മുംബൈയ്ക്ക് സമീപം 100 ഏക്കറിൽ വിപുലമായ നോൺ പ്രൊഫിറ്റ്, കെയർ ടൗൺഷിപ്പ് സ്ഥാപിക്കാനൊരുങ്ങി റിലയൻസ് ഫൗണ്ടേഷൻ. അനാഥരായ കുട്ടികൾ, മുതിർന്ന പൗരന്മാർ, ഭിന്നശേഷിയുള്ളവർ എന്നിവരുൾപ്പെടെ അയ്യായിരത്തിലധികം പേർക്ക് ജീവിതകാലം മുഴുവൻ താമസവും, ആരോഗ്യപരിചരണവും ഉറപ്പാക്കുകയാണ് പദ്ധതിയുടെ ലക്ഷ്യം. ‘അനന്ത് ആശ്രയ്’ എന്ന് പേരിട്ടിരിക്കുന്ന പദ്ധതിയുടെ പ്രഖ്യാപനം റിലയൻസ് ഫൗണ്ടേഷൻ സ്ഥാപകയും, ചെയർപേഴ്‌സണുമായ നിത അംബാനിയാണ് നടത്തിയത്.
നവംബർ ഒന്നാം തിയ്യതി മുംബൈയ്ക്കടുത്തുള്ള കർജാത്തിൽ പദ്ധതിയുടെ ഭൂമിപൂജയും, തറക്കല്ലിടൽ ചടങ്ങും നടന്നു. ആവശ്യമായ അനുമതികൾ ലഭിക്കുന്നതനുസരിച്ച് വിവിധ ഘട്ടങ്ങളിലായിരിക്കും നിർമാണം. താമസക്കാർക്ക് പുറമെ പരിചാരകർ, ഡോക്ടർമാർ, മറ്റ് ജീവനക്കാർ, അവരുടെ കുടുംബങ്ങൾ എന്നിവരടക്കം ഏകദേശം പതിനയ്യായിരം പേരെ ഉൾക്കൊള്ളുന്ന വലിയൊരു സമൂഹമായാണ് പദ്ധതി വിഭാവനം ചെയ്തിരിക്കുന്നത്.എട്ട് റസിഡൻഷ്യൽ വില്ലേജുകളും, പ്രത്യേക ഹോസ്പിറ്റലും
എട്ട് റസിഡൻഷ്യൽ വില്ലേജുകളാണ് ടൗൺഷിപ്പിൽ ഒരുക്കുക. ഇന്ത്യയിലെ പുണ്യനദികളുടെ പേരുകളായിരിക്കും ഓരോ ഗ്രാമത്തിനും നൽകുക. സ്ഥാപനങ്ങളിലെ സാധാരണ താമസരീതിക്ക് പകരം, പരിചാരകരുടെ പിന്തുണയോടെ ചെറിയ കുടുംബ വീടുകളിലായിരിക്കും താമസസൗകര്യം.
പ്രത്യേക ഹോസ്പിറ്റൽ, പുനരധിവാസ കേന്ദ്രം, വിദ്യാഭ്യാസ സൗകര്യങ്ങൾ, തൊഴിൽപരിശീലന കേന്ദ്രങ്ങൾ എന്നിവയും പദ്ധതിയുടെ ഭാഗമാണ്. അപസ്മാര ചികിത്സ, പ്രത്യേക പരിചരണം ആവശ്യമായവർക്കുള്ള ദന്തചികിത്സ, പാലിയേറ്റീവ് കെയർ തുടങ്ങിയ സേവനങ്ങളും ആശുപത്രിയിൽ ലഭ്യമാക്കും. ഫിസിയോതെറാപ്പി, സ്പീച്ച് തെറാപ്പി, ഒക്യുപ്പേഷണൽ തെറാപ്പി, ഹൈഡ്രോതെറാപ്പി തുടങ്ങിയ പുനരധിവാസ സേവനങ്ങളും ഒരുക്കും.
പദ്ധതിയുടെ നടത്തിപ്പിനായി താമസക്കാർക്ക് ആവശ്യമായ ദൈനംദിന പരിചരണം, ആരോഗ്യസേവനങ്ങൾ, സുരക്ഷിതമായ താമസം എന്നിവ ഉറപ്പാക്കുന്ന സംവിധാനങ്ങളും ഒരുക്കും. ഓരോരുത്തരുടെയും വ്യക്തിഗത ആവശ്യങ്ങൾ പരിഗണിച്ചുള്ള പരിചരണരീതിയാണ് ലക്ഷ്യമിടുന്നത്. ഭിന്നശേഷിക്കാർക്ക് കൂടുതൽ സ്വതന്ത്രമായി ജീവിക്കാനും, സാമൂഹിക പ്രവർത്തനങ്ങളിൽ പങ്കാളികളാകാനും അവസരമൊരുക്കുന്നതും പദ്ധതിയുടെ പ്രധാന ലക്ഷ്യങ്ങളിലൊന്നാണ്.
കളിസ്ഥലങ്ങൾ, പൂന്തോട്ടങ്ങൾ, കൃഷിയിടങ്ങൾ, വർക്ക്‌ഷോപ്പുകൾ, കഫേ, ബേക്കറി, കലാ-സംഗീത പ്രവർത്തനങ്ങൾക്കുള്ള ഇടങ്ങൾ എന്നിവയും വിഭാവനം ചെയ്തിട്ടുണ്ട്.
സമീപപ്രദേശങ്ങളിലുള്ളവർക്കും പ്രയോജനം
കർജാത്തിന് സമീപമുള്ള പ്രദേശങ്ങളിൽനിന്ന് ആയിരത്തോളം ആളുകൾക്ക് ചികിത്സ, വിദ്യാഭ്യാസം, തൊഴിൽ അവസരങ്ങൾ എന്നിവ ലഭ്യമാക്കാനും പദ്ധതിയുണ്ട്. മൊബൈൽ മെഡിക്കൽ ക്ലിനിക്കുകളും, കുടുംബങ്ങൾക്ക് താൽക്കാലിക പരിചരണസഹായം നൽകുന്ന സൗകര്യങ്ങളും സജ്ജമാക്കും. ജീവിതകാലം മുഴുവൻ പരിചരണം ആവശ്യമുള്ളവർക്കും അവരുടെ കുടുംബങ്ങൾക്കും സുരക്ഷിതമായൊരു അന്തരീക്ഷം ഒരുക്കുകയാണ് പദ്ധതിയുടെ പ്രധാന ലക്ഷ്യം.