കേന്ദ്ര സര്‍ക്കാര്‍ ഉദ്യോഗസ്ഥര്‍ക്ക് ഔദ്യോഗിക ആവശ്യങ്ങള്‍ക്കായി വാങ്ങുന്ന ലാപ്ടോപ്പുകളുടെ വില പരിധി 1.50 ലക്ഷം രൂപയായും, 40 ശതമാനത്തിലധികം മേക്ക് ഇന്‍ ഇന്ത്യ ഘടകങ്ങളുള്ള ഉപകരണങ്ങളുടേത് 1.80 ലക്ഷം രൂപയായും കേന്ദ്ര ധനകാര്യ മന്ത്രാലയം ഉയര്‍ത്തി. നാല് വര്‍ഷത്തെ ഉപയോഗത്തിന് ശേഷം ഈ ലാപ്ടോപ്പുകള് ഉദ്യോഗസ്ഥര്‍ക്ക് സൗജന്യമായി സ്വന്തമാക്കാമെന്നതാണ് പുതിയ ഉത്തരവിലെ പ്രധാന ആകര്‍ഷണം. ഇതോടൊപ്പം കേന്ദ്ര മന്ത്രാലയങ്ങളിലെ ഔദ്യോഗിക സ്റ്റാഫ് കാറുകളായി ഇലക്ട്രിക് വാഹനങ്ങള്‍ (EV) വാങ്ങുന്നതിനുള്ള പരിധി 20 ലക്ഷം രൂപയായും വര്‍ധിപ്പിച്ചിട്ടുണ്ട്.
പ്രഖ്യാപിക്കപ്പെട്ട പുതിയ പരിധികള്‍ (വാഹനങ്ങള്‍ & ലാപ്ടോപ്പ്)ഇലക്ട്രിക് വാഹനങ്ങള്‍ (EV) വാങ്ങാവുന്ന പരമാവധി വില 20 ലക്ഷം രൂപയായി വര്‍ധിപ്പിച്ചു. അതേസമയം പെട്രോള്‍, ഡീസല്‍, ഹൈബ്രിഡ് വാഹനങ്ങള്‍ വാങ്ങുന്നതിനുള്ള പരിധി 10 ലക്ഷം രൂപയാണ്.
ഉദ്യോഗസ്ഥര്‍ക്ക് ലാപ്‌ടോപ്പും ടാബ്ലെറ്റും വാങ്ങുന്നതിനുള്ള പുതിയ വില പരിധി 1.50 ലക്ഷം രൂപ (നികുതിക്ക് പുറമെ) ആണ്. അതേസമയം 40 ശതമാനത്തിലധികം ഇന്ത്യയില്‍ നിര്‍മ്മിച്ച ഘടകങ്ങളുള്ള ലാപ്‌ടോപ്പുകള്‍ക്ക് ഈ പരിധി 1.80 ലക്ഷം രൂപയാണ്. മേക്ക് ഇന്‍ ഇന്ത്യ ഉപകരണങ്ങള്‍ പ്രോല്‍സാഹിപ്പിക്കുന്നതിനാണിത്.
പരിധികള്‍ വര്‍ധിപ്പിച്ചതിന്റെ കാരണങ്ങള്‍
സര്‍ക്കാരിന്റെ ഹരിതനയം വ്യക്തമാക്കുന്നതാണ് തീരുമാനം. ഇലക്ട്രിക് വാഹനങ്ങള്‍ക്ക് ഉയര്‍ന്ന പരിധി നല്‍കുന്നതിലൂടെ ഫോസില്‍ ഇന്ധനങ്ങളോടുള്ള ആശ്രയത്വം കുറയ്ക്കാനും, പരിസ്ഥിതി സൗഹൃദ ഗതാഗതം ശക്തമാക്കാനും ലക്ഷ്യണമിടുന്നു. പഴയ വാഹനങ്ങള്‍ മാറ്റുമ്പോള്‍ ഇലക്ട്രിക് കാറുകള്‍ക്ക് മാത്രമായിരിക്കും ഇനി ഒന്നാം മുന്‍ഗണന.
ലാപ്‌ടോപ്പിനും മറ്റും 1.80 ലക്ഷം രൂപയുടെ പ്രത്യേക പരിധി നല്‍കുന്നതിലൂടെ ‘മേക്ക് ഇന്‍ ഇന്ത്യ’ (Make-in-India) ഉപകരണങ്ങളുടെ വില്‍പ്പന രാജ്യത്ത് വര്‍ധിപ്പിക്കാമെന്നാണു വിലയിരുത്തല്‍. വര്‍ധിച്ചുവരുന്ന ഡിജിറ്റല്‍ ആവശ്യങ്ങള്‍ക്കനുസരിച്ച്, ഉദ്യോഗസ്ഥര്‍ക്ക് ഔദ്യോഗിക ജോലികള്‍ തടസമില്ലാതെ ചെയ്യാന്‍ മികച്ച വേഗവും, നിലവാരവുമുള്ള ഉപകരണങ്ങള്‍ ലഭ്യമാക്കുകയാണ് ലക്ഷ്യം.
എല്ലാ സര്‍ക്കാര്‍ ജീവനക്കാര്‍ക്കും അര്‍ഹരാണോ
ഈ ഇളവുകളും, പുതിയ പരിധികളും കേന്ദ്ര സര്‍ക്കാരിന് കീഴിലുള്ള ഉദ്യോഗസ്ഥര്‍ക്ക് മാത്രമായി ലഭ്യമായുള്ളതാണ്. ലാപ്ടോപ്പ് ആനുകൂല്യം, ഏഴാം ശമ്പള കമ്മീഷന്‍ പ്രകാരം പേ ലെവല്‍ 8-ഉം അതിനു മുകളിലുമുള്ള (Pay Level 8 and above) ഗസറ്റഡ് ഉദ്യോഗസ്ഥര്‍ക്കാണ് ബാധകമാകുക.
സംസ്ഥാന സര്‍ക്കാര്‍ ജീവനക്കാര്‍, പൊതുമേഖലാ സ്ഥാപനങ്ങള്‍ (PSU), സ്വയംഭരണ സ്ഥാപനങ്ങള്‍, മന്ത്രിമാരുടെ പേഴ്‌സണല്‍ സ്റ്റാഫുകള്‍ എന്നിവര്‍ക്ക് ഈ നിയമം നേരിട്ട് ബാധകമല്ല. എങ്കിലും അതത് ഭരണസമിതികളുടെ പ്രത്യേക അനുമതിയോടെ അവര്‍ക്കും ഇത് സ്വന്തം സ്ഥാപനങ്ങളില്‍ നടപ്പിലാക്കാവുന്നതാണ്.
മലയാളികള്‍ക്ക് നേട്ടമാകുന്നത് എങ്ങനെ
കേന്ദ്ര സര്‍ക്കാരിന്റെ വിവിധ മന്ത്രാലയങ്ങളിലും, വകുപ്പുകളിലുമായി ഉയര്‍ന്ന തസ്തികകളില്‍ (Level 8+) ജോലി ചെയ്യുന്ന ആയിരക്കണക്കിന് മലയാളികളായ ഉദ്യോഗസ്ഥര്‍ക്ക് ഉയര്‍ന്ന നിലവാരമുള്ള ലാപ്‌ടോപ്പുകളും, ആധുനിക ഇലക്ട്രിക് വാഹനങ്ങളും സ്വന്തമാക്കാനും, ഉപയോഗിക്കാനും ഇതിലൂടെ നേരിട്ട് അവസരം ലഭിക്കും.
മേക്ക് ഇന്‍ ഇന്ത്യ ഉപകരണങ്ങള്‍ക്കും ഇലക്ട്രിക് വാഹനങ്ങള്‍ക്കും കൂടുതല്‍ ഡിമാന്‍ഡ് സൃഷ്ടിക്കപ്പെടും. ഇത് ഇന്ത്യയിലെ ഐടി, ഓട്ടോമൊബൈല്‍ മേഖലകള്‍ക്ക് ഗുണം ചെയ്യുന്നതോടൊപ്പം, ആ മേഖലകളില്‍ ജോലി ചെയ്യുന്ന പ്രവാസി മലയാളികള്‍ക്കും പരോക്ഷമായ തൊഴില്‍- ബിസിനസ് നേട്ടങ്ങള്‍ നല്‍കും.
പ്രത്യേകം ശ്രദ്ധിക്കേണ്ട കാര്യങ്ങള്‍
ലാപ്ടോപ്പുകള് ലഭിച്ച് 4 വര്‍ഷത്തിനു ശേഷം അതിലെ ഔദ്യോഗിക ഡാറ്റ പൂര്‍ണ്ണമായും സുരക്ഷിതമായി മായ്ച്ച ശേഷം ഉദ്യോഗസ്ഥര്‍ക്ക് ആ ഉപകരണം സൗജന്യമായി സ്വന്തമാക്കാം. ജീവനക്കാരന്‍ 4 വര്‍ഷത്തിന് മുമ്പ് സര്‍വീസില്‍ നിന്ന് വിരമിക്കുകയാണെങ്കില്‍, ലാപ്‌ടോപ്പിന്റെ അന്നത്തെ മൂല്യം സര്‍ക്കാരിലേക്ക് അടച്ച് ഉപകരണം സ്വന്തമാക്കാം. ഓരോ വര്‍ഷവും 25% വിലക്കുറവ് കണക്കാക്കിയാകും നല്‍കേണ്ട തുക നിശ്ചയിക്കുക. സ്ഥലം മാറിപ്പോകുമ്പോള്‍ പുതിയ ഓഫീസിലേക്ക് ഉപകരണം കൊണ്ടുപോകാനും സാധിക്കും.
വാറന്റി കാലാവധി കഴിഞ്ഞാലും ഉപകരണത്തിന്റെ മെയിന്റനന്‍സ് ചിലവുകള്‍ ഡിപ്പാര്‍ട്ട്‌മെന്റ് തന്നെ വഹിക്കും. ഒരു തവണ ലാപ്ടോപ്പ് അനുവദിച്ചാല്‍, അത് തീര്‍ത്തും ഉപയോഗശൂന്യമായി എന്ന് ഉറപ്പാക്കാതെ 4 വര്‍ഷത്തിനുള്ളില്‍ പുതിയൊരു ഉപകരണം അനുവദിക്കുന്നതല്ല.