിസ്‌ട്രേഷന്‍ ഫീസ്, ഇന്‍ഷുറന്‍സ് എന്നിവ ഡീലര്‍ഷിപ്പില്‍ നേരിട്ട് അടയ്‌ക്കേണ്ടി വരും.
- വാഹനം ആര്‍ടിഒയില്‍ രജിസ്റ്റര്‍ ചെയ്യുന്നതിനും, മുഴുവന്‍ പേപ്പര്‍വര്‍ക്കുകള്‍ പൂര്‍ത്തിയാക്കുന്നതിനും മുമ്പായി ഡീലര്‍ഷിപ്പില്‍ നേരിട്ട് ചെന്ന് വാഹനത്തിന് തകരാറുകളില്ലെന്ന് ഉറപ്പുവരുത്തുക. രജിസ്‌ട്രേഷന്‍ കഴിഞ്ഞാല്‍ വാഹനം മാറ്റി നല്‍കാന്‍ നിയമപരമായി ബുദ്ധിമുട്ടാണ്. പ്രീ വേരിഫിക്കേഷന്‍ നിങ്ങള്‍ക്ക് അവകാശമുണ്ട്.
- നിങ്ങളുടെ പിന്‍കോഡില്‍ വാഹനം നല്‍കാന്‍ ഡീലര്‍ഷിപ്പ് ലിങ്ക് ചെയ്തിട്ടുണ്ടോ എന്ന് പരിശോധിക്കുക. ഓണ്‍ലൈന്‍ പര്‍ച്ചേസിന് ശേഷം ആവശ്യമായ രേഖകള്‍ (ആധാര്‍, പാന്‍ കാര്‍ഡ് മുതലായവ) നല്‍കി വാഹനം കൈപ്പറ്റാന്‍ സാധാരണയായി 7 മുതല്‍ 15 ദിവസം വരെ സമയമെടുക്കാം.
- ഓര്‍ഡര്‍ റദ്ദാക്കാന്‍ സാധിക്കുമോ, ക്യാന്‍സലേഷന്‍ ചാര്‍ജ് ഈടാക്കുമോ എന്ന് മുന്‍കൂട്ടി വായിച്ചു മനസിലാക്കുക. ബില്ലിംഗ് കഴിഞ്ഞാല്‍ പലപ്പോഴും ക്യാന്‍സലേഷന്‍ അനുവദിക്കാറില്ല.
- ചില ഡീലര്‍മാര്‍ ഹെല്‍മെറ്റ്, ബോഡി ഗാര്‍ഡ്, എക്സ്റ്റന്‍ഡഡ് വാറന്റി തുടങ്ങിയ ആക്‌സസറികള്‍ അധിക നിരക്കില്‍ നിര്‍ബന്ധപൂര്‍വ്വം ഉള്‍പ്പെടുത്താന്‍ ശ്രമിക്കാറുണ്ട്. ആവശ്യമില്ലാത്തവ ഒഴിവാക്കാന്‍ നിങ്ങള്‍ക്ക് പൂര്‍ണ്ണ അവകാശമുണ്ട്.
- ഓണ്‍ലൈനായി ഓര്‍ഡര്‍ നല്‍കുന്നതിന് മുമ്പായി അടുത്തുള്ള ഏതെങ്കിലും ഷോറൂമില്‍ പോയി വാഹനം ഓടിച്ചു നോക്കി തൃപ്തികരമാണെന്ന് ഉറപ്പുവരുത്തുന്നതും നല്ലതാണ്.
- ഷോറും നിങ്ങള്‍ക്ക് വാഗ്ദാനം ചെയ്യുന്ന വിലയും, ഓണ്‍ലൈന്‍ വിലയും താരതമ്യം ചെയ്തു തീരുമാനം എടുക്കുക.