റഷ്യ- യുക്രൈന്‍ യുദ്ധം മൂലം ആഗോളതലത്തില്‍ രൂക്ഷമായ ഭക്ഷ്യപ്രതിസന്ധിക്ക് പരിഹാരം കാണാന്‍ കരിങ്കടലില്‍ ‘ഭക്ഷ്യ ഇടനാഴി’ (Food Corridor) പുനഃസ്ഥാപിക്കുന്നതില്‍ ഇന്ത്യ മധ്യസ്ഥത വഹിക്കും. യുക്രൈന്‍ പ്രസിഡന്റ് വ്ളാഡിമര് സെലന്‍സ്‌കിയും, പ്രധാനമന്ത്രി നരേന്ദ്ര മോദിയും തമ്മില്‍ നടത്തിയ നിര്‍ണായക ഫോണ്‍ സംഭാഷണത്തിലാണ് ഈ സുപ്രധാന നീക്കം ഉരുത്തിരിഞ്ഞത്. അബുദാബിയില്‍ നടക്കാനിരിക്കുന്ന നയതന്ത്ര ചര്‍ച്ചകള്‍ക്ക് മുന്നോടിയായുള്ള ഈ ധാരണ, ആഗോള വിപണിക്ക് മാത്രമല്ല, ഇന്ത്യയുടെ ആഭ്യന്തര ഭക്ഷ്യ- വള സുരക്ഷയ്ക്കും നിര്‍ണായകമാണ്. നയതന്ത്രത്തിലൂടെ ലോകസമാധാനം വീണ്ടെടുക്കാനുള്ള ഇന്ത്യയുടെ ക്രിയാത്മക ഇടപെടലിനെ ഏറെ പ്രതീക്ഷയോടെയാണ് യുക്രൈന്‍ ഉറ്റുനോക്കുന്നത്.
റഷ്യ- യുക്രൈന്‍ യുദ്ധത്തില്‍ ഇടപെടാന്‍ ഇന്ത്യറഷ്യ- യുക്രൈന്‍ യുദ്ധത്തിന്റെ പശ്ചാത്തലത്തില്‍ ആഗോളതലത്തില്‍ പ്രതിസന്ധിയിലായ ഭക്ഷ്യ വിതരണത്തിനായി ഭക്ഷ്യ ഇടനാഴികള്‍ (Food Corridors) സ്ഥാപിക്കുന്നതില്‍ മധ്യസ്ഥത വഹിക്കാന്‍ ഇന്ത്യ തയ്യാറെന്ന് വിവരം. അബുദാബിയില്‍ നടക്കാനിരിക്കുന്ന നയതന്ത്ര ചര്‍ച്ചകള്‍ക്ക് മുന്നോടിയായി പ്രധാനമന്ത്രി നരേന്ദ്ര മോദിയും, യുക്രൈന്‍ പ്രസിഡന്റ് വ്ളാഡിമര് സെലന്‍സ്‌കിയും നടത്തിയ ഫോണ്‍ സംഭാഷണത്തിന് ശേഷമാണ് ഈ സുപ്രധാന തീരുമാനം പുറത്തുവന്നത്.
യുദ്ധത്തിനുള്ള സമയമല്ലെന്ന് പിഎം മോദി
ചര്‍ച്ചകളിലൂടെയും, നയതന്ത്രത്തിലൂടെയും പ്രശ്‌നപരിഹാരം കാണണം എന്ന ഇന്ത്യയുടെ സ്ഥിരമായ നിലപാട് പ്രധാനമന്ത്രി ആവര്‍ത്തിക്കുകയാണുണ്ടായത്. ഇത് യുദ്ധത്തിനുള്ള സമയമല്ലെന്ന് ഒരിക്കല്‍ കൂടി അദ്ദേഹം വ്യക്തമാക്കി. സംഘര്‍ഷം സമാധാനപരമായി പരിഹരിക്കുന്നതിന് ലക്ഷ്യമിട്ടുള്ള ഏത് നയതന്ത്ര ശ്രമങ്ങള്‍ക്കും സംഭാവന നല്‍കാന്‍ ഇന്ത്യ എപ്പോഴും തയ്യാറാണെന്ന് അദ്ദേഹം ഉറപ്പുനല്‍കിയിട്ടുണ്ട്.
വ്ളാഡിമര് സെലന്‍സ്‌കി വ്യക്തമാക്കിയത് എന്ത്
അബുദാബിയില്‍ നടക്കാനിരിക്കുന്ന സമാധാന യോഗത്തിനായുള്ള അജണ്ടകള്‍ക്കായി യുക്രൈന്‍ സജീവമായി തയ്യാറെടുക്കുകയാണെന്ന് സെലന്‍സ്‌കി വ്യക്തമാക്കി. സമാധാനശ്രമങ്ങളില്‍ യുക്രൈന്‍ എപ്പോഴും ക്രിയാത്മകമായ സമീപനമാണ് സ്വീകരിക്കുന്നതെന്നും, യുദ്ധം ലഘൂകരിക്കാന്‍ റഷ്യയുടെ ഭാഗത്തുനിന്നും ഇതേ സന്നദ്ധത അനിവാര്യമാണെന്നും അദ്ദേഹം പറഞ്ഞു. കരിങ്കടല്‍ വഴിയുള്ള ധാന്യ കയറ്റുമതി റഷ്യ തടയുന്നത് ആഗോള സമ്പദ്വ്യവസ്ഥയെയും, കോടിക്കണക്കിന് മനുഷ്യരെയും സാരമായി ബാധിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
എന്താണ് ഭക്ഷ്യ ഇടനാഴി (Food Corridor)
യുദ്ധമോ, ഉപരോധമോ, മറ്റ് പ്രതിസന്ധികളോ നിലനില്‍ക്കുന്ന മേഖലകളില്‍ നിന്ന് കാര്‍ഷിക വിളകള്‍, ഭക്ഷ്യധാന്യങ്ങള്‍, വളങ്ങള്‍ എന്നിവ സുരക്ഷിതമായി മറ്റ് രാജ്യങ്ങളിലേക്ക് എത്തിക്കാന്‍ ഇരുപക്ഷവും അംഗീകരിച്ച് നല്‍കുന്ന പ്രത്യേക ഗതാഗത പാതയാണ് ഭക്ഷ്യ ഇടനാഴി.
യുദ്ധമുഖങ്ങളില്‍ കപ്പലുകള്‍ക്കോ, ചരക്കുവാഹനങ്ങള്‍ക്കോ നേരെ ആക്രമണം ഉണ്ടാകില്ലെന്ന് ഇത് ഉറപ്പുവരുത്തുന്നു. സൈനികേതരമായി ഭക്ഷ്യവസ്തുക്കള്‍ കൊണ്ടുപോകാന്‍ ഇത്തരം ഇടനാഴികള്‍ വഴിയൊരുക്കുന്നു. റഷ്യ- യുക്രൈന്‍ യുദ്ധത്തില്‍ കരിങ്കടല്‍ (Black Sea) വഴിയുള്ള ഗോതമ്പ്, ചോളം, സൂര്യകാന്തി എണ്ണ എന്നിവയുടെ കയറ്റുമതി തടസപ്പെടാതിരിക്കാന്‍ രൂപീകരിച്ച സംവിധാനം ഇതിനൊരു ഉദാഹരണമാണ്.
ഭക്ഷ്യ ഇടനാഴിയും ഇന്ത്യയും
- ഇന്ത്യ ഒരു പ്രധാന ഭക്ഷ്യ ഉല്‍പ്പാദക രാജ്യമാണെങ്കിലും, ആഗോള ഭക്ഷ്യ ഇടനാഴികള്‍ നിലനില്‍ക്കുന്നത് ഇന്ത്യയുടെ സാമ്പത്തിക, കാര്‍ഷിക, നയതന്ത്ര താല്‍പ്പര്യങ്ങള്‍ക്ക് അത്യന്താപേക്ഷിതമാണ്. ഇന്ത്യ ഉപയോഗിക്കുന്ന സൂര്യകാന്തി എണ്ണയുടെ (Sunflower oil) 70 ശതമാനത്തിലധികവും ഇറക്കുമതി ചെയ്യുന്നത് യുക്രൈന്‍, റഷ്യ എന്നിവിടങ്ങളില്‍ നിന്നാണ്. കരിങ്കടല്‍ വഴിയുള്ള ഇടനാഴികള്‍ തടസപ്പെട്ടാല്‍ ഇന്ത്യയിലെ പാചക എണ്ണ വിപണിയില്‍ ക്ഷാമവും കടുത്ത വിലക്കയറ്റവും ഉണ്ടാകും.
- ഇന്ത്യന്‍ കര്‍ഷകര്‍ക്ക് ആവശ്യമായ പൊട്ടാഷ്, ഫോസ്‌ഫേറ്റ്, യൂറിയ തുടങ്ങിയ രാസവളങ്ങളുടെ വലിയൊരു പങ്ക് വരുന്നത് റഷ്യ, ബെലാറസ് തുടങ്ങിയ മേഖലകളില്‍ നിന്നാണ്. ഭക്ഷ്യ- വള വിതരണ ശൃംഖലകള്‍ തടസമില്ലാതെ തുടരുന്നത് ഇന്ത്യയുടെ ആഭ്യന്തര കാര്‍ഷിക ഉല്‍പ്പാദനത്തെയും വിളവെടുപ്പിനെയും നേരിട്ട് ബാധിക്കാതിരിക്കാന്‍ സഹായിക്കും.
- ആഗോളതലത്തില്‍ ധാന്യങ്ങളുടെയും ഭക്ഷ്യവസ്തുക്കളുടെയും വിതരണം നിലച്ചാല്‍ അന്താരാഷ്ട്ര വിപണിയില്‍ അവയുടെ വില കുതിച്ചുയരും. ഇത് ഇന്ത്യയിലെ ഉപഭോക്തൃ വില സൂചികയെയും (CPI), സാധാരണക്കാരുടെ നിത്യച്ചെലവുകളെയും ബാധിക്കും. ഭക്ഷ്യ ഇടനാഴികള്‍ വിപണിയിലെ വില സ്ഥിരത ഉറപ്പാക്കുന്നു.
- ആഫ്രിക്കന്‍, പശ്ചിമേഷ്യന്‍ വികസ്വര രാജ്യങ്ങള്‍ യുക്രൈന്‍- റഷ്യന്‍ ധാന്യങ്ങളെയാണ് പട്ടിണിയകറ്റാന്‍ പ്രധാനമായും ആശ്രയിക്കുന്നത്. വികസ്വര രാജ്യങ്ങളുടെ (Global South) ശബ്ദമായി നിലകൊള്ളുന്ന ഇന്ത്യയ്ക്ക്, ഈ രാജ്യങ്ങളിലെ ഭക്ഷ്യക്ഷാമം പരിഹരിക്കാന്‍ മധ്യസ്ഥത വഹിക്കുന്നത് വലിയ അന്താരാഷ്ട്ര സ്വീകാര്യതയും, നയതന്ത്ര മുന്‍തൂക്കവും നല്‍കും.
- സമുദ്രപാതകള്‍ സുരക്ഷിതമല്ലെങ്കില്‍ ഇന്‍ഷുറന്‍സ് പ്രീമിയവും, കപ്പല്‍ വാടകയും കുത്തനെ ഉയരും. ഭക്ഷ്യ ഇടനാഴികള്‍ വഴിയുള്ള സുരക്ഷിത ഗതാഗതം ഇന്ത്യയുടെ പൊതുവായ ആഗോള വ്യാപാരച്ചെലവ് നിയന്ത്രിച്ചു നിര്‍ത്താന്‍ സഹായിക്കും.
യുദ്ധം അവസാനിപ്പിക്കുന്നതില്‍ ഇന്ത്യയുടെ റോള്‍
യുദ്ധം അവസാനിപ്പിക്കാന്‍ മറ്റ് ലോകനേതാക്കളുമായി സംഭാഷണങ്ങള്‍ നടത്താനും, നിര്‍ണായകമായ ചുവടുവെപ്പുകള്‍ എടുക്കാനും ഇന്ത്യയ്ക്ക് സാധിക്കുമെന്ന് യുക്രൈന്‍ വിശ്വസിക്കുന്നു. ആഗോള ഭക്ഷ്യ സുരക്ഷ ഉറപ്പാക്കുന്നതിന്റെ ഭാഗമായി കരിങ്കടലില്‍ സുരക്ഷിതമായ ഭക്ഷ്യ ഇടനാഴികള്‍ സ്ഥാപിക്കുന്നതില്‍ മധ്യസ്ഥത വഹിക്കുക എന്നതാണ് ഇന്ത്യയ്ക്ക് നിലവില്‍ ചെയ്യാന്‍ കഴിയുന്ന ഏറ്റവും പ്രായോഗികവും, പ്രധാനപ്പെട്ടതുമായ ഇടപെടല്‍.
ശ്രദ്ധിക്കേണ്ട കാര്യങ്ങള്‍
യുദ്ധം അവസാനിപ്പിക്കാനുള്ള നീക്കങ്ങളില്‍ അബുദാബിയില്‍ നടക്കാനിരിക്കുന്ന നയതന്ത്ര ചര്‍ച്ചകള്‍ വളരെ നിര്‍ണായകമാണ്. സമുദ്രപാതകള്‍ തടയപ്പെട്ടത് മൂലമുള്ള ആഗോള ഭക്ഷ്യ പ്രതിസന്ധി പരിഹരിക്കാന്‍ ഇന്ത്യയുടെ മധ്യസ്ഥതയെ യുക്രൈന്‍ ഏറെ പ്രതീക്ഷയോടെയാണ് നോക്കിക്കാണുന്നത്. മനുഷ്യത്വപരമായ സമീപനത്തിനാണ് ഇന്ത്യ മുന്‍ഗണന നല്‍കുന്നത്. ഇന്ത്യയ്ക്ക് റഷ്യയുമായുള്ള മികച്ച ബന്ധം യുക്രൈനിന്റെ പ്രതീക്ഷകള്‍ക്ക് നിറമേകുന്നു.